Mboe 135:9-21

⁹Mi ikam mos mi uraata bibip isu Aikuptu, bekena iseeze king kizin ziŋan mbesooŋo kini ta boozomen matan.

¹⁰Ni ta ikasgeege zin karkari boozomen, mi ipun zin king mburanŋan ma timetmeete.

¹¹Ipun Sihon ta king kizin Amor na, Og ta king ki Basan na, mi king ta boozomen ki toono Kanaan.

¹²Mi ikam toono kizin pa wal kini Israel ma iwe len be timbotmbot pa, mi iseeŋge iseeŋge ma ila.

¹³O Yooba, zom biibi ko imbotmbot ma alok! Tomtom ko tipepeebe len kelŋan, mi matan iŋgalŋgal uraata ku mi tizzoyaryaara urum, mi iseeŋge iseeŋge ma ila.

¹⁴Pa Yooba imendernder pa wal kini mi iurur kadoono pa kan koi bizin. Mi leleene izanzaana pa zin mbesooŋo kini.

¹⁵Zin merere kizin karkari na, tomtom tiurpewe zin pa silba mi gol. Merere ta kembei na, tomtom naman muriini men.

¹⁶Zin kwon mi matan. Tamen tirao be tiso sua som, mi tire lele som.

¹⁷Zin talŋan. Mi tirao be tileŋ sua som. Mi miiri sa iwedet pa kwon som. Paso zin matan yaryaaraŋan som.

¹⁸Tana zin wal ta so tiurpe merere pakaamŋan mi tipase pizin, nako len mburan sa som, mi tiwe koroŋ sorok kembei ta merere kizin.

¹⁹O niom iwal biibi ki Israel, kapakur Yooba pa kampeŋana kini! Mi niom patoronŋana koyom ta popoŋana ki Aron na tomini, kapakur Yooba pa kampeŋana kini!

²⁰Mi niom popoŋana ki Lebi ta ku'uluulu uraata ki urum na, ta kembena. Kapakur Yooba pa kampeŋana kini! Tana niom wal ta komototo Yooba mi keleŋleŋ la kalŋaana na, niom ta boozomen kapakuri pa kampeŋana kini.

²¹Yooba muriini imbotmbot ta Yerusalem. Tana niom wal ta kombot su Sion na, kapakuri pa kampeŋana kini! Haleluya!