Masatarangana 14:2-19

²Ashirangsin, yuwshat zandkana anshat Móysisaa, Aaronaatstam mantsirsha ichingarusin tputs tsiyataranganaya. ¿Tamashtaja nda Ijiptoshuri tsap tsiparangini? Ambiritanaari tsiparanguni, ashireeja ningsha apusapsha tsap kiyung kachiyeeruch tsipachich, tárangusin,

³Apanlleetssha, ¿Mayaamshitaja Apanll iyaa ningeemsha tsap apusapsha wayarang? Waani ningiri tsap tsipambanllina. Undarar waratkatssin, k'chirpungpa pachapana. Ashkatssin, waani yachanllina. Wizanlleewaatstam, mishat wipaatstam waani putambanchina atuparee, iyaa ningeem yushindarangiya. Nda ashishtamaam, pzaa, wapitam Ijiptop kanapunda átpari, táranganaya.

⁴Tárangusin, waanpatatshitisin tsiyatarangsin, ¿Tamanda áta? ¿Ndushat chaama kurakarich minum tputs ipuseeruch ínanda át? ambinaapa sheeruch, uwshat chiyaa yusur Ijiptoptam tsap maachchiya, táranganaya.

⁵Ashirucha, Móysissha zoonllpa Aaronpa, kapung mang' mantsarangusin, tputsee tasaseersin, tsapush tutunlltayarusin, timuchta ashiranganaya.

⁶Anumunsha, Josueysha Nomarini wip, mishat Kaleb, Jefonarini wip ashirusin anshutam shanee ashiranganaya. Anshitisin, tsapoo nararangtamsinaya. Ashirucha, tputs zapan ngatarangana anoo parangusin, uwshtisin kapung mang' mantsarangusin, waanaatsi wamar putayarusin, izichiranganaya.

⁷Sheersin, uwshtisin Israelchichee tputs tsiyataranganaya; ¿Mayaamshitaja watsta táchich? watam iy naataranguni, tsap kizpur wanasir paranginiwa. ¿Tamareeja ashimaa chiyshat watsitpari táchich?

⁸watam Apanll iyaa kapung chinaku wanasir ksutkuwa. Uru amb naakchuch, chiyaam kapung istachiya. Apanllsha iyaam anoo tsap wanasiree, maachi zapan katungats, mishat wakaratam mimir, kinduratam zapan taaru anoo chiyaamsha tsapuneemaritich panachiya.

⁹Itaru, siysat mangutis tsiyantayarus, Apanll kamachtarangu anoo watsitparee, tárintspa. Mishat, ambchee tputs yaktashchee punirintspa. ¿Mayaamaja punichich? watam nda waritachinllinawa. Chiyamariparee pangaa katungtarich sheeruch kachingachchee. ¿Chakaja anshucheem tputs tapachindaku tapachindach? watam iyaatsina Apanll waana ksutaruwa. Ashiriya, iynaa Apanllirini taaru ¿mayaamshitaja punichich? tárangana.

¹⁰Tputsshitisin anumand kapung tsiyantayarusin, ¿Mayaamsha amb atanaya? Pzaa, pachayaruni kasayani, tárangusin, patumbchee ashparitssin tputs yátartaranganaya. Yuwari sheechinllina anuritam Apanllsha, waanaatsi wizpur wanshu pang' Israelchichish shaniyshini tuyamandarangu kizpur 'sineerangiya, yuwash Israelshuch shaneerana anshu.

¹¹Apanllsha Móysisee, ¿Ashinshtaja nishuch tputs yuw nuwaa niyrkana anin yusur nuwash tachiteechinllina? Mishat, ¿ashinshitaja nuwaa kuki zurkupari Apanll atiya, atusin nuwamun mang' tateechinllina? Yuwaa kamachtaki anoo nda payukanawa. Nuwaanaatsi wanasirimshiri tuyamandaktaati, anoo nda yasakanaya.

¹²Ashiriya, yuwamand ashkana anumand nuwshat tsutashish tsipatsimash zanganchima. Ashkachinaareena, ayamtaati Kanaanash tsap nda kuschinllinaya. Itaru, Móysisee, shiyaamamari kapung istachinllpa. Chinllineemaritish watsapun kizpur wanasiree yachinllinaya. Ashkatssin, waamaritin Israelchich kizpur taachinllinaya. Apanll tárangiya.

¹³Itaru, Móysissha; Apaa, mangishish kaapa chinangcha, ¿watam shaana wizpurirpatish tputsireetsish Ijiptosh tsap tashitungarangshawa? Waanari tputsireetsish waneekchush, uru anoo Ijiptoshuchsha mazinakchusin,

¹⁴waanpatatshitisin kaman, kaman ashkatssin, Kanaanshucheetstam tputs kamanchinllinaya. Watam shiy tputsireetsish kapung chinarangush, msasish tsapush karuwarangush, iyshat shiyaa kchiptaritani paranginiwa. Shaana iyaa imachirangush, ichingaru zar msas pantsatarangiya; kaschiritam, psaantam sumas ashiru kizpur 'sineerangiya. Ashiri amb ashirangush, ¿mayaamsha natsha shaantatam tputsee tpachingamaam zandaksha?

¹⁵Itaru waanari shiy tputsireetsish shaantatam izuuru tpachingakchush, Kanaánshuchshapsinaya anoo mazinakchusin, waanpatatshitisin tsiyatkusin,

¹⁶Apanlltaa ¿tamayanlla tiptsireetsi? Iyaa tsapunni Kanaanaa itutseeruri, siyaamsha Israelshucheemis panachintspa, tárangitaa, ndusha waritarangu, tiptsireetsimsha na izuuru apusap tsap tpachingayaru kasayanllu, táchpasinaya shiyaatsiya.

¹⁷Ashiriya, Apaa, watsta. Tsiyaneetsish mbizangcha. Kapung tsiyantarinllpa, watam, Siyaam nuwaanpataa wizpuriri istachintspa, shaana tárangshawa

¹⁸Mishat, Apaa, watam shiy nuw musá tsiyantama yasareezi, Tputsireetsi kapung chinakina. Tputs yutaritaatstaa nuwaa kuki nda payukana anootstaa, nuw kapung chinakuri yutaritshishirineetsi tachingina, tárangshawa, Apaa. Itaru, yuwaatsimari tputs shiyaa kukish kapeetarangsin, mantsirimash chinarangana anootsimari urutamari waneekush taachsha. Waparimand yutaritshishirini wipaatstam, wachinllinootstam, wachinllinootstam wip urutamari waniwantarush taachsha.

¹⁹Ashiri Apaa, shiyamari, kchinamishtishcha. Nuw shiyaa mashkina. Natu mikeerush tputsee yutaritshshirini mbizangcha. Sirú tputsireetsish Ijiptosh tsap tashitungayashinush, yutaritshishirineetsi tachingarangush, ningsha yushindarangsha. Natsha ambitam shingcha. Móysis Apanllee tárangiya. Ashiriya, na kamaneena yuwaa Apanll Israelchichee wanimaam zandarangtaa, Móysissha Apanllee waneerinllpa tárangu anootsi.