Mboe 145:3-15

³Yooba, ni ta biibi ŋonoono. Takam ŋgar pini na tarao som. Tanata tomtom tiwidit uruunu ma isala kor kat! Pa ni biibi kat.

⁴Tomtom ko tipepeebe len kelŋan, mi tiwidit urum pa uraata ku ndabokbokŋan, mi tizzo zin pa. Ko tizzo zin pa mos ku mburanŋan ma tileŋleŋ. Naso zin tomini tipakurkur zom, mi iseeŋge iseeŋge ma ila.

⁵Ko tizzo pa mburom, zom biibi, mi azuŋka ku ta ilip kat. Mi nio ta kembena. Leleŋ be aŋkamam ŋgar pa uraata ku ndabokbokŋan ta ipa ndel kat.

⁶Tomtom ko tizzoyaryaara uraata ku mburanŋan ta tomtom tire ma timoto na. Mi nio ko aŋzzoyaryaara zom biibi.

⁷Tomtom ko matan iŋgalŋgal kampeŋana ku biibi mi tizzoyaryaara uruunu. Ko kalŋan izalla mi timbombo mboe pa mbulu ku ndeeŋeŋana.

⁸Pa Yooba, ni leleene izanzaana pizin mbesooŋo kini, mi imuŋaiŋai zin mi ikampewe zin. Ni keteene malmal karau som. Mi itoto sua kini mbukŋana mi iurur kat leleene pa wal kini.

⁹Yooba, ni ikamam mbulu ambaiŋana pa tomtom ta munŋaana men. Mi leleene izanzaana pa koroŋ boozomen ta itunu iur zin na.

¹⁰O Yooba, koroŋ boozomen ta itum ur zin, nako timap ma tipakur zom. Mi wal ku ta tiurur lelen pu mi titoto mbulu ku, nako lelen ambai pu mi tipakuru pa kampeŋana ku.

¹¹Ko tizzo pa peeze ku ta mburaanaŋana mi ndabokŋana kat na. Mi tiwidit mbol pa mburom biibi.

¹²Naso tomtom ta boozomen tiute ta kembei: Nu kamam uraata mburanŋan. Mi peeze ku ta kembena. Mburaanaŋana mi ndabokŋana kat.

¹³Peeze ku ko iseeŋge iseeŋge ma ila. Koroŋ ta boozomen ko timbotmbot la kopom mbarmaana, mi nu mborro zin ma alok. Yooba itoto sua kini mbukŋan ta boozomen. Uraata kini ta boozomen iswe i kembei ni itoto sua kini mbukŋana mi iurur leleene pa wal kini.

¹⁴Zin wal ta so pataŋana ipun zin ma mburan imap na, ni iuluulu zin. Mi wal boozomen ta pataŋana ikototo zin na, ni isilou zin.

¹⁵Koroŋ matan yaryaaraŋan ta boozomen tiurur matan pu. Pa sombe petel zin, na nu kamam kan kini. Nu welweele nomom be pututu zin, mi zin ta boozomen tikan ma tirao.