Masatarangana 20:4-25

⁴Ashiriya, siy ¿mayaamsha iyaa Apanllipsha watsapun apusapsha yushindarangsa? Waani ningiri tsipakchusin, wakararinpatari pchinganchina atupsa, ashirangsa.

⁵Iy Ijiptosh tsap ksataa taaranguni, ¿mayaamsha siysat iyaa tashitungayarus, ningeemsha tsap yutaritapsha yushindarangsa? ¿Ashimashtaati tsap tamari maacheetsi tatsumchich? Nish, ¡maachtaw wanus kpayunlleew, kizarunawtam, munllinawtam wanindaja; kungutaa waamaam ndunari! táranganaya.

⁶Móysissha zoonllpa Aaronpa ipuneerandsin, waanitarishtisin Apanllish pang' pshtuyarusin, wanasirimshinung washitungash tutunlltayarusin, tsapush timucheeranganaya. Apanllsha anuritam wizpuree wanasirimshee tuyamandarangiya.

⁷Apanll Móysisaa;

⁸Natu tushuwshish yángi. Zuwanllshitish Aaron shiyaam istachpa. Ashiri Aaron tputsee ichingaru tushanichpa. Tushaneeramchus, shiyshat tputs ashpari parsin, patumbchee tsiyatangcha, Natu kungoo, patumbchish shtungangi, tángcha, tákchush kungsha kapung zaw ashtachiya. Ashkachus, tputsshitisin ichingarusin kungoo waachinllinaya; chinutam wakaratam waachtamsinaya, tárangiya.

⁹Móysissha yuwartatam Apanll kamachtaku anuritam tumineeru, Apanllish pang' tushuwshineetsi yarangiya.

¹⁰Móysis zoonllpa Aaronpat ipuneersin, tputsee ashpari kuruzeeru, patumbchinung tushaneeyaru, Kitsis mazinangtsa; yuwis nda k'kuzee payumpanis anis: ¿Tamaree patumbchish kungoo yáyaruri, siyaam waamaam panachini?

¹¹tárangu, Móysis kapung tsiyantayaru, tushuwshineetsi yat sheeru, patumbchee tsimbun kayungarangu, kungsha anuritam kapung zaw ashirangiya. Ashirucha, tputsshitisin anuritam kungoo waarangusin, chinoomtam wakaraam yasiranganaya.

¹²Itaru, Apanllsha Móysisaa, Aaronaatstam; Siysat nda nuwamun mangis taturangus, yuwaa kamachtanlli anoo kapeetarangsa. Nuw, siyaa k'kiptamaritis patumbchee tsiyatangtsa, táranginawa. Itaru, siysat tsiyantayarus, patumbchee tushuwshishpasha kayungambayasa. Amb ashirangus, mantsir Israelchicheem tuyamandarangsa. Ashiriya, yuwamand ashirangis anumand Kanaanap tsap nda tputsiriptish naatssa, Apanll tárangiya.

¹³Anootssha kungoo sur Meriba yásamaranganaya. Israelchich Apanllee zapan tamundarangusin, Apanllsha waana wizpuree tuyamandarangu ancha. Ashiriya, na kamaneena yuwaa Apanll Israelchicheem kungoo panarangu anootsi.

¹⁴Móysis Kadesamand tsap taaru, tiptsirish tsiyatssee kamachtayaru, kurakaam Edomshucheem zanganirangiya. Kurakaa pakchush, kamankush tángcha; Shaana maachiritish Israelchich, shiyaa táranlleeja. Shiy iyaa yasaktishcha yuwaa iy kapung kiyung kachiyrangini anootsi.

¹⁵Watam iyashuch zitaminarni Ijiptop tsap naatarangsin, ambiri zapan masach taarangsin, itaru Ijiptoshuchshitisin tputs iyashchee zitaminarni nda wanasir chinarangusin, kapung natsataranaya. Iyaatssha ashirangtamsinaya. Iyaa kiyung yacharanganaya.

¹⁶Iy tanuranguni, Apanllpa kapung masharanganiya. Apanllsha iyaa k'keetsini mazinarangu, waanaatsi tiptsir iyaam Ijiptosh tsap tashitungamaam zanganirangiya. Natsha nish kusaranguni, shiyapat tsapunish tasasaru yakat Kadesash taariniya.

¹⁷Ashiri na shiyaa mashkina. Shiyshat ¿amkimsha iyaam naamaam kamiran tsapuneetsish arachich kitkachinipa? Itaru, mzatseewaatssina pakchuni, maachtawa tatsumareetsis kizarunawa muntacheezini. Uru piyamari imarchiniya. Kungureetstaatis posoreetsis nda pakchiyam patatchiniya. Ngootsshuri naachiniya. Ngootsshuri wazingari naakchuni, siyaa tsapunis tushiyanlluni, annaapari ambirisha kuseeruni taachiniya, átcha, tángcha, tárangiya.

¹⁸Itaru, Edomshuchsha kurak uwshat; Nda, anoom zandareezi. Nuwash nungi tsapunshi naarintspa. Ashiri misangayarus nuwaa kuki kapeeteerus, naakchus, urutanda nuwsha sundarurpati shitungeechuni, siyaa uru pachachiniya, tárangiya.

¹⁹Israelchichsha tputs; Nduni kurakaa. Uru naakchuni, ngootsish itsinsariparee naachiniya. Wandtaati siyash posorishish kungureetsish waakchurini, mishat wakarareemtamani yáskachtaateeniya, uru yuwamand siyaa kunguris waayarini anumand kurik tuwapachiniya. Tsapunshimaritis nungishimaritis naachinipa. Naayaruni, Arang kitchinipa, atutanicha, shiyaa anoomam mashkashiniya, tárangu,

²⁰itaru, kuraksha Edomshuch; Nduni, watsta, siyaa atina. Antaati nuwash tsapuni naamaam wanindaja, tárangu, Israelchichsha mazinarangusin, Edomshuch kurak watsapunee pachindku, wasundureetssha kamachtarangiya. Sundarsha anshuch kizpurinanda ichingaru chiyzamaam zandaranganaya.

²¹Ashirucha, wapitam kanapeersin, yusur Israelchich piyamsha minup ngoots nachungaranganaya. Ashiriya, na kamaneena yuwaa Edomshuch kurak watsapunee pachindarangu anootsi.

²²Ashiriya, Israelchich ichingarusin tsap Kadesash taarangana anoo shitungeerandsin, minupsha tsap sur Horapsha naataranganaya.

²³Anushsha taaranganaya. Edompeemtam tsapu, anushsha taar ashkusin, Apanll Móysisaa zoonllpatari Aaronpa tsiyatarangiya.

²⁴Zuwanllish Aaron musáshapari tsipachiya. Yap nuw Israelchicheem tsap panachi amb nda naachiya, watam yuwash kung wir taarangu, sur Meriba ísamarangis, anush tsap nuwaa kuki kapeetarangsa.

²⁵Ashiriya, shiyshat Móysisaa, zuwanlleetsish Aarona machingcha wipaptarta Elíyasarpatarta. Ambirisha Horpirisha