Mboe 39:3-11

³Leleŋ ibayou ma tau aŋsaana kat. Pa aŋkam ŋgar boozo pa zin wal sananŋan ta mboti kizin ambai men. Tana aŋyamaana kembei ta you ikanan la leleŋ ma aŋrao aŋgabiizi ituŋ mini som. To aŋwi Anutu mi aŋso ta kembei:

⁴“Yooba, paute yo kat. Ndaama tio piizi ta imbotmbot men i? Ko aŋmeete mi aŋmap pa toono ŋiizi? Uulu yo be aŋkilaala kat ta kembei: Mbotŋana tio ta ki toono ti na molo som.

⁵Nu kam leŋ mazwaana rimen ŋonoono be aŋbotmbot su toono. Tana mboti tio na, kembei ta koroŋ sorok pa nu motom. Ŋonoono kat, tomtom ta boozomen mbotŋana kizin na, koroŋ sorok. Timbot rimen mi timap, kembei miiri ta iwedet pa kwon na.

⁶Zin kembei koroŋ kunuunu. Sombe zoŋ imap na imap. Tata ikam zin ma tizzu mi tizze pa uraata bekena tindoundou len koroŋ boozo. Mi ina tipun sorok mburan. Pa tiute som. Asiŋ ko ikam koroŋ kizin tana?”

⁷Yooba, sokorei toro tabe aŋur motoŋ pa? Som. Nio aŋur motoŋ pu tau.

⁸Uulu yo mi tatke yo pa sanaana tio ta boozomen. Kokena wal kankaanaŋan tikam sua repiiliŋana pio.

⁹Nio iŋgi aŋmaane men. Irao aŋso sua sa som. Pa nu itum ta ur pataŋana tiŋgi pio.

¹⁰Mi nu seeze motoŋ irao kek. Kam mini pepe. Pa mbel balisŋoŋ ma iŋgi be aŋmeete i.

¹¹Sombe tomtom tikam sanaana, na nu yamyaamba zin mi ballis zin bekena pazal zin. Mi koroŋ kizin ambaimbaiŋan ta lelen pa ilip na, nu pasansaana kembei ta kiibi ipasansaana kawaala na. Ina kembei ta aŋso na. Niam tomtom, koroŋ sorok. Ambot rimen mi amap, kembei miiri ta iwedet pa kwoyam na.