Mboe 44:4-17

⁴Yooba, nu king tio mi Anutu tio. Mi nu ur sua mbolŋana ta kembei: Niam ta Yakop popoŋana kini na, ko amlip pa koyam koi bizin.

⁵Mi nu gabgaaba yam, tanata amziiri koyam koi bizin ma tila len. Pa ampase pa zom, tanata amlip pizin mi amparaama zin.

⁶Nio ti aŋpase pa peene tio som. Mi buza tio tomini, ina irao be ikamke yo na som.

⁷Nu itum ta uluulu yam mi tatkewe yam pa koyam koi bizin naman. Nu pakankaana zin ma tiko ma tila len raama kan miaŋ.

⁸Tana niyam se pu, mi leleyam ambai pu mi ampakurkur zom totomen.

⁹Tamen koozi na, nu pizil kat ndemem piam, mi gaaba zin malmal kan tiam mini som. Mi zem koyam koi bizin ma tilip piam, tana koyam miaŋ.

¹⁰Nu kam ma amko papirik pa koyam koi bizin, mi zin tiyo mburu tiam ma imap.

¹¹Mi zem zin ma tikas yam sorok kembei zin sipsip ta timbit zin be tipun zin i. Mi iŋgi nu yaŋgwiiri yam ma ambot leŋaleŋa la zin wal pakan mazwan.

¹²Wal ku ta niam i. Tamen iŋgi zem wal pakan ma tikam yam sorok be amwe mbesooŋo pizin. Mi nu ur motom pa lem kadoono sa som. Parei, nu re yam kembei koroŋ sorok?

¹³Zin wal ta timbot kolouŋana piam na, tire mbulu ku tana, mi tizeŋzeeŋge piam. Mi tikamam sua repiiliŋana piam, mi matan pasom yam.

¹⁴Niam amwe kembei ta ŋeu pizin wal matan munŋan. Zin karkari tizeŋzeeŋge piam mi uten mbiŋbiŋ piam.

¹⁵Aigule ta boozomen, zoŋ ise mi ila zoŋ isula na, tomtom tirepilpiili yo. Tana koŋ miaŋ mi aŋtuntuundu men.

¹⁶Pa koŋ koi bizin tiwirri sua repiiliŋana mi pamiaŋŋana pio. Mi tiurur koi pio mi lelen be tipasaana yo.

¹⁷Tamen niam motoyam mbeleelu som, mi amolo sua kiti mbukŋana ka tutu som. Kena parei ta nu kam mbulu ta boozomen taiŋgi piam?