Mark 6:13-41

¹³Na falwàla dee busaw di dad to, na nihokla fngalo i dad to nun tduk du fangulêla ale.

¹⁴Na linge Harì Hérod gablà di kdee nimò Dyisas, du tatoo mdengeg i dagit Dyisas. Man i dademe to kun, “Dyisas, dunan Dyan Gal Munyag tamték mdà di fati, na én duen too kenen mtulus.”

¹⁵Kabay man dademe gablà ku Dyisas, “Kenen Ilaydya, tugad Dwata tasamfulê.” Na man dademe, “Dyisas ani, satu tugad Dwata salngad tugad Dwata di muna fa.”

¹⁶Na di kaklinge Harì Hérod i man dad to, man nawan mték Dyan, na manan, “Dunan Dyan Gal Munyag. Tafaklanggu ulun, bay tamték mdà di fati.”

¹⁷Ani manan, du tafakfean Dyan, na fbakusan, na fbilangguan, du mdà di ku Hérodiyas, yaan flanekan Filif, du balù yaan flanekan nwean.

¹⁸Na tagal man Dyan di kenen, “Là fakay nlad yaan flanekam.”

¹⁹I manan ani duen Hérodiyas too mnang nawa kenen, na mayè mati kenen, bay landè fa dalanan,

²⁰du too nun klikò Harì Hérod ku Dyan, du toon dilè i katlu Dyan, na gadean landè sasè mgimoan. Taman là faloh Hérod ku fnati kenen. Na too mayè Hérod flinge i tdò Dyan, bay msamuk nawan di gal kaklingen dun.

²¹Kabay teen Hérodiyas i kiboan fafati ku Dyan di duh kafaldam i ksut Harì Hérod, du mimò harì i bong fista. Na nlakan dademen dad ganlal di gubirnu, na dad ulu i dad sundalu na dademe mdatah dad to di banwe Galili.

²²Na nun tingà Hérodiyas libun fsayew Hérod di fistan. Na di kite kdee dad nlak di fista i tingà sayew, too ale mayè, na labi nan Hérod. Taman man Harì Hérod di tingà sayew, “Balù tan fnim di deg blégu ge.”

²³Na makang Hérod di kenen, manan, “Balù tan fnim kel di kagatngà i nagotgu, blégu ge.”

²⁴Na lamwà i tingà libun, na snalekan yéan ku tan fye fnin di ku Hérod. Na man yéan, “Fnim ulu Dyan Gal Munyag.”

²⁵Na gasil samfulê tingà libun di ku Hérod, na manan, “Én kayègu ku kaham ulu Dyan Gal Munyag di fligo na blém di deg.”

²⁶Too mlidù nawa Harì Hérod di fni tingà én, bay landè kibò du makang kenen di muna kdee dad to nlak di fista na myà kenen ku laan dnohò dun.

²⁷Taman dek Hérod satu sundalun mwè ulu Dyan. Na salu sundalu di bilanggù na kanlangan ulu Dyan,

²⁸na fkahan ulun di satu fligo, na neben di libun, na flesan nebe di yéan.

²⁹Na kaklinge dad to gal mlalò ku Dyan ani kibòla kenen, beg ale salu di bilanggù, na nwèla lawehan du lbangla di ilib galla gulambang dad to mati.

³⁰Na samfulê di ku Dyisas dad sfalò lwe dekan tamdò, na santulenla di kenen kdee nimòla di kagula na kdee tdòla.

³¹Kafnge én, man Dyisas di dale, “Salu ito di gulandè to du fye beg gamu gaftud.” Ani manan, du too dee dad to gal salu di dale balù kmaan talà ale gasleng.

³²Na mdà ale maweng du salu di satu banwe gulandè to du ftud.

³³Kabay dee dad to mite kdàla, na dilèla ale. Taman gasil ale tmanà mdà di kdee dad lunsud, na dad to én guna kel di gusalu ale Dyisas.

³⁴Na di ktufa Dyisas mdà di aweng, teenan dee dad to déén. Na toon ale kando du salngad ale i bilibili landè to mifat dun. Taman dee tdoan dale.

³⁵Na di kaflabin salu dad gal mlalò ku Dyisas di safédan, na manla, “Taflabi nan, na landè gumnè mdadong dini.

³⁶Fye ku fdaam dad to du fye mngabal ale gumayadla knaan di dad gumnè na dad malnak banwe mdadong dini.”

³⁷Kabay tnimelan ale, manan, “Gamu sa mlé dale knaan.” Na manla di kenen, “Kayeam ku gami mayad knaan kdee dad to ani? Mti taden di walu bulen i bayad dun.”

³⁸Na man Dyisas, “File batù i fan nebeyu? Neyeyu sa kun.” Na di keyela dun manla, “Alò lime batù fan na lwe nalaf.”

³⁹Na dek Dyisas i dad to sudeng di bnas di dad sahal lumbuk.

⁴⁰Na slumbuk ale sudeng, nun mlatu to na nun lime falò dad to di kat lumbuk.

⁴¹Na nwè Dyisas i lime batù fan na lwe nalaf, na lngalà kenen di langit du dmasal mlé fye di Dwata, na snatngaan i fan, na blén di dad gal mlalò kenen du nalella di dad to. Na nalelan lwe nalaf di kdeela.