Text copied!
CopyCompare
Anutu Sua Kini Potomaxana - Mboe - Mboe 119

Mboe 119:34-172

Help us?
Click on verse(s) to share them!
34Kam leŋ ŋgar pa sua ta nu kam piam. Naso motoŋ iŋgalŋgal, mi aŋtoto raama leleŋ.
35Pazal yo be aŋto zaala ki tutu ku. Pa zaala tana, ta ko ikam yo ma leleŋ ambai kat.
36Zaala ta nu ur pa wal ku na, kam yo ma aŋur kat leleŋ pa ka tutu. Kokena motoŋ koroŋŋoŋ mi aŋru zaala be aŋdoundou leŋ koroŋ boozo.
37Kam yo ma aŋpiŋgis motoŋ pa koroŋ soroksorok ki toono ta ŋonon somŋan i. Pombol yo be aŋto zaala ku. Naso kam yo ma aŋbot ambai mini.
38Nio mbesooŋo ku tau. Tana motom iŋgal sua ta mbuk pio na, mi kam ma iur ŋonoono. Sua tana, nu kam pa wal boozomen ta timototo u mi tileŋleŋ la kalŋom na.
39Nio aŋmoto sua repiiliŋana mi pamiaŋŋana ki koŋ koi bizin. Tana piŋgis sua kizin tana pio. Pa kadoono ta urur pizin tomtom, ina indeŋdeeŋe men.
40O Yooba, nio leleŋ ilip pa sua boozomen ta ur na. Tana to mbulu ku ndeeŋeŋana, mi uulu yo ma aŋbot ambai mini.
41O Yooba, nu toto sua ku mbukŋana mi urur lelem pa wal ku. Swe mbulu ku tana pio. To itum kalŋom, mi kamke yo.
42Naso aŋrao be aŋpekel sua repiiliŋana ta tomtom tiwirri pio na. Pa nio aŋpase pa sua ku.
43Nio aŋurur motoŋ pu be to tutu ku ndeeŋeŋan mi uulu yo. Naso aŋwit urum pa mbulu ku ta zzo sua ŋonoono men mi toto sua ku. Tana re: Kokena uulu yo som, to aŋrao aŋso sua sa mini pa mbulu ku tana som.
44Sua ta nu kam piam na, nio ko aŋtoto totomen.
45Nio aŋkam kinkiini be aŋto sua boozomen ta nu ur na. Tana kosa sa ko irao be ipakaala zaala pio mini na som.
46Nio ti aŋmoto som, mi koŋ miaŋ pizin tomtom som. Zaala ta ur pa wal ku na, nio ko aŋsoyaara ka tutu ila zin king keren uunu.
47Pa tutu ku ta ikam yo ma leleŋ ndabok kat. Tana leleŋ pa ilip.
48Nio aŋwit nomoŋ isala, mi aŋpakuru pa sua ku. Mi motoŋ lala pa tutu ku ta tibeede pataaŋa kek na, mi aŋkamam ŋgar pa.
49Nio mbesooŋo ku. Tana motom iŋgalŋgal sua ku mbukŋana ta kam pio na. Pa ina ipombolmbol yo be aŋur motoŋ pu mi aŋsa ulaaŋa ku.
50Sombe pataŋana ikam yo, na sua ku ko iuulu yo be aŋbot ambai. Ŋgar tana, ta ipotor leleŋ.
51Zin wal ta tipakurkur zitun mi tirepilpiili Anutu na, timbel sua repiiliŋana pio. Tamen sua ta nu kam piam na, aŋzem som.
52O Yooba, nio motoŋ ŋgalŋgal tutu ku ndeeŋeŋan ta ur muŋgu kek na. Tabe ipombol yo mi ipotor leleŋ.
53Nio, sombe aŋre zin wal sananŋan tipizil ndemen pa sua ta nu kam piam, ina ikam yo ma keteŋ malmal kat.
54Toono ti, kar tio ŋonoono som. Iŋgi aŋwe leembe pa men. Mi mazwaana ta so aŋbotmbot su toono ti na, nio ko aŋpakurkuru pa tutu ku ta tibeede pataaŋa kek na, mi aŋbombo mboe pa.
55Yooba, mbeŋ tomini, motoŋ iŋgalŋgalu, mi leleŋ be aŋto sua ta nu kam piam na.
