Mareko 8:6-16

⁶Ia tatao gamagaridi ie ribahesomdi se bawa tano eai: ia falawa haligigi‐labui wa i abidi, i aihelahui, abo i ihidi i mosedi ena heaheatayao aridi eai moutuana wa nuanuadi eai se peiauri, isi abo se soiedi.

⁷Isi eama gagiridi headi hinage se abidi; i aihelahui, abo ie ribahesomdi isi nuanuadi eai se peiauri.

⁸Isi se aiai, e, bogadi se sese; aiai mapulana isi abo se tanogogoi bosa haligigi‐labui.

⁹Nuana tauaina tausani hasi: ia abo i hetamaridi isi abo se lau.

¹⁰Ia maena heaheatayao waga esau eai se geru abo se dunasae Dalemanuta eai.

¹¹Parisea tataodi se taulagema, se hesiolau ia arinai, galewa heiheinoina esau bena si eooi, arinai ia se nohoi.

¹²I nuadubu, i ene, “Isi ta, saha heiheinoina si eooi? Ea heribamiu ta mamohoi, heiheinoi taba nige se mosei teina isi ta aridi eai.”

¹³Ia i laugabaedi; ie geruuio waga eai, ie lau hari sana awasi eai.

¹⁴Ia ena heaheatayao aiai nige se abi, nuadi se hui; isi adi falawa esega mo waga eai ie ota.

¹⁵Iesu i ribahesanapuedi, i ene, “Nanabumiu au nanabu, Parisea tataodi adi yeast, eo Heroda hinage ana yeast au itakomakomani.”

¹⁶Isi se nuatudadaasa, si ene, “Paana nige adi aiai.”