Mboe 33:2-17

²Kapakur Yooba pa kombom! Kupun koroŋ matakiŋa mi kombo mboe be kapakuri!

³Kombo mboe popoŋana pini. Mi kese kat kombom. Naso kepeŋgeeze mboe. Mi kalŋoyom isala ma kapakuri raama menmeen yom!

⁴Pa sua ki Yooba, ina ŋonoono mi indeeŋe men. Mi uraata kini ta boozomen izzwe kembei ni itoto sua kini.

⁵Ni leleene ilip pa mbulu ta ndeeŋeŋana mi ambaiŋana. Mi mbulu kini ta itoto sua kini mi iurur leleene pa wal kini, ina ni izzwe ma irao toono ta boozomen.

⁶Muŋgu, Yooba iur sua men mi saamba ipet. Kwoono iso sua men, mi koroŋ ta boozomen ki saamba tipet.

⁷Tai ta biibi i, ni ilup ma imbot la mbata, kembei ta tomtom tikut tai ila tai putuunu na. Mi tai ta imbot la mozo lukutuunu na, ni ikes la tai putuunu kini, mi iur lae ma imbotmbot.

⁸Niom tomtom ta karao pa toono na, komoto Yooba mi keleŋ la kalŋaana. Niom iwal karkari kapakuri mi kopou i!

⁹Pa ni iso sua men, mi saamba ma toono tipet. Iur sua mi koroŋ ta boozomen tipet ma timbot la murinmurin.

¹⁰Zin karkari lelen iurur pa mbulu boozo tabe tikam. Tamen Yooba ikamam ma ŋgar kizin tana iurur ŋonoono som. Tana ŋgar kizin ko iwe koroŋ sorok.

¹¹Mi Yooba, ni mbolŋana. Tana tomtom sa irao izooro ŋgar kini na som. Sombe leleene iur pa ŋgar sa, na ŋgar tana ko imbol mi imbotmbot ma alok. Mi ŋgar ta so leleene iur pa, inako ipiyooto ŋonoono tabe imbotmbot ma alok.

¹²Zin wal ta timbesmbeeze pa Yooba na, ni itunu ta ipeikat zin, mi ikam zin ma tiwe lene. Tana lelen ambai pa kampeŋana kini ta ise kizin na.

¹³Yooba, ni imbotmbot saamba, mi mataana isu ma irre zin tomtom ta timbotmbot toono na.

¹⁴Ni imbotmbot sala muriini peeze kana, mi mataana ikamam zin karkari ta boozomen.

¹⁵Ni itunu ta iur tomtom ta boozomen lelen. Mi mbulu boozomen ta tikamam na, ni iute lup.

¹⁶King sa sombe imbol se wal kini malmal kan men, nako irao som. Mi tomtom malmal kana ta mburaanaŋana i ta kembena. Sombe ipase pa itunu men, nako irao som.

¹⁷Mi hos malmal kan tomini, sombe tomtom tiur matan pizin be tiuulu zin ma tilip pa malmal, nako tiur matan sorok. Pa hos mburan irao be ikamke zin na som.