56Tana nio aŋkamam ta kembei: Sua boozomen ta nu ur na, motoŋ iŋgalŋgal mi aŋtoto.
57O Yooba, nio aŋre u kembei koroŋ tio ŋonoono. Pa nu kampewe yo, mi aŋbotmbot se ku pa koroŋ ta boozomen. Tana aŋbuk sua pu be aŋto sua ku.
58Iŋgi suŋŋana tio ima ku raama leleŋ: To sua ku mbukŋana, mi kampe yo mi muŋai yo. Pa nio mbesooŋo ku tau.
59Nio aŋkam ŋgar pa zaala ta aŋtoto i, tana aŋtooro yo mi aŋso aŋto zaala ta nu ur pa wal ku na.
60Mi irao aŋnaunau na som. Ko aŋmaŋga mi aŋto tutu ku pataaŋa.
61Zin wal sananŋan tiur kilis boozo be tikeene yo. Tamen motoŋ mbeleele sua ta nu kam piam na som.
62Nio aŋmaŋgaŋga pa mbeŋ lukutuunu, mi aŋpakurkuru pa tutu ku ndeeŋeŋan.
63Zin wal ta timototo u mi tileŋleŋ la kalŋom na, nio leleŋ pizin mi aŋgabgaaba zin.
64O Yooba, mbulu ku ta toto sua ku mbukŋana mi urur lelem pa wal ku, ina nu zzwe ma irao toono ta boozomen. Paute yo pa tutu ku ta tibeede pataaŋa kek na, bekena aŋute kat.
65O Yooba, nio mbesooŋo ku. Mi nu toto sua ku mbukŋana, mi kamam mbulu ambaiŋana pio.
66Paute yo pa ŋgar ku, mi kam leŋ ŋgar ambaiŋana. Pa nio aŋpase pa tutu ku.
67Muŋgu nio aŋpaŋobŋoobo pa zaala ku. Mi nu balis yo mi pazal yo, tana koozi motoŋ iŋgalŋgal sua ku mi aŋtoto.
68Nu ambaiŋom kat. Mi mbulu ta kamam ta kembena, ina ambai men. Paute yo pa tutu ku ta tibeede pataaŋa kek na.
69Zin wal ta tipakurkur zitun mi matan pasomu na, tiŋgalŋgal sua pakaamŋana pio. Tamen nio aŋur leleŋ imap pa sua ta nu ur na, mi motoŋ iŋgalŋgal mi aŋtoto.
70Wal tina len ŋgar somŋan, mi tiyamaana sanaana kizin som. Mi nio na, sua ta nu kam piam, ta ikam yo ma leleŋ ambai kat.
71Pataŋana ta muŋgu ikam yo na, koroŋ ambaiŋana. Pa ipazal yo mi ipei ŋgar tio pa tutu ku ta tibeede pataaŋa kek na.
72Sua ta ipet pa kwom na, nio aŋre kembei koroŋ tio ŋonoono. Ilip pa pat silba mi gol munŋaana ka tieene.
73Itum nomom ta imbuuzu yo mi iur yo. Tana uulu yo be aŋkam kat ŋgar pa tutu ku.
74Zin wal ta timototo u mi tileŋleŋ la kalŋom na, sombe tire yo, na menmeen zin. Paso, aŋpase pa sua ku mbukŋana, mi aŋurur motoŋ pa ka ŋonoono be ipet.
75O Yooba, nio aŋute: Tutu ku mi kadoono ta urur pizin tomtom, ina indeŋdeeŋe men. Mi nu toto sua ku mbukŋana mi urur lelem pio, tanata balis yo mi pazal yo.
76Nio mbesooŋo ku tau. Tana aŋsuŋu be to sua ku mbukŋana, mi swe mbulu ku ta urur lelem pa wal ku mi muŋaiŋai zin na. Naso potor leleŋ mi pombol yo.
77Lelem isaana pio, mi uulu yo ma aŋbot ambai mini. Pa sua ta nu kam piam, ta ikam yo ma leleŋ ndabok kat.
78Zin wal ta tipakurkur zitun mi matan pasomu, nako kan miaŋ. Pa tiŋgalŋgal sorok sua pakaamŋana pio. Mi nio, nako motoŋ lala pa sua boozomen ta nu ur na, mi aŋkamam ŋgar pa.
