Markus 8:10-27

¹⁰Na'nama Yesus Nora maka ha Nwatutu-nwaye'a re rha'at la puou pa rla'awa Dalmanut yapatni.

¹¹Noma riy Parisi rma ratian la'a-ratian mai Yesus. Riwra rtota Yesus la klieratni pede rhopan pa Yesus Ntutga hihi'a-yapyapi mak kamehi-kayona id totpena irat muemna de Yesus plolli-mneheni nwatiawua Uplerlawna.

¹²Noma Yesus Nhedga aranni Niwra: “Adoh! Nihya'pa rimormiori la lera-mela ri rhopan pa Aghi'a hihi'a-yapyapi mak kamehi-kayona?! Mere mitlino! Hihi'a-yapyapi mak kamehi-kayona kuku' nek ho'mana, A'g edon tiutga tiy miy.”

¹³Nhor nioka Nto'or doinia ir la hande pa Nha'at owa'an la puou pa rleret lia walli.

¹⁴La' noma maka Yesus ha Nwatutu-nwaye'a re rhortaplin pa edon rodi wareherni (roti), enekneka ida nmeh'a la puou ralamni.

¹⁵Noma Yesus Nwagahniorta re Niwra: “Hyalia, mhioratreria! Hota miy ererma la'a tgo'a Parisi rora ray Herodes.”

¹⁶Noma rwarora pa idma nakot la ida riwra: “Nakot emkade yoma itakleh roti.”

¹⁷Yesus Nat niohora hya' ed maka ha rakotkota pede Nakot la re: “Nihya'pa miakokan nohora roti hadamonna?! Miy ralma-riormi edonna nla' nan ma'ta?! Ralammi ratehra to'owa.

¹⁸Matmi reprepra mere edon mimkek nana, ne mtiaru tlina mere edon mitail nana. Miy edonna mhiorat nan ma'ta?!

¹⁹La' lera maka Aghawierie'er roti wolim pa Agaitiutur nana riy riwnu wolima, de miy orgahami miwok nan korni kriou penpuen re, maka ha ra'an atre'a re wo'ira?” Rwahla riwra: “Kriou termida wehrani woru.”

²⁰“Ne la' walia rot mieha wo'itu maka Agala tiutria riy riwnu wogata, dewade miwok rehenu de kriou penpuenu re wo'ira?” Rwahla riwra: “Kriou wo'itu.”

²¹Noma Nakot la re: “Miy ralma-riormi edonna nla' nan ma'ta?!”

²²Nhor nioka Yesus Nora maka ha Nwatutu-nwaye'a re rte'ela leta Betsaida. La' hande de, riy rodia maka matni yata id pa rla rwak la Yesus pa, totpa Nteman nana la.

²³Yesus Nte'la la mat yata de limni pa Nodgiota la leta to'orni. Noma Nakrui lia riy de matni, ne Nteman limni la riy de matni, noma Natiana Niwra: “Mumkek oleka hadomdoma?”

²⁴Riy de namkek la gaini, nhor nioka niwra: “A'umkek nan riy, yoma a'umkeka riy ralala'a, mere yamkekni emolmolan to'a orona-augona.”

²⁵Yesus Ntemn owa'an limni la riy de matni, dewade riy de ntot pa niwra namkeka na'nama riy de matni nkalwied wa, nhi'nande namkek nana hya'a-hya' de reprepra.

²⁶Nhor nioka Yesus Nhopan pa riy de nla'awa romni mere Nakot la: “Mlia' de yana mliola leta de ralamni pa mpiahauria hadi!”

²⁷Noma Yesus Nor mutwualli re rla'a leta-ruhun mak kdella leta Kaisarea Pilipi onni. La' talan letgara Enatiana mutwualli mak ha Nwatutu-nwaye'a re Niwra: “Nhi'inde riy e riwra A' die he'o?”