Mboe 19:9-14

⁹Tomototo Yooba mi teleŋleŋ la kalŋaana, to ambai. Pa mbulu ta kembei, ina iŋgeeze men. Mi ko imbotmbot ma alok. Tutu ta Yooba iur na, itortooro som. Imbol ma imbotmbot. Tana irao tendemeere mi tapase pa. Mi tutu tana indeŋdeeŋe men.

¹⁰Ŋonoono, iti tere pat gol kembei koroŋ zaanaŋana. Tamen sua ki Yooba ilip pa. Gol boozomen ta iŋgeeze kat i, na sa ilip pa Yooba sua kini som. Mi bigil suruunu ta kembena. Inamut kat. Tamen sua ki Yooba na, inamut ma ilip.

¹¹Yooba, nio mbesooŋo ku. Mi sua ku ta iurur mat pio. Nio sombe aŋto sua tana, inako aŋkam leŋ kadoono ambaiŋana kat.

¹²Lak, asiŋ ta irao be ikilaala itunu sosor kini ta boozomen? Som. O Yooba, sanaana tio ta aŋkilaala som mi aŋkam sorok ma ila kek na, muŋai yo mi ziiri ma ila lene.

¹³Mi sanaana ta aŋkilaala zin na, uulu yo be aŋkam mini pepe. Kokena aŋwe mbesooŋo pa. Naso aŋkam zooroŋana biibi pu som, mi leŋ uunu sa isaana pa motom som.

¹⁴Yooba, nu ta ulaaŋa tio, mi tuŋ ŋonoono. Pa nu pombolmbol yo mi tatkewe yo pa pataŋana tio. Tana sua ta ipet pa kwoŋ, mi ŋgar ta imbot la leleŋ i, na leleŋ be aŋkam ma ambai men pa nu motom.