79Zin wal ta timototo u mi tileŋleŋ la kalŋom, mi tiute tutu ta nu ur pa wal ku na, zin ko timar mi tigaaba yo.
80Nio leleŋ be ŋgar tio iŋgeeze men, mibe aŋto kat tutu ku ta tibeede pataaŋa kek na. Naso koŋ miaŋ pa ituŋ som.
81O Yooba, nio aŋzza u be uulu yo, mi aŋbel naamaŋom kek. Tana mburoŋ imap ma aŋsaana kat. Tamen aŋpase men pa sua ku.
82Nio aŋurur motoŋ pa sua ku mbukŋana be iur ŋonoono. Mi aŋnaama, aŋnaama ma som. Ŋiizi na potor leleŋ ma ambai mini?
83Nio aŋsaana ma tomtom matan mbeleele yo kek. Tamen tutu ku ta tibeede pataaŋa kek na, motoŋ mbeleele som.
84Nio mbesooŋo ku tau. Parei ta nu gedgeede koŋ koi bizin mi tiseseeze motoŋ? Ŋiizi na ur kadoono pizin?
85Re. Zin wal ta tipakurkur zitun mi matan pasomu na, tikel naala pio kek be aŋtop sula. Mi sua ta nu kam piam na, wal tana titoto som.
86Tutu ku ta boozomen na, irao aŋdemeere mi aŋpase pa be iuulu yo. Mi iŋgi tomtom tiseseeze sorok motoŋ. Tana uulu yo lak!
87Pa molo som to tipun yo ma aŋmeete ma aŋmap pa toono. Tamen aŋpizil ndemeŋ pa sua ta nu ur na som.
88Nu toto sua ku mbukŋana mi urur lelem pa wal ku. Tana uulu yo ma aŋbot ambai mini. Naso motoŋ iŋgalŋgal zaala ta nu ur pa wal ku na, mi aŋtoto ka tutu. Tutu tana ipet pa itum kwom tau.
89O Yooba, sua ku ko imbol mi imbotmbot ma alok. Irao imap na som. Pa uunu imbot ta saamba a.
90Tomtom tipepeebe len kelŋan, mi iseeŋge iseeŋge ma ila. Mi mbulu ku ta zzo sua ŋonoono men mi toto sua ku na, ta kembena. Iseeŋge iseeŋge ma ila. Nu ta ur toono ma tuŋ kat, tana imbol ma imbotmbot.
91Pa sua ta nu ur, ta ikiskis koroŋ ta munŋaana men ma timbotmbot murin. Mi koroŋ ta boozomen timbotmbot be timbesmbeeze pu men.
92Sombe leleŋ ilip pa sua ku som, so pataŋana tio ikam yo ma aŋmeete.
93Sua boozomen ta nu ur na, irao motoŋ mbeleele na som. Som ma som kat. Pa sua ku, ta ikam yo ma aŋbot ambai.
94Nio aŋwe lem kek. Tana kamke yo lak! Pa nio aŋkam kinkiini be aŋto sua boozomen ta nu ur na.
95Iŋgi zin wal sananŋan tizaŋzaaŋa yo be tipun yo ma aŋmeete. Tamen nio aŋkamam ŋgar men pa tutu ta nu ur pa wal ku na.
96Nio aŋre koroŋ sa ila ma iwe ambai komboono na som. Pa koroŋ ta boozomen tilala ma timilmiili. Tamen tutu ku na, ambai komboono, mi imbotmbot ma alok.
97Sua ta nu kam piam na, nio leleŋ pa ilip! Tana zoŋ ise ma ila zoŋ isula na, motoŋ ilala pa mi aŋrru ka ŋgar.
98Tutu ku imbotmbot raama yo totomen. Tabe ikam ma ŋgar tio ilip pa koŋ koi bizin ŋgar kizin.
99Mi ŋgar tio ilip pa zin wal ŋgarŋan ta tipaute yo na tomini. Pa zaala ta nu ur pa wal ku na, motoŋ ilala pa ka tutu mi aŋkamam ŋgar pa.
100Mi ŋgar tio ilip pa zin kolman ŋgar kizin tomini. Pa sua boozomen ta nu ur na, motoŋ iŋgalŋgal mi aŋtoto.
101Nio aŋgabiizi ituŋ, mi aŋbotmbot molo pa zaala sananŋan ta boozomen, bekena aŋto sua ku.
