Marku 6:13-41

¹³Yahoomola minepa coonanara ciinci, yahaattikitthela ni makhura aretta enci mpaka waavoniha.

¹⁴Mwene Heroti aheewa cuulumaceriyaka ca Yesu, nanruma ncina nawe ni anawiira: Ula phi Yohani Mpatisa oonwelenle mwaatthu ookhwa, phimaana cinawithoonyera mwa ule ikuru coopanka cotikhineeha.

¹⁵Akina yaanawiira: Phi Eliya. Akina yanalipihera: Ri nnapiyu toko anapiyu akina.

¹⁶Heroti nanso, wowiiwa itthu ila anahimya eeraka: Yohani unthikinlyaka isiko phunwelenle.

¹⁷Khweeli, Heroti phalamunle utthukiya Yohani ni weesiya nkalaposo, nlattu wa Herotiyata, amwaarawe Filipe nhimaawe, anthenlyawe.

¹⁸Nlattu Yohani anamwiirela Heroti: Khunleveliya ukhalana amwaarawe nhimaa.

¹⁹Herotiyata hopophela nreca ni anatthuna umwiiva, nanso khoorya,

²⁰nlattu Heroti anamoova Yohani ni, acuwelaka wiira ari ntthu ooloka ni nttakattifu, anamwaakhiha; wamwiiwawe anasanka, nanso anammiriyana ni uciveliya.

²¹Nanso nahophiya nihuku nooreera, Heroti wopuwelenlyawe nihuku nayariyawe ahophavela yoolya yinci yowaavaha oolupale owahano, oolupale anakhotto, ni mamwene o Kalileya.

²²Nakenle wiina mwana nthiyana a Herotiyata wahoncivela Heroti na atthu yaalattuliye. Mwene ahomwiirela mwali: Ukilepele itthu phi itthu intthunaa ni mi kimmowuvaha.

²³Ni ahopwahera: Kimmowuvaha itthu yothene inhalaa ukilepela hata ukhalaka mwanusu omwene aka.

²⁴Mwali ahokhuma waakoha anumwane wiira: Kilepele isiyani? Ala yahaakhula: Muru wa Yohani Mpatisa.

²⁵Mwali akelaka tho nenna nna, ahonlepela mwene, eeraka: Kintthuna uvahiya nananoru, unaheliye munttiisini muru wa Yohani Mpatisa.

²⁶Mwene ahotuthuwa, nanso nlattu woolupela wawe ni, nlattu waatthu yaalatuliye, khathunne unthuwa.

²⁷Nenna nna ahonlamulela mayorontta uwiha muru wa Yohani. Mayorontta ahorwaa nkalaposo ni ahothikila isiko ya Yohani,

²⁸ni wahoolo ahowiha muru munttiisini mpaka ummaha mwali, ni ula ahaavaha anumwane.

²⁹Ucuwela waya itthu ila owiitthuca a Yohani, yahokusa nrutthu ni yahothipela mmahiyeni.

³⁰Amitthenka yahothukumana wa Yesu ni yahonttonkacera citthu cothene capankilyaya ni citthu cihilyaya.

³¹Ni Yesu ahaahimerya: Mmweeke, nirwe nipuro nowiipithyaa ni mmumule vakani, nlattu yaari enci yaarwa ni yaawa mpaka uhikhalana ukati woolya.

³²Vano yahorwaa ni ikalawa nipuro nowiipithyaa nahaariwo hata ntthu.

³³Yoonaka arwaka, enci yahocuwela ukitthu unkelaya. Ni mmatthokoni mothene yahorwaa, yeetaka vathi, nipuro nne, ni yahophiya nraci.

³⁴Wakhuruwawe nkalawani, Yesu ahoona mphwinko muulupale ni ahoonela ikiriri, nlattu yaari toko ikhontwaa cohikhalana nhaakheli. Vano ahopacera weetthuciha ukati mwinci.

³⁵Ncuwa wakelaya utthekuwa, owiitthuca awe yahomwattamerya nuunhimerya: Nipuro nna niri toko mwini, ni ncuwa notthekuwa.

³⁶Walamulele urwaa mmawaani ni mmatthokoni cowattamana wiira yathume yoolya.

³⁷Ahaakhula: Mwaavahe nyenyu wa yoolya. Na ale yahonhimerya: Wothuma mikatthe cowavaha atthu ale othene, nimphavela ncurukhu iminya piili.

³⁸Yesu ahopwahera: Nhaana mikatthe mikavi? Nrwee moone. Anakohile atthu, yahaakhula: Mikatthe mithanu ni ihopa piili.

³⁹Ahaalamulela wonkomiha atthu vakani khila nipuro mmalasini makithi.

⁴⁰Ni yaanawunkoma khila ipuwa atthu iminya ni ipuwa ikhwawe atthu hansini.

⁴¹Vano ahokusa mikatthe mithanu ni ihopa piili ni, aweehaka wirimu, ahosukurela. Ahomyaniha mikatthe ni ahaavaha owiitthuca awe wiira yakawele atthu. Ni ahaakawela ihopa piili,