MAREKO 6:4-40

⁴Bena Iesu eto, Peroveta tauna na bae matauraia, a ena hanua korikori ai bona varavarana bogaragidiai bona ena ruma ai mo basie matauraia.

⁵Unuseni ai kara siahudia ikaradia na asi dibana; gorere taudia ta ta mo e daudia toho, e hamauridia.

⁶Ia na e hoa bada, badina be idia na asi edia abidadama. Gabeamo ia ese hanua maraḡidia ai e loaloava, e hahedibava.

⁷Bena ia ese gwauta-rarua taudia e boiridia, rarua rarua arno e siaidia; bona siahu e henidia, lauma dikadia bae luludia lasi.

⁸Bona e tamanudia, laolao kohudia haida basie abi kau: itotohi mo bae abi, a moda bona aniani bona moni vainana basie abi kau;

⁹tamaka bae abi, a hahedoki rua basie hahedoki eto.

¹⁰E hamaorodia, eto, Ba dae kau rumana ba noho henia, ela bona una hanua ba rakatania.

¹¹A gabu ta ai basie abimui dae bona eremui basie kamonai, ba rakatania negana ai na aemui ḡahudia bavatu-atuoho, idia ihahebadelaidia.

¹²Bena idia na vada ela, e harorova, taunimanima ihahelalokerehaidia;

¹³Bona lauma dikadia diaḡau e luludia lasi; gorere taudia hutuma danu dehoro e dahulaidia, e hamauridia.

¹⁴Herod Ḡaubada ese ini hereva e kamonai, badina be Iesu ladana e perea rohorohova. Haida eto, Ioane Bapatiso mase amo vada e tore isi, taunabunai ini siahu karadia e karamu.

¹⁵Ma haida eto, Ina na Elia. Ma haida eto, Ina na peroveta tauna ta, peroveta gunadia heḡereḡeredia.

¹⁶A Herod na e kamonai, bena ia eto, Hari Ioane, kwarana na utua oho tauna, na mase amo vada e tore isi reana.

¹⁷Badina be Herod na vada e hesiai, Ioane e dabaia tao, dibura rumana ai e koua, e tahahaia hahinena Herodia, ia kakana Filipo adavana, dainai.

¹⁸Badina be Ioane ese Herod vada e hamaoroa, eto, Oi ese kakamu adavana o tahahaia na o kereremu.

¹⁹Taunabunai, Herodia ese e badu heniava, ia ialana urana e urava; to asi ena dala.

²⁰Badina be Herod ese Ioane magigina e magigiva, dibana ia na kara maoromaoro bona helaḡa tauna, una dainai ia ese e naria namonamova. Bona erena e kamonaiva negadia ai na lalona e hekwarahiva, to e kamonai henia loulouva mai moalena ida.

²¹Herod ena vara dinana ilalolaina ariana badana ta e karaia; hanua lohiadia bona tuari biagudia bona Galilea tau-badadia e vavedia.

²²Herodianatuna haneulatona ese idia vairadiai e mavaru; bena Herod mai ena vadivadi iboudiai e moale bada, bona Ḡaubada ese haneulato e hamaoroa, eto, Emu ura ḡauna ba gwauraia be baina henimu.

²³Mai gwauhamata hereva metauna ida e hereva henia, eto, Emu ura ḡauna, ena be egu basileia kahana, to baina henimu.

²⁴Bena haneulato na e raka lasi, sinana e nanadaia, eto, Dahaka baina gwauraia? Ia na e haere, eto, Ioane Bapatiso kwarana.

²⁵Bena haneulato na e heau vareai, Ḡaubada e hamaoroa, eto, Lau na uramu Ioane Bapatiso kwarana harihari a henigu dihu ai.

²⁶Bena Ḡaubada lalona e hisihisi, to ena gwauhamata dainai, bona ena vadivadi hehelai daidiai, ena hereva ihalouna na asi dalana.

²⁷Taunabunai, Ḡaubada ese ena tuari tauna ta e siaia, e haḡania, kwara na baine mailaia. Bena ia na ela, Ioane kwarana dibura rumana ai e utua oho.

²⁸Kwarana na dihu ai e udaia, e laohaia, haneulato e henia; bena haneulato ese sinana e henia.

²⁹Ena hahediba e kamonai, bena idia na ela, tau-anina eha abia, vada eha ḡuria.

³⁰Aposetolo taudia na Iesu dekenai ma e hebou lou, edia kara iboudiai bona edia hahediba herevadia idoidiai e hamaoroa.

³¹Bena ia ese e hamaorodia, eto, Gabu ḡaḡaena ta aitala, laḡada baita ani. Badina be hutuma ini e laova unu e maiva, taunabunai asi edia nega bae aniani.

³²Bena vanaḡi ai e gui, e heau hehuni, gabu ḡaḡaena ta ela.

³³A haida ese e laova ai e itadia, bena hutuma na hanua iboudiai amo tano ai e heau bou heau bou ela, una gabu eha guna henia.

³⁴Dihona ai Iesu ese hutuma bada e itadia, bona e bogadia hisi, e kara mamoe asi ireḡudia na heheto. Bena e hadibadia.

³⁵Adorahi ai, ena hahediba ia dekena ela, eto, Ina na gabu ḡaḡaena, bona dina be dihomu;

³⁶boma siaidia, uma gabudia ai bona hanua lalodiai adia bema ha hoi.

³⁷A ia ese e haere henidia, eto, Umui ese adia ba henidia. Idia eto, Be, ai na dollar ruahui davana anianidia na baia ha hoi baia henidia a?

³⁸Ia eto, Emui aniani ḡaudia be hida? Aola, a itaia. Eha itaia, bena e hamaoroa, eto, Ima, bona gwarume rua.

³⁹Ia ese e haduadia, taunimanima iboudiai na masia ai bae helai helai diho.

⁴⁰Taunabunai, idia na sinahu sinahu amo bona imahui imahui amo e helai ere-ere.