Mboe 40:2-10

²Nio kembei aŋbot sula naala ta sananŋana kat. Mi ni iweene yo ma aŋse. Nio aŋdubup sula tiiŋgi sananŋana kat. Mi ni ipas yo ma aŋse, mi iur yo sala toono mbolŋana bekena aŋmender ma tuŋ.

³Mi ikam leŋ mboe popoŋana be aŋbo mi aŋpakur Anutu kiti zaana pa. Mbulu ta Yooba ikam pio na, wal boozomen tire. Tabe motoŋana ikam zin mi tiurla kini.

⁴Tomtom ta so ipase pa Yooba itutamen, nako leleene ambai mi kampeŋana ki Yooba imbotmbot se kini. Tomtom ta kembei, ni ipizilzil ndemeene pizin wal ta tipakurkur zitun. Mi zin wal ta tizem zaala ambaiŋana mi timbesmbeeze pizin merere pakaamŋan na, ni igabgaaba zin som.

⁵Yooba, nu ta Anutu tio. Kadom tomtom sa som. Pa nu kamam uraata bibip bekena uulu yam. Uraata tana ipa ndel kat. Mi lelem iur kek be kam mbulu ambaimbaiŋan boozomen piam. Sombe aŋtoombo be aŋnin zin, na aŋrao som.

⁶Nio sombe aŋkam mbili sa, som kini sa be ampatoronu pa, na nu lelem pa pe som. Mi sombe aŋneene mbili sa su kerem uunu, som aŋkam patoronŋana sa bekena reege sanaana tio, ina tomini, nu kam kinkiini pa som. Mi nu kam ma talŋoŋ ileŋleŋ kat sua ku.

⁷Tana aŋso ta kembei: Anutu, nio ta aŋbotmbot ti. Koŋ sua ta kwom bizin tibeede se ro ku kek na, nio ko aŋto.

⁸Anutu tio, leleŋ ilip be aŋto nu itum lelem. Pa sua ku imbotmbot la leleŋ i.

⁹Nu ute: Nio aŋmanne som. Mbulu ku ndeeŋeŋana ta kamam bekena uulu yam na, aŋzzoyaryaara lela lupŋana biibi kizin wal ku.

¹⁰Tana uruunu ambaiŋana ki ulaaŋa ku mi mbulu ku ndeeŋeŋana na, aŋwatkaala som. Mbulu ku ta uluulu zin tomtom mi toto sua ku na, aŋswe kat. Tana mbulu ku ta muŋaiŋai zin wal ku mi toto sua ku mbukŋana na, aŋwatkaala som. Aŋzzoyaryaara lela lupŋana biibi kizin wal ku.