Mboe 31:2-23

²Ŋgun talŋom pa suŋŋana tio, mi loŋa men tatke yo pa pataŋana tio ti! Pa nu tuŋ ŋonoono. Nu pombolmbol yo mi poroukalkaala yo. We kembei siiri mbolŋana kat pio be aŋke lela. Naso aŋbot ambai, mi kosa sa ko irao be ipasaana yo som.

³Pa tuŋ ŋonoono ta nu. Nu pombolmbol yo mi poroukalkaala yo. Mi nu we kembei siiri mbolŋana pio. Tana muuŋgu pio mi so yo pa zaala tabe aŋto. Pa mbulu ku na, ta kembena.

⁴Pazal yo: Kokena kilis ta koŋ koi bizin tiur pio na ikeene yo. Pa nio aŋpase pu be poroukaala yo.

⁵Yooba, nu motom iŋgalŋgal sua ku mi toto. Tana iŋgi aŋur ituŋ ima nomom be kamke yo.

⁶Zin wal tau timbesmbeeze pa zin merere pakaamŋan ta ŋonon somŋan i, na nio aŋurur koi pizin. Mi aŋpase pa nu itum tamen tau.

⁷Pataŋana tio ti, nu re kek. Mi nu ute: Leleŋ na, ipata ma ipata kat. Tamen nu toto sua ku mbukŋana mi urur lelem pa wal ku. Tanata leleŋ ambai mi menmeen yo biibi.

⁸Pa nu zem yo la koŋ koi bizin naman na som. Nu ur zaala pio, tana iŋgi aŋbot ambai.

⁹Yooba, muŋai yo lak! Pa nio mbesooŋo ku tau. Mi iŋgi pataŋana biibi indeeŋe yo. Mi leleŋ ipata, mi aŋtaŋ ma biibi mi motoŋ izarzar. Tabe ikam ma mburoŋ imap kat.

¹⁰Nio aŋyamaana kembei mboti tio ambai som kat. Pa leleŋ ipata ma aŋsaana kat. Iŋgi aŋkaraŋeeze pa pataŋana tio mi mburoŋ imap. Tana niŋ mburaana pa koroŋ sa kamŋana mini som.

¹¹Koŋ koi bizin ta boozomen matan repiili yo lup. Mi waeŋ bizin na, sombe tire yo na timoto. Tabe timbotmbot molo pio. Sombe tindeeŋe yo su zaala lwoono, na tikowo pio.

¹²Zin matan iŋgalŋgal yo mini som. Tire yo kembei aŋmeete kek. Nio iŋgi kembei kuuru ta imapaala mi tipiri ila lene.

¹³Nio aŋbotmbot raama motoŋana biibi. Pa aŋleŋleŋ wal boozomen timburmbuuru pio. Zin tilup zin mi tirru zaala be tipun yo ma aŋmeete.

¹⁴Tamen Yooba, nio aŋpase pu, mi aŋso: “Nu ta Anutu tio.”

¹⁵Iŋgi aŋur ituŋ ima nomom tau. Tatke yo la koŋ koi bizin mi zin tau tiseseeze motoŋ i naman.

¹⁶Pa nio mbesooŋo ku tau. Tana swe itum ramaki muŋaiŋana ku pio, mi kam mat ku ma iyaara pio. Pa nu muŋaiŋana katuunu mi toto sua ku. Tana kamke yo.

¹⁷Yooba, nio aŋtaŋroro u be uulu yo: Kokena koŋ koi bizin tilip pio, to koŋ miaŋ. Tana koto zin wal sananŋan. Pun mburan ma imap kat, mi piri zin sula Andewa. Naso kan miaŋ, mi timaane men.

¹⁸Mi zin wal pakamkaamŋan ta tipakurkur zitun, mi tigibgiibi sua sananŋana pizin wal ndeeŋeŋan, mi tipasomsom zin na, pumun kwon.

¹⁹Yooba, kampeŋana ku na biibi kat. Zin wal ta timototo u mi tileŋleŋ la kalŋom na, nu ur len koroŋ ambaimbaiŋan boozomen ma imbotmbot lae be kam pizin. Zin wal ta so tipase pu be we ur pizin mi menderkaala zin na, nu ko kampe zin ila iwal biibi matan.

²⁰Zin ko timbot ambai paso, nu mbotmbot raama zin mi we ur pizin. Tana kan koi bizin mi zin wal sananŋan ta timburmbuuru kan, nako tirao be tikam kosa sa pizin na som. Pa nu ko poroukaala zin. Tana sua sananŋana ta kan koi bizin tiwirri pizin, nako irao be ipasaana zin na som.

²¹Nio aŋpakur Yooba! Pa indeeŋe ta koŋ koi bizin tiliu yo be tikam malmal pio na, ni iswe muŋaiŋana biibi kat pio mi iuulu yo.

²²Nio aŋmoto mi aŋso ko ni iziiri yo ma aŋbot molo pini. Tamen som. Aŋtaŋroro i be iuulu yo, mi ni ileŋ tiŋiizi tio mi ikamke yo.

²³O niom wal ki Yooba ta kototo zaala kini na, kuur leleyom ila kini! Pa zin wal ta titoto kalŋaana na, ni ko mataana pizin ma timbot ambai. Mi zin ta tizorzoori mi tipakurkur zitun na, ni iurur kadoono pizin ma ikot mbulu kizin.