MARCOS 6:4-40

⁴Per re Ne lo men: ―Yrandxee lugar rzaknon mén te profet, per le laz men rzaknondet mén men, ni men ne nak xparyent men, ni men ne nak bechpee men rzaknondet men men.

⁵Wakdet nlaa Ne ndal gyelmilaguer nga, nonchee tebëd mengyiz wneseyaken Ne ne wxob nya Ne led men.

⁶Wzee wzak Ne ne rlaleedxdet mén guin Ne. Lex wa Ne yra gyëzwin ne nak guex nga, waneluu Ne mén.

⁷Zhich guin wbëz Jesus yra chibtxup xpén Ne, lex wxaal Ne men txupgue txupgue men, wazëët men xdiiz Dëdyuzh no wdee Ne poder lo men chen koo men menzab lextoo mén.

⁸No re Ne lo men ne gweeydet men ne ykyiinen men nëz, ni gyëtxtil, ni bols, ni med, nonchee te baston sen men.

⁹Ykaa xgyël men nii men, gak men xab men, per gweeydet men steb nëzo.

¹⁰No re Ne lo men: ―Chene ydxiin de te ruyuu, nga ykaa de axtegue ne yruu de gyëz guin.

¹¹Belne nuu ledne ylaandet mén kwii men de ni ylaandet men gon men ne rzëët de, yruu de nga, kwib de guxyudi ne ka nii de zegnak te beey ne nadet mén guin nyon men ne wzëët de. Nligue yna noo lo de yra de ne chene ydxiin dxe ne ylaa Dëdyuzh gyelextis, beeytee sakzi men-Sodoma no le men-Gomorra ke lo yra mén guin.

¹²Lex wruu men yra men, wazëët men ne rap mén degne ysaan mén xgyelmal mén.

¹³No wboo men ndal menzab lextoo mén, no wguu men seyt led ndal mengyiz, wneseyaken men men.

¹⁴Won rrey-Herodes yra ne kalaa Jesus, porke noze nesree nesrotee ryen diiz ne kalaa Ne. Nuu mén re: ―Xwa ne rtxobnis wa wban. Por neguin rap men poder rlaa men gyelmilaguer.

¹⁵Nuuzeg mén re: ―Profet-Elías ne. Nuuzeg men re: ―Te profet ne nak zegnak profet ne wuu chekwlo ne.

¹⁶Chene won Herodes neguin, re Herodes: ―Laa Xwa wa wban. ¿Pezee wbanleg Xwa? No che wxaal noo mén wa men watxuug men xtoo Xwa.

¹⁷Re Herodes zenga porke laa Herodes wxaal mén, wa men wanëëz men Xwa, lex wguu Herodes Xwa chegyiib, wliib men Xwa kon kaden. Wlaa Herodes yra neree por xdol Herodías xewnaa Blib bech Herodes, per wla Herodes men lo Blib, lex wtsëlnya Herodes yrup Herodes men.

¹⁸Ndal tir re Xwa lo Herodes: ―Ngyidet negwa ne rlaa de ne wtsëlnyano de xewnaa bech de.

¹⁹Por neguin rwinyaan Herodías Xwa, rlaan men yket men Xwa, per rdeedet Herodes si,

²⁰porke rdxe Herodes Xwa, che nan Herodes ne te menwen nak Xwa no ne bet dol neeydet Xwa. Por neguin rdeedet Herodes si ne pe ylaa Herodías Xwa; no mase ni rdeedet Herodes kwent ne rzëët Xwa, per rzhiilen Herodes rkagyedyag Herodes ne rzëët Xwa.

²¹Per wdxiin te dxe ne wzël gan pezee wlaa Herodías. Chene wzaa Herodes iz, wlaa Herodes te lni. Wdee Herodes ne wu yra men ne rnebééy no le yra komandant no le yra men ne non ne nuu lo lyu ne la Galilea.

²²Wdee xsaap Herodías ledne kayak lni, lex wya nzeb. Kesentyent wtseleedx Herodes zegne wya nzeb yra Herodes men ne zobno Herodes lo mezh; lex re Herodes lo nzeb: ―Gunab logne rlaantee de lo noo, noo yniizo.

²³Wgon Herodes Dëdyuzh ne sdee Herodes logne ynabtee nzeb, niguelzhe ynab nzeb gwrool nacion ledne rnebééy Herodes.

²⁴Orguin wruu nzeb wanabdiiz nzeb lo xnaa nzeb, re nzeb: ―¿Pagox ynab noo? Lex re men lo nzeb: ―Gunab xtoo Xwa ne rtxobnis.

²⁵Zhich guin wdenzeeb nzeb ledne zob Herodes, re nzeb: ―Rlaan noo yniiz de xtoo Xwa ne rtxobnis lo noo orgueree kon te lengyaan.

²⁶Kesentyent wdenles lextoo Herodes ne won Herodes zenga; per kom che wgon Herodes Dëdyuzh nes lo yra men ne zobno Herodes lo mezh, wap Herodes degne wlaa Herodes ne wnab nzeb.

²⁷Orgueguin wxaal Herodes te soldad ne tsatxuug men xtoo Xwa.

²⁸Lex wa soldad guin lenchegyiib, watxuug men xtoo Xwa. Wluzh nga wdxinneey meno nuu we te lengyaan, wdee meno lo nzaap guin, lex laa nzeb wdekwento lo xnaa nzeb.

²⁹Chene waknan xpén Xwa we, wa men weey men xkwerp Xwa, walugyeer meno.

³⁰Chene wberee yra poxter, wdop men lo Jesus, lex wuu men diiz yra ne wlaa men no yra ne wneluu men.

³¹Lex re Jesus lo men: ―Gutayoo tsa be ledne yëtet mén yne be tebrrat. Kesentyent ndal mén rdxiin lo Ne, men ne za, men ne rberee, axtegue ni ryobdet gu Ne yra Ne xpén Ne.

³²Orguin wdee Ne lenbark yra Ne xpén Ne, za Ne te ledne yëtet mén.

³³Per ndal mén wii ne za Ne yra Ne xpén Ne no wnebeey men Ne. Lex wruu mén yrandxee gyëz ne nak nes guin, za men nii men, kwlodee men wdxiin ke lo Ne.

³⁴Chene wruu Ne lenbark, wii Ne yra menroo menduxtee guin; lex wles lextoo Ne men, porke nak men zegnak mëkzhiil ne yët gan txu gapkwent. Lex wzelo Ne noze ndal ne wneluu Ne men.

³⁵Chene che rzëë, wbig xpén Ne lo Ne, re men: ―Chexke rzëë no ni te mén nuudet lugarree.

³⁶Gugue lo yra ménree gya men, chen tsa men ledne ka mén den o ledne nak gyëzwin ne nak guex nee, tsaka men ne gu men porke neeydet men ne gu men.

³⁷Per wke Jesus, re Ne: ―Laa de gudee ne gu men. Wke men re men: ―¿Pe rlaan de tsaka noo txupgwyuu denario gyëtxtil chen ydee be ne gu men?

³⁸Lex re Jesus lo men: ―¿Blazh gyëtxtil neey de? Gutsa wii gan. Chene wberee men, re men lo Ne: ―Gaay gyëtxtil no le txup mël.

³⁹Orguin wkyeen Ne men ne gue men lo yra mén guin ne sob men tebëdgue tebëdgue men lo gyizhyaa.

⁴⁰Lex wzob men tebëdgue tebëdgue men, nuu ledne wzob men tebgwyuu men, nuuzeg ledne wzob men txupchii men.