Mboe 18:14-44

¹⁴Mi ipeene ka koi bizin pa peene lutuunu kini ma tiko papirik. Ikam ma lolo iwenweene. Mi ka koi bizin tire, to motoŋana biibi ikam zin ma tiko.

¹⁵Yooba, indeeŋe ta nu yespokpok zin mi swe ketem malmalŋana pizin na, miiri biibi iyooto pa kuzum, mi iwilaala tai ma ipei maaŋga ma ise mat. Mi itooro toono tomini ma meleebe kana ise mat.

¹⁶To Yooba imbot kor, mi isara namaana isu mi iteege yo. Mi iweene yo ma aŋse pa mozo lukutuunu.

¹⁷Koŋ koi bizin ta mburanŋan i, ni itatke yo la naman. Zin wal tau tiur koi pio mi mburan ilip pio na, ikamke yo pizin.

¹⁸Indeeŋe ta aŋbotmbot la pataŋana leleene na, zin timaŋga pio. Tamen Yooba, ni isilou yo,

¹⁹mi iur leŋ zaala be aŋyooto pa pataŋana leleene mi aŋbot mat. Pa ni leleene pio ilip, tanata ikamke yo.

²⁰Nio aŋkamam mbulu ndeeŋeŋana, tanata Yooba leleene pio mi ikampe yo. Ni ikam leŋ kadoono ambaiŋana paso, leŋ uunu sa isaana som.

²¹Pa aŋtoto zaala ki Yooba. Irao aŋkam mbulu sananŋana mi aŋpizil ndemeŋ pa Anutu tio na som.

²²Nio motoŋ iŋgalŋgal tutu kini ndeeŋeŋan ta boozomen. Tutu kini ta tibeede pataaŋa kek na, aŋzooro som.

²³Tana leŋ uunu sa isaana pa ni mataana na som. Pa motoŋ ŋgalŋgal ituŋ, tana aŋpa ŋoobo pa zaala kini som.

²⁴Nio aŋkamam mbulu ndeeŋeŋana mi ŋgeezeŋana men pa ni mataana. Tanata ni leleene pio mi ikam leŋ kadoono ambaiŋana.

²⁵Yooba, sombe tomtom sa iurur leleene pu mi itoto mbulu ku, na nu ko to sua ku mbukŋana mi motom pini. Tomtom ta so le uunu sa isaana pa motom som, na nu ko kampe i.

²⁶Mi tomtom ta so mbulu kini iŋgeeze men, na nu ko kam mbulu ŋgeezeŋana pini. Tamen zin wal ta len ŋgar biibi pa mbulu pakaamŋana na, nu tomini lem ŋgar be pokot mbulu kizin.

²⁷Tana wal ta so timbotmbot raama pataŋana na, nu kamkewe zin. Mi zin ta tipakurkur zitun na, nu kototo zin.

²⁸Yooba, nu ta urur mat pio mi uluulu yo ma aŋbot ambai. Anutu tio, nu ziiri zugut ma ila lene mi kam mat ku ma iyaara pio.

²⁹Nu gabgaaba yo, tana aŋporou raama koŋ koi bizin boozomen mi aŋlip pizin. Anutu tio, ni imbotmbot raama yo. Tana siiri mbolŋana ki koŋ koi bizin, ina irao be ipakaala yo na som.

³⁰Anutu taiŋgi, zaala kini ambai komboono. Mi sua kini, ina ŋonoono men. Irao tapase pa mi tuurla kat. Wal boozomen ta so tipase pini be iwe ur pizin mi imenderkaala zin na, ni iwe siŋgiao pizin.

³¹Yooba itutamen ta Anutu ŋonoono. Anutu toro sa som. Mi ni tundu ŋonoono. Pa ipombolmbol ti mi iporoukalkaala iti.

³²Ni ipombolmbol yo pa itunu mburaana, tana aŋmendernder mbolŋana. Mi ni mataana pio pa pai tio, mi ipazalzal yo.

³³Ni ikam ma kumbuŋ isekapkap, tana aŋrao be aŋpa pa lele abalabalŋana. Irao kumbuŋ giris ma aŋtop na som.

³⁴Mi ni ipaute yo pa mbulu ki malmal, mi ipakeke nomoŋ be aŋdaada peene naana kekeŋana.

³⁵Yooba, nu we siŋgiao pio mi kamkewe yo. Mi nomom woono ta isilou yo. Nu uulu yo, tana zoŋ iwe biibi.

³⁶Mi nu urpe kumbuŋ muriini bekena aŋmender mbolŋana mi aŋkam malmal. Tana aŋtop som.

³⁷Nio aŋketo koŋ koi bizin mi aŋse kizin na, aŋmiili karau som. Aŋteege zaaba pizin ma timap. Aŋzem tasa ma imborene som.

³⁸Nio aŋkazas zin ma titoptop su kereŋ uunu, mi aŋpadagdaaga zin ma irao timaŋga mini som.

³⁹Pa nu kam leŋ mburoŋ. Tanata aŋmender mbolŋana pa malmal, mi aŋlip pa koŋ koi bizin ma tilek kumbun pio.

⁴⁰Nu ta kam ma koŋ koi bizin tiko pio. Tana zin wal ta tiur koi pio na, aŋkas zin ma timap kat.

⁴¹Zin tiboobo pa len ulaaŋa. Tamen ulaaŋa sa imar pizin som. Titaŋroro Yooba, mi ni ileŋ tiŋiizi kizin som.

⁴²Nio aŋpalamusmuuzu zin ma tiwe kembei ululu ta miiri iwilaala ma ila lene. Aŋpadagdaaga zin kembei tiŋtiiŋgi ta imbotmbot su zaala i.

⁴³Tomtom timaŋga be tizooro yo, mi nu kamke yo. Mi ur yo ma aŋwe biibi be aŋkam peeze pizin karkari. Toono pakan kan tomtom bizin ta aŋute zin som, ta timar timbot la kopoŋ mbarmaana mi timbesmbeeze pio i.

⁴⁴Sombe tileŋ sua tio, na loŋa men mi tito. Mi tipakur yo mi tilek kumbun pio.