102Tana aŋpizil ndemeŋ pa tutu ku ndeeŋeŋan som. Pa nu itum ta paute yo pa tutu tana.
103Bigil suruunu inamut. Mi sua ku na, inamut kat. Ilip pa bigil suruunu.
104Sua boozomen ta nu ur na, iuluulu yo be aŋkam ŋgar ambaiŋana. Tana aŋurur koi pa mbulu boozomen ta iyaryaaru yo be aŋpizil ndemeŋ pu.
105Sua ku, ta iurur mat pio kembei ta kai i, mi izzo yo pa zaala tabe aŋto.
106Nio aŋbuk sua pu, mi aŋpombol ma imbol kat, be aŋto tutu ku ndeeŋeŋan.
107O Yooba, iŋgi pataŋana biibi kat indeeŋe yo. To sua ku mbukŋana, mi uulu yo ma aŋbot ambai mini.
108Nio leleŋ be aŋpakuru mi sua tio iwe kembei patoronŋana ta nu lelem pa i. Paute yo pa tutu ku ndeeŋeŋan.
109Gorgori nio aŋbotmbot naala kezeene. Tamen sua ta nu kam piam na, motoŋ mbeleele som.
110Zin wal sananŋan tiurur kilis be tikeene yo. Tamen sua boozomen ta nu ur na, aŋzem som.
111Tutu ta nu ur pa wal ku, ina matamur ambaiŋana ta kam pio. Tana nio ko aŋkiskis ma alok. Pa ina, nio aŋre kembei koroŋ tio ŋonoono, mi ikam ma leleŋ ndabok kat.
112Tutu ku ta tibeede pataaŋa kek na, nio leleŋ iur be aŋtoto ma irao swoŋ imap.
113Zin wal ta tiur kat lelen pu som, mi titeege tete ru na, leleŋ pizin risa som. Mi sua ta nu kam piam na, leleŋ pa ilip.
114Nu we ur pio be aŋke lela, mi nu we siŋgiao pio mi poroukalkaala yo. Tana aŋpase pa sua ku mi aŋzza be iur ŋonoono.
115Tana niom wal ta kakamam mbulu sananŋana na, koko molo pio. Pa nio leleŋ be motoŋ iŋgalŋgal tutu ki Anutu tio mi aŋtoto.
116O Yooba, to sua ku mbukŋana mi we silou pio. Naso aŋmender mbolŋana mi aŋbot ambai. Kokena aŋur sorok motoŋ pu, to koŋ miaŋ.
117Palot yo, mi tatke yo pa pataŋana tio ti. Naso aŋbot ambai, mi motoŋ iŋgalŋgal tutu ku ta tibeede pataaŋa kek na.
118Wal boozomen ta so tipaŋoobo pa tutu ku ta tibeede pataaŋa kek na, nu pizil ndemem pizin. Pa mbulu kizin pakaamŋana iswe zin kembei tipizil ndemen pa zaala ku kek.
119Zin wal sananŋan ta timbotmbot toono na, nu re zin ta boozomen kembei musmuuzu sorok ta tiwirri ma ila lene. Tana zaala ta nu ur pa wal ku, ramaki ka tutu na, nio leleŋ pa ilip.
120Nio aŋkam ŋgar pu na, kuliŋ imoto. Pa nu potomŋom mi mburom keskeezeŋom. Mi mbulu ku ta urur kadoono pizin tomtom, ina tomini ikam yo ma aŋmoto koŋ.
121Nio aŋkam ŋoobo tomtom sa som. Aŋkamam mbulu ndeeŋeŋana men. Tana zem yo la koŋ koi bizin naman pepe.
122Nio mbesooŋo ku tau. Tana mender pio mi poroukaala yo ma aŋbot ambai. Kokena zin wal ta tipakurkur zitun mi matan pasomu na, tiseeze motoŋ mi tikoto yo.
123Nio aŋurur motoŋ pu be kamke yo, mi aŋbel naamaŋom kek. Ŋiizi na kam mbulu ndeeŋeŋana ta mbuk sua pa na, mi uulu yo?
124Nio mbesooŋo ku. Tana mbulu ku ta toto sua ku mbukŋana mi urur lelem pa wal ku na, swe pio ma aŋre tomini. Mi paute yo pa tutu ku ta tibeede pataaŋa kek na.
