Mboe 40:5-14

⁵Yooba, nu ta Anutu tio. Kadom tomtom sa som. Pa nu kamam uraata bibip bekena uulu yam. Uraata tana ipa ndel kat. Mi lelem iur kek be kam mbulu ambaimbaiŋan boozomen piam. Sombe aŋtoombo be aŋnin zin, na aŋrao som.

⁶Nio sombe aŋkam mbili sa, som kini sa be ampatoronu pa, na nu lelem pa pe som. Mi sombe aŋneene mbili sa su kerem uunu, som aŋkam patoronŋana sa bekena reege sanaana tio, ina tomini, nu kam kinkiini pa som. Mi nu kam ma talŋoŋ ileŋleŋ kat sua ku.

⁷Tana aŋso ta kembei: Anutu, nio ta aŋbotmbot ti. Koŋ sua ta kwom bizin tibeede se ro ku kek na, nio ko aŋto.

⁸Anutu tio, leleŋ ilip be aŋto nu itum lelem. Pa sua ku imbotmbot la leleŋ i.

⁹Nu ute: Nio aŋmanne som. Mbulu ku ndeeŋeŋana ta kamam bekena uulu yam na, aŋzzoyaryaara lela lupŋana biibi kizin wal ku.

¹⁰Tana uruunu ambaiŋana ki ulaaŋa ku mi mbulu ku ndeeŋeŋana na, aŋwatkaala som. Mbulu ku ta uluulu zin tomtom mi toto sua ku na, aŋswe kat. Tana mbulu ku ta muŋaiŋai zin wal ku mi toto sua ku mbukŋana na, aŋwatkaala som. Aŋzzoyaryaara lela lupŋana biibi kizin wal ku.

¹¹Yooba, tatke muŋaiŋana ku pio pepe. Kampeŋana mi muŋaiŋana ku, ramaki sua ku ŋonoono, ta ko iporoukalkaala yo totomen.

¹²Re. Pataŋana boozo kat ilol yo ma sik. Irao aŋnin zin na som! Iŋgi sanaana tio ka kadoono ta izze tio i. Tana aŋtaŋtaŋ mi motoŋ zarzar ma aŋre kat lele som. Sanaana tio na boozo kat. Ilip pa uteŋ runrun. Tabe aŋmoto mi mburoŋ imap kat.

¹³O Yooba, lelem isaana pio mi kamke yo lak! Loŋa mar mi uulu yo!

¹⁴Zin wal ta tirru zaala be tipun yo ma aŋmeete i, na pakankaana zin, mi pimiili zin ma tila raama kan miaŋ. Mi zin wal ta tire pataŋana tio ti mi menmeen zin pa, na zin tomini, ziiri zin ma timiili raama kan miaŋ.