Masatarangana 22:10-29

¹⁰Balamsha; Balak Mowabshuch, Sipor wip k'kuzee kamachtayaru, anoom nuwangaz kamanini atusin kusateeranaya.

¹¹Ambcha kurakash Balakash watsapun Ijiptoshuch tputs shitungeeshinusin, wazapanisin naanaatarandsin, anushsha kuseersin, Balak nuwaa kuruzku, Naanpa, mang átza. Nuwsha amb kuseeri, tputsee tayutaritkachuri, zutakchuri, anush uwshat Balak pachakchusin, tashitungayarusin, anush tsap kasachinllina. ¿Nuw amb ashtachee? tárangu,

¹²Apanllsha Balamaa; Nda, amb shiy naarinllpa. Anpat tputs ipuninllpa. Ambchee tputs mantsir tsiyatinllpa, watam nuw ambchee tputs kapung chinakinawa, tárangiya.

¹³Ashirucha, anuritam putamsha taraseechu, Balam chiyzayaru, k'kuzee kamanimapaneetsi Balakaa tiptsir kamanirangiya. Waana Apanll Taarashipan nuwaa tárangeeja; Shiy amb naarinllpa yap naakchinllina ambi, tárangcha. Ashiri siy saanpeetam tsapunis kanapungsints, tárangiya.

¹⁴Kurakshitisin Mowabshuch, Madiyanshuchtam wapitam yuwari kurak Balak táyaru anuritam kanapuranganaya. Kuseeramchusin, Balamaa kamaniranguni, nda iyapa kusamaam zandarangiya. Kapunguri ngatarangiya, táranganaya.

¹⁵Itaru, Balaksha kurak nda sambaytarangiya. Yusur mishat kurak yamayaru, zanganirangiya yuwanandarisha kurak putiteewa ipuseeru, annandarisha wazapanshitisin naataranganaya.

¹⁶Naayarusin, Balamashsha kuseeramatssin táranganaya; Kurak Balak, Sipor wip shiyaa táranlleeja; Naanpa táranllcha. Nuwap kusamaam ngattapa, átcha.

¹⁷Nuwshat kapungunasha kurakaam ínachima. Yuwangzitam zandku anootstam panachima. Itaru, naanpa. Nuwash kuseeru, ashpari nee tputs tuztaramchu, tputsee ashpari tayutaritaramchu, anush nuwshat amb ashtachima, ambtanda táranllu, kurak Balaka shiyaatsi Balama táranganaya.

¹⁸Itaru, Balamsha; Nduni. Wandtaati kurak Balak nuwaam urkiree mbamashee oroo kurakush pang' kapungush tatsitaru, ashpari in panachinllpa, atitaati, nuw nda, ayu ashiri istachinllpa, nda táchina. Izuuru ngatamari ngatkina. ¿Tamareeja Apanll waana Taarashipan paru, nuw amb ashtachee? tárangu,

¹⁹itaru ashiritaa, nishuri maangimasints ashpartis. Nuwma yasachimasima. Waana Apanll Taarashipan amchimasaja yusurshita, mang tárangu,

²⁰psaansha Apanll Taarashipan Balamaa yakayaru, yusur tsiyatarangiya. Watam shiyangaz tputs naatarandsin kusataranganawa. Ashiriya, shiyshat káyarush, tachiteerush, napashintsi. Itaru, yuwamari nuwaana kamachtarangi anumari shingcha. Aranginaa shirinllpa, tárangiya Apanlli.

²¹Balamsha anuritam putam taraseechu chiyzayaru, uxinashee burrumun ush wayayaru, anumun kuxineeranllu, Mowabshuchish kurak tachiteeranllu,

²²anumun wipunasheemsha tsimbunatam, waanaatsi tiptsir machirangiya. Itaru Apanllsha waa kapung tsiyantarangiya. Ashirucha, Apanllsha waana wasundururee zanganeeru, ngootsip, yap naayaranllu amb apus ngoots apusanand Apanll wan xiyeeru, kámanarangiya.

²³Burrurinshitini Apanllee wan parangiya. Ngoots kámananaru, wachirur uwish payuru, xixeew ashirangiya. Burrsha naamaam xararangu, mzatsipsha ngoots pshtuyaru, naarangiya. Itaru, Balamsha; Natu, wapitam kanapeerush, ngoots watsinsapirisha naangi, tárangu, burrureetsini yasinpat yáyaru stee stee ashirangiya.

²⁴Yusur watsinsaptam naayarandsin, Apanll wan apussha yusur yuwaatssha ngoots shunlli anootssha apusanand kámanayaru xiyarangiya. Yuwaa ngoots kizpur shunlli wingunung patumbichpa kámanamanandari shurangaru, arangtach wing, arangtach wing ashiru, kizarunsha ashirangtamta minungichich ngoots kizarunandari shurangaru, minungichichsha ngoots kizarunatam shuranguru ashiru anoo apusanand Apanll wan kámanarangiya.

²⁵Burrsha iriptaranllu, Apanllee puniku, piyam ktapinganll ashku, patumbchimun ktukamchu, Balam upaz patumbchimun tuw ashirangu, Balamsha yasinpat yaranllu, yusur pzkoorangiya burrureetsini.

²⁶Itaru, Apanllsha yusur imazat sheeranllu, yuwashunasha apus ngoots kizpurinasha shunlli, izuuru minungichich watandaram tawineeru, naamaam pinasinaashtaa, minpiyeemtaati ngoots ktapumaam ndunarirtanashta anu kámanarangu,

²⁷burrsha paranllu, anootsirisha kuxinta sheeru, apusanandarishta ngoots pumayarangiya. Balamsha kapung tsiyantarangu, yasin yarangu, burrureetsini kizpur pzkoorangiya.

²⁸Ashirucha, Apanllsha burroo waana tutsiyatstarangiya, Burrsha: ¿Mayaamsha nuwaa pzkooksha? Na nipat nuwaa tuchip pzkooyanllshawa, tárangiya.

²⁹Balamsha, Yuwamand nuwaa mantsangayarish anumand ashkina. Waanari k'chiru payururi, uru naturi shiyaa k'chirpa kayungataruri, pachayarunll, kasachinlla, tárangiya.