125Nio mbesooŋo ku. Tana kam leŋ ŋgar ambaiŋana. Naso aŋkam kat ŋgar pa tutu ta ur pa wal ku na.
126O Yooba, iŋgi tomtom timbel zooroŋana pa sua ta nu kam piam. Tana maŋga mi kam mbulu sa pizin!
127Gol ta iŋgeeze kat, ina koroŋ zaanaŋana mi wal boozomen lelen pa. Tamen nio na, leleŋ pa tutu ku ma ilip pa gol.
128Tana sua boozomen ta nu ur, ta ikamam peeze pio pa pai tio. Mi aŋurur koi pa zaala boozomen ta iyaryaaru yo be aŋpizil ndemeŋ pu.
129Tutu ta ur pa wal ku, ina ndabokŋana kat. Tana motoŋ iŋgalŋgal mi aŋtoto.
130Sua ku, sombe tipeeze, to iur mat pizin tomtom. Mi zin wal tau len ŋgar biibi som na, sua ku iwe zaala pizin be tikam len ŋgar ambaiŋana.
131Nio leleŋ pa tutu ku ilip, kembei tomtom ta miri i pa ka yok.
132Mar lae tio, mi muŋai yo mi kampe yo. Pa ina mbulu ta kamam pa zin mbesooŋo ku tau tiurur lelen pu mi tipakurkur zom.
133Pazal yo pa sua ku. Naso aŋpa pai tio ma ambai men. Kokena mbulu sananŋana sa ikam peeze pio.
134Zin wal ta tiseseeze motoŋ mi tikamam be tikoto yo na, tatke yo la naman. Naso aŋto sua boozomen ta nu ur na.
135O Yooba, nio mbesooŋo ku. Swe itum ramaki kampeŋana ku pio, mi ur mat pio. Mi paute yo pa tutu ku ta tibeede pataaŋa kek na.
136Nio aŋbel tiŋiizi ma motoŋ luluunu izzu. Pa sua ta nu kam piam na, tomtom tito som.
137Yooba, nu ndeeŋeŋom. Mi tutu ku ta kembena. Indeŋdeeŋe men.
138Tutu boozomen ta nu ur pa wal ku, ina indeŋdeeŋe men. Mi tutu tana imbol ma imbotmbot. Itortooro som. Tana aŋro aŋpase pa mi aŋurla kat.
139Nio leleŋ pa sua ku ilip mi aŋkamam kaisiigi pa. Tamen koŋ koi bizin na, tikam ŋgar pa sua ku risa som. Tabe tikam ma leleŋ ibayou kat.
140Niam amre kek. Sua ku, ina ŋonoono men. Tana irao amdemeere mi ampase pa kat. Mi nio ta mbesooŋo ku na, leleŋ pa ilip.
141Ŋonoono, nio tomtom sorokŋoŋ mi tomtom tirepilpiili yo. Tamen sua boozomen ta nu ur na, motoŋ mbeleele som.
142Mbulu ku ndeeŋeŋana ko imbotmbot ma alok. Mi sua ta nu kam piam, ina ŋonoono men. Tana irao aŋdemeere mi aŋpase pa kat.
143Iŋgi pataŋana boozomen isalakaala yo, mi leleŋ ipata kat. Tamen tutu ku, ta ikam ma leleŋ ambai kat.
144Tutu ta nu ur pa wal ku, ina indeŋdeeŋe men, mi imbotmbot ta kembei ma alok. Uulu yo be aŋkam kat ŋgar pa. Naso aŋbot ambai.
145O Yooba, nio leleŋ imap ma aŋtaŋroro u. Leŋ suŋŋana tio mi uulu yo. Mi nio ko motoŋ iŋgalŋgal be aŋto tutu ku ta tibeede pataaŋa kek na.
146Iŋgi tiŋiizi tio ima ku. Tatke yo pa pataŋana tio ti. Mi nio ko motoŋ iŋgalŋgal zaala ta nu ur pa wal ku na, mi aŋtoto ka tutu.
147Zoŋ ise zen, mi aŋmaŋga mi aŋtaŋroro u be uulu yo. Pa nio aŋpase pa sua ku mbukŋana, mi aŋzza be iur ŋonoono.
148Mi mbeŋ tomini na, aŋpamatmaata mi aŋkamam ŋgar pa sua ku.
