Mboe 37:14-34

¹⁴Wal sananŋan tipas buza kizin be tikuruumu zin wal sorrokŋan mi zin wal ta len ulaaŋa sa som na. Mi tiser peene lutuunu kizin be tipeene zin. Pa tisombe tikas zin wal ta titoto zaala ambaiŋana na ma timetmeete ma tila len.

¹⁵Tamen buza kizin ko timiili pa zitun. Mi peene naana kizin ko tipolpol.

¹⁶Sombe tomtom ndeeŋeŋana le koroŋ boozo som, na toŋgo. Mbotŋana kini ko ambai ma ilip pa tomtom sananŋana ta le koroŋ boozo na.

¹⁷Pa Yooba, ni ko ipunmeete wal sananŋan mburan. Mi wal ndeeŋeŋan na, ni ko ipombol zin, mi ikiskis zin.

¹⁸Wal ambaimbaiŋan ta len uunu sa isaana som na, Yooba mataana pizin. Mi matamur ta ni ikam pizin, ko imbotmbot ma alok.

¹⁹Sombe mazwaana ki pataŋana ipet, na zin ko timbot ambai. Mi sombe peteele isu, na zin ko tirao kat pa kan kini.

²⁰Tamen wal sananŋan ko timbiriizi ma tila len. Yooba ka koi bizin ko timetmeete kembei manman pwon ta timetmeete ma titoptop. Ko timap kembei you ka koi ta ikam buk ma ise mi imbiriizi.

²¹Wal sananŋan tikamam mbun mi tikodot som. Mi wal ndeeŋeŋan na, timuŋaiŋai zin tomtom mi tikamam koroŋ pizin sorok.

²²Zin wal ta kampeŋana ki Yooba imbotmbot se kizin na, zan be tikam matamur kini, mi timbotmbot ambai su toono ta ni ikam pa wal kini na. Mi zin wal ta Yooba kete malmalŋana kini imbotmbot se kizin na, ni ko ipambiriizi zin ma tila len.

²³Yooba izzo iti tomtom pa zaala kini, mi ipombolmbol ti be toto. Mi tomtom ta so itoto zaala kini, na Yooba ko leleene ambai pini.

²⁴Tomtom ta kembei, sombe itutkat kumbuunu, nako irao imel na som. Pa Yooba itunu ta ikiskisi.

²⁵Indeeŋe ta nio naŋgaŋŋoŋ mi imar ma iŋgi aŋwe kolman i, na aŋre Yooba ipizil ndemeene pizin wal ndeeŋeŋan pasa zen. Mi aŋre wal ndeeŋeŋan lutun bizin tinono ruumu ma tizuŋzuŋ kan kini pasa zen.

²⁶Aigule ta boozomen wal ndeeŋeŋan tikampewe zin tomtom mi tikamam koroŋ pizin sorok. Mi tomtom pakan na tikamam mbun la kizin tomini. Mi lutun bizin tomini tikampewe zin tomtom.

²⁷Pizil ndemem pa mbulu sananŋana, mi kam mbulu ambaiŋana men. Naso mbotmbot ambai su toono ta Yooba ikam pa wal kini na, mi iseeŋge iseeŋge ma ila.

²⁸Pa Yooba, ni leleene pa mbulu ndeeŋeŋana ilip. Tana zin wal ta titoto zaala kini na, ni irao ipizil ndemeene pizin na som. Ko iporoukalkaala zin totomen. Tamen wal sananŋan lutun bizin na, ni ko ipambiriizi zin ma zan imap kat pa toono.

²⁹Mi wal ndeeŋeŋan na, zin ko timbotmbot ambai su toono ta Yooba ikam pa wal kini na, mi iseeŋge iseeŋge ma ila.

³⁰Sua ta iwedet pa tomtom ndeeŋeŋana kwoono na, izzwe i kembei ni tomtom ŋgarŋana. Pa ni izzo pa mbulu ndeeŋeŋana men.

³¹Mi tutu ki Anutu imbotmbot la leleene mi ikamam peeze pini. Tana ni ko irao itop na som.

³²Wal ndeeŋeŋan na, zin wal sananŋan tizaŋzaaŋa zin be tipun zin ma timetmeete.

³³Tamen Yooba itunu ko iporoukaala zin. Irao izem wal kini ila kan koi bizin naman na som. Mi sombe tomtom tipamender zin pa sua na, Yooba ko ilae kizin mi iswe zin kembei len uunu sa isaana som.

³⁴Tana ur nim, zza Yooba, mi to zaala kini. Ni ko ipakuru mi iuru be mbotmbot su toono ta ni ikam pa wal kini na. Mi nu ko re i ipasaana zin wal sananŋan ma tila len.