MAREK 9:32-44

³²O učeňika na achaľonas ole laveske, ale te phučel lestar pal oda pes daranas.

³³Avle andro Kafarnaum. Sar sas andro kher, phučľa lendar o Ježiš: “Pal soste vakerelas maškar peste, sar avahas pal o drom?”

³⁴Ale on sas čhit. Bo sar avenas pal o drom, vakerenas pal oda, ko hin lendar nekbareder.

³⁵O Ježiš peske bešľa, vičinďa le dešudujen a phenďa lenge: “Oda, ko kamel te el ešebno, mi el posledno a mi služinel savorenge.”

³⁶Paľis iľa čhavores a ačhaďa les maškar lende. Sar les iľa pro vasta, phenďa:

³⁷“Sako, ko prilela jekhes kajse čhavorendar andre miro nav, man prilel. A sako, ko man prilel, na man prilel, ale Oles, ko man bičhaďa.”

³⁸O Jan leske phenďa: “Rajeja, dikhľam varesave manušes, sar andre tiro nav tradelas avri le demonen a na domukahas leske ada, bo na phirel amenca.”

³⁹Ale o Ježiš lenge phenďa: “Ma braňinen leske! Bo ňiko, ko kerel andre miro nav zazraki, našťi vakerel takoj namištes pal mande.

⁴⁰Bo ko na džal pre amende, hino amenca!

⁴¹Čačipen phenav tumenge, hoj sako, ko tumen dela te pijel jekh poharis paňi andre miro nav, bo san le Kristoskere, čačes chudela peskeri odmena.”

⁴²“Oleske, ko kerel, hoj te oddžal andral o pačaben jekh kale ciknorendar, save pačan andre ma, uľahas feder, te leske thodehas baro bar pre meň a čhidehas les andro moros!

⁴³A te tut cirdela tiro vast te kerel o binos, odčhin les, bo feder tuke hin te džal andro dživipen bi o vasta, sar te džal soduje vastenca andro peklos, andre odi jag, so šoha (ňikda) na murdaľol andre!

⁴⁴Ode, kaj lengero kirmo na merel a e jag na preačhel!