Text copied!
CopyCompare
Anutu Sua Kini Potomaxana - Mboe - Mboe 22

Mboe 22:8-27

Help us?
Click on verse(s) to share them!
8Tizzo ta kembei: “Nu so nu pase pa Yooba tau. Ambai. Mbot mi re ten. Ko itatke u pa pataŋana taiŋgi, som som? Kozobe ni leleene pu, so ikamke u kek!”
9Yooba, nu itum ta pazal zaala pio, mi anaŋ ikam yo ma aŋsu. Mi indeeŋe ta nio pikin siŋsiŋŋoŋ mi imar na, nu mborro yo ma aŋbot ambai.
10Pa indeeŋe ta anaŋ ikam yo ma aŋsu na, nu kam yo ma aŋwe lem. Tana ta muŋgu mi imar na, nu Anutu tio.
11Tana mbot molo pio pepe. Pa iŋgi aŋbot la pataŋana leleene. Mi leŋ tomtom sa be iuulu yo som.
12Iŋgi koŋ koi bizin timar ma tiliukaala yo, kembei makau saŋsaŋŋan ki toono pakaana ki Basan ta mburanŋan na.
13Mi kwon ikakaaga mi zoŋon izirzir mar pio. Kalŋan izalla pio kembei laion ta petel zin mi tirru kan buzur.
14Tana kuliŋ imetmeete, mi tiroŋ imukurkur lup. Mi aŋmoto ma ŋgelbuk ileege yo.
15Mburoŋ ta imap kat. Mi ŋgureŋ na, ikerekere lup. Kauziŋ imamaaza, mi mioŋ isekap sala koŋ galablaaba. Pa nu zem yo ma iŋgi be aŋsula leŋ naala i.
16Iŋgi wal sananŋan timar ma tiliu yo kek. Zin kembei me saŋsaŋŋan ta dudut ma timar, mi tiŋaŋa mare pa kumbuŋ mi nomoŋ.
17Wal tina tire yo na, lelen ambai. Pa nio tiroŋ men ma ruŋguŋ isaana kat.
18Mi tiparrai mburu tio ma len len.
19Yooba, nio aŋkamam mburoŋ se ku tau. Tana mbot molo pio pepe. Loŋa mar mi uulu yo!
20Pa nio aŋbot la zaaba kwoono kek. Tana kamke yo lak. Kokena me saŋsaŋŋan taiŋgi tipasaana yo pa mburan.
21Re. Laion taiŋgi tikamam be tikan yo. Mi makau saŋsaŋŋan taiŋgi tikamam be tikuruumu yo pa kan kandaara. Loŋa mi tatke yo pizin! A buri. Nu leŋ yo kek!
22Nio ko aŋsoyaara urum pizin toŋmatiziŋ tio. Sombe wal ku tila tilup zin pa suŋŋana, nako aŋgaaba zin mi aŋwit urum.
23Niom wal ta so komototo Yooba mi keleŋleŋ la kalŋaana na, kapakuri. Niom ta Yakop popoŋana kini na, kiwit uruunu. Niom Israel ta boozomen, komoto i.
24Pa wal ta so timbotmbot raama pataŋana, na ni irepiili zin som, mi ipizil ndemeene pizin som. Indeeŋe nio aŋtaŋroro i na, ni ipiŋgis mataana pio som. Ileŋ tiŋiizi tio mi iuulu yo.
25Yooba, sombe zin iwal biibi tilup zin pa suŋŋana, na nio ko aŋwe kwom mi aŋpakuru pa mbulu ta kam pio na. Nio ko aŋto sua tio mbukŋana, mi aŋkam patoronŋana pu ila zin wal ta timototo u na matan.
26Zin wal tau timbot ŋoobo, nako tikan kat kan kini ma kopon isaana. Mi zin wal tau tikam kinkiini be tiute Yooba mi timbot kolouŋana pini, nako tiwit uruunu. Pa ni ko ikampe zin ma timbot ambai, mi iseeŋge iseeŋge ma ila.
27Toono ta boozomen ka tomtom bizin ko timap ma matan iŋgal Yooba. Karkari ta boozomen ko titooro zin mi timar kini. Zin tau kulin pareiŋan, mi timar pa so kar i, nako timap mi tilek kumbun pini.

Read Mboe 22Mboe 22
Compare Mboe 22:8-27Mboe 22:8-27