Marafanna Falane 6:2-11

²N xanuntenna bata siga a nakɔni, sansi xiri ɲaxumɛ yireni alogo a xa a xuruseene raba mɛnni, a yi sansi fugaxina ndee malan.

³N xanuntenna gbeen nan n na, n fan gbeen nan a ra, a nɛma a xuruseene rabama sansi fugaxine tagi.

⁴N nafan ɲaxanla, i rayabu alo Tirisa taana, i rayabu alo Yerusalɛn taana, koni i magaxu alo sofa ganla.

⁵I yɛɛn ba n na alogo e nama n xaxinli fu. I xunsɛxɛn saxi a ma alo sii kurun nɛma godɛ Galadi geyaan na.

⁶I ɲinne fixa alo yɛxɛɛ kurun naxanye kelima e maxadeni. E lanxi e boden ma firin firin yɛɛn ma alo gulunne. E keden pe mi baxi e bode ma.

⁷I xaden nayabu alo girenada wudi bogini xabaxina a tagi hali dugin bata so i yɛtagin xun na.

⁸Mangan nɔɛ ɲaxalan manga tonge sennin sɔtɛ nɛn, e nun konyi ɲaxalan tonge solomasɛxɛ, e nun sungutun wuyaxi naxanye xasabi mi nɔɛ kolonɲɛ,

⁹koni n tan ɲaxalan keden peen nan kolon. N ma ganbadin na a ra, fɛ mi ɲaxanla naxan na. A keden peen nan a nga yii dii tɛmɛn na. A nga a tan nan nafisaxi a diine birin xa. Sungutunne to a to, e a sɛwana fe fala nɛn, mangana ɲaxanle nun mangana konyi ɲaxanle fan yi a matɔxɔ.

¹⁰E naxa, “Nde ito ra naxan fama alo subaxana, a rayabu alo kikena, a mayilenma alo sogena, koni a magaxu alo sofa ganla?”

¹¹N bata siga nakɔni kantin yireni, alogo n xa sa se solixine mato xuden dɛ, alogo n xa a to xa manpa binle maɲingima, xa girenada wudine bata fuga.