149O Yooba, nu toto sua ku mbukŋana mi urur lelem pa wal ku. Tana leŋ suŋŋana tio ti. To tutu ku ndeeŋeŋana, mi uulu yo ma aŋbot ambai mini.
150Iŋgi wal sananŋan timar tigarau yo be tipasaana yo. Mbulu kizin ipa ndel kat pa sua ta nu kam piam na.
151Tamen Yooba, nu mbotmbot kolouŋana pio. Mi tutu ku ta boozomen, ina ŋonoono men. Tana irao aŋdemeere mi aŋpase pa kat.
152Zaala ta nu ur pa wal ku na, muŋgu kat nio aŋkilaala ka tutu ta kembei: Ina nu ur be imbotmbot ma alok.
153Yooba, re yo pa pataŋana tio taiŋgi, mi tatke yo pa. Pa sua ta nu kam piam na, motoŋ mbeleele som.
154Mender pio mi uulu yo. Pa iŋgi tomtom tiŋgalŋgal sorok sua pio. Tana to sua ku mbukŋana, mi uulu yo ma aŋbot ambai mini.
155Ulaaŋa ku imbotmbot molo pa zin wal sananŋan. Pa tutu ku ta tibeede pataaŋa kek na, zin tikam kinkiini be tito na som.
156O Yooba, nu lelem izanzaana kat pa zin wal ta timbotmbot raama pataŋana na. Tana to mbulu ku ndeeŋeŋana, mi uulu yo ma aŋbot ambai mini.
157Pa koŋ koi bizin ta tiseseeze motoŋ na, boozo kat. Mi zaala ta nu ur pa wal ku na, aŋzem ka tutu som.
158Nio aŋre zin wal ta tipizil ndemen pu na, leleŋ pizin risa som kat, mi aŋbotmbot molo pizin. Pa zin titoto sua ku som.
159O Yooba, re. Sua boozomen ta nu ur na, nio leleŋ pa ilip. Uulu yo ma aŋbot ambai. Pa nu toto sua ku mbukŋana mi urur lelem pa wal ku.
160Sua ku ka uunu ŋonoono, ina ta kembei: Nu zzo sua ŋonoono men mi toto sua ku mbukŋana. Tana tomtom tirao be tipase pu. Mi tutu ku ta boozomen na, ndeeŋeŋan, mi ko timbotmbot ma alok.
161Zin peeze kan tiseseeze sorok motoŋ. Tamen nio aŋkam ŋgar pizin som. Pa nio aŋmototo u, mi aŋkamam ŋgar pa sua ku.
162Sua ku, ta ikam yo ma leleŋ ambai kat, kembei tomtom ta indeeŋe le koroŋ ta ambaiŋana kat.
163Mbulu pakaamŋan ta boozomen kizin wal ta tipizil ndemen pu na, leleŋ pa risa som, mi aŋurur koi pa. Mi sua ta nu kam piam na, leleŋ pa ilip.
164Nio aŋkamam ŋgar pa tutu ku ndeeŋeŋan. Tana aigule ta boozomen leleŋ ambai pu mi aŋpakurkuru pa lamata mi ru.
165Zin wal ta so lelen ilip pa tutu ku, inako timbot ambai kat. Mi kosa sa ko irao ikam zin ma titop na som.
166O Yooba, nio aŋtoto tutu ku, mi aŋurur motoŋ pu be kamke yo.
167Zaala ta nu ur pa wal ku na, nio leleŋ pa ka tutu ilip. Tana motoŋ iŋgalŋgal mi aŋtoto.
168Nio aŋtoto tutu tana ramaki sua boozomen ta nu ur na. Pa mbulu tio mi pai tio ta boozomen na, nu re ma imap.
169O Yooba, leŋ tiŋiizi tio ti. To sua ku mi kam leŋ ŋgar ambaiŋana.
170To sua ku mbukŋana, ŋgun talŋom pa suŋŋana tio, mi tatke yo pa pataŋana tio.
171Paute yo pa tutu ku ta tibeede pataaŋa kek na. Naso kwoŋ ipakurkuru totomen.
172Nio ko aŋbombo mboe pa sua ku. Pa tutu ku ta boozomen na, indeŋdeeŋe men.

Read Mboe 119Mboe 119
Compare Mboe 119:34-172Mboe 119:34-172