Mboe 38:6-16

⁶Yoyouŋana ikam yo ma tau, aŋkaraŋeeze pa mi aŋtuntuundu men. Motoŋ se kor som. Aigule ta boozomen, aŋtaŋtaŋ pa berek ma ila mbeŋ.

⁷Kuliŋ ta boozomen ibayou kat kembei ta you i. Sa imbot ambai som.

⁸Mete ti ipun yo ma mburoŋ imap kat. Tana leleŋ ipata kat mi aŋyakyak men.

⁹Yooba, koroŋ ta nio leleŋ pa ilip na, nu ute kek. Pa tiŋiizi tio ike pu som.

¹⁰Iŋgi keteŋ ikamam uraata biibi kat ma mburoŋ imap. Tabe ikam ma motoŋ zugutgut.

¹¹Zin gaabaŋoŋ mi toŋmatiziŋ tio tire mete tio ti na, timbotmbot molo pio. Mi wal ta ruumu kizin igarau yo na, zin tomini tiloulou yo som.

¹²Mi koŋ koi bizin na, timbuuru koŋ mi tiurur kilis kizin be tikam yo. Mazwaana ta boozomen timburmbuuru pio, mi tikamam sua pakaamŋana pio.

¹³Tamen nio aŋkam ŋgar pa sua kizin som, mi aŋpekel som. Nio iŋgi kembei tomtom ta talŋaana imun ma irao ileŋ sua som. Nio kembei tomtom kwo munŋana ta irao iso sua som.

¹⁴Ŋonoono kat, nio kembei tomtom talŋaana munŋana ta ileŋ sua som, mi irao ipekel sua sa som.

¹⁵Yooba, nio aŋur motoŋ pu mi aŋpase pu. Yooba Anutu tio, nu ko leŋ suŋŋana tio mi uulu yo.

¹⁶Pa nio aŋsuŋu be uulu yo. Kokena aŋtop, to koŋ koi bizin tire, mi nin ise ma menmeen zin, mi tiso tilip pio.