Mboe 17:1-14

¹Mboe ki Dabit O Yooba, nio leŋ uunu sa isaana som. Tana ŋgun talŋom pa bobi tio. Leŋ tiŋiizi tio ti mi uulu yo. Pa iŋgi aŋkam pakaamŋana pa som. Aŋso kat sua raama leleŋ.

²Nu rre koroŋ ta boozomen. Mi nu ute: Nio tomtom ndeeŋeŋoŋ. Tana mender pio mi so zin tomtom ta kembei: Nio leŋ uunu sa isaana som.

³Nu ute leleŋ kek. Pa mbeŋ na, mar mi tiiri yo. Nu toombo yo na, ndeeŋe mbulu sananŋana sa imbot la leleŋ som. Pa ŋgar tio imbol be kwoŋ isosor som.

⁴Mi aŋkam mbulu sananŋana kembei ta zin wal pakan na som. Pa motoŋ iŋgalŋgal sua ku. Tana zin wal zigzikŋan ta tikamam zaaba pizin tomtom i, na aŋto zin pa mbulu kizin som.

⁵Aŋtoto zaala ku men. Aŋzem risa som, aŋpa ndel pa som.

⁶Anutu, nu leŋleŋ suŋŋana tio. Tana aŋboobu be uulu yo. Ŋgun talŋom pio, mi leŋ sua tio ti.

⁷Nu toto sua ku mbukŋana mi urur lelem pa wal ku. Tana swe muŋaiŋana ku, mi kam uraata bibip be uulu yo. Pa zin wal ta so tipase pu be we ur pizin mi menderkaala zin, na nomom woono ikamkewe zin pa kan koi bizin naman ma timbot ambai.

⁸Nio na, itum koroŋ ku ŋonoono. Tana motom pio mi kuubukaala yo kembei ta man ikuubukaala lutuunu bizin.

⁹Pa koŋ koi bizin tiliu yo i. Iŋgi wal sananŋan tikamam be tipasaana yo.

¹⁰Wal tana lelen imun kek. Mi kalŋan izalla ma tipakurkur zitun.

¹¹Tito yo mi timar tise tio kek. Mi tiliu yo mi matan iurur be tipalkeete yo su toono i.

¹²Zin kembei laion ta peteli mi irru ka buzur. Zin kembei laion popoŋana tau ikewe la su leleene, mi izza ma imbotmbot.

¹³Yooba, maŋga lak! Muuŋgu pio mi koto koŋ koi bizin. Kas zin pa buza ku ma tisu lup.

¹⁴Zin na, tire koroŋ ki toono kembei koroŋ kizin ŋonoono kat. Swe mburom pizin, mi pun zin ma timap. Tamen wal ku ta nu lelem pizin ilip na, nu pututu zin mi tikanan ma kopon isaana. Mi lutun bizin na, tirao kat pa koroŋ ta boozomen. Tabe tindoundou koroŋ boozo pa lutun bizin tabe tipet pa kaimer i.