Mboe 16:2-10

²Nio aŋso pa Yooba ta kembei: “Nu ta Merere tio. Koroŋ tio ambaimbaiŋan ta boozomen na, nu ta kam pio.”

³Mi wal ku potomŋan ta timbotmbot su toono na, aŋre zin kembei wal ndabokbokŋan. Tana leleŋ ambai kat pizin mi aŋso aŋbotmbot raama zin.

⁴Tamen zin ta timbesmbeeze pizin merere pakaamŋan, nako tindeeŋe pataŋana boozo. Nio ko aŋgaaba zin pa patoronŋana ta tikamam pa merere kizin na som. Mi irao kwoŋ ipaata merere kizin zan, som aŋpakur zin na som.

⁵Tamaŋ bizin tikam leŋ toono pakaana ambaiŋana be aŋbot se ki. Mi nio aŋre Yooba kembei koroŋ tio ŋonoono ma ilip pa toono tana. Pa ni ikampewe yo mi aŋbotmbot se kini pa koroŋ ta boozomen. Tana nio ko aŋbot ambai men. Pa ni ta ikiskis yo i.

⁶Lele pakaana ta Yooba ipemet pio, ina ambaiŋana. Mata muriini ta ni ikam pio na, nio aŋre kembei ndabokŋana kat mi leleŋ pa ilip.

⁷Nio aŋpakur Yooba. Pa ni ikamam peeze pio mi ipazalzal yo. Mbeŋ na, ŋgar ta ni iur la leleŋ i, izzo yo pa zaala kini.

⁸Nio motoŋ iŋgalŋgal Yooba totomen. Mi ni imbotmbot raama yo mi ikiskis yo. Tana kosa sa ko irao be ikam yo ma aŋtop na som.

⁹Iŋgi tabe ikam ma leleŋ ambai kat mi menmeen yo. Pa kosa sa ko irao be ipasaana yo na som.

¹⁰Mi nu irao zem yo ma aŋmeete mi aŋsula Andewa be aŋbot na som. Nio aŋurur leleŋ pu mi aŋtoto mbulu ku. Tana nu rao zem yo ma aŋsaana sula naala ta usomŋana i na som.