Text copied!
CopyCompare
Basef Buꞌwafi Godi - Maol Amom Aposeli - Maol Amom Aposeli 11

Maol Amom Aposeli 11:1-24

Help us?
Click on verse(s) to share them!
1Eaꞌ amom aposel maloma esis sahin owan sagahapifanai sagape anamba Judia hiagomai sameꞌ basef ifimba ma anis amam nematawa owaꞌ Judaisia wapani sofaꞌ basef Godi sagahapilif.
2Eaꞌ Pita notanima nondowasaꞌ Jerusalem, owaꞌ anis epes Juda sagahapifa basef Godi sape. Esis sahapila waf fowaꞌifi dindinip saꞌi esis hiasi sagahapifanai sondagiꞌma muꞌuli esis Judai ma mogatopaꞌ alop amamipi. Eaꞌ sololaꞌagomana dindinipa basef ananifi
3saꞌipana saꞌi, “Inaꞌ aꞌ nafeꞌ nawis ifagw amam amamba owaꞌ Juda mogatopaꞌ alopia naꞌ gwaꞌaisi nalomam.”
4Owaꞌ Pita naꞌipasa basef laufi ma hiahawes hiasi sagatagai. Naliꞌ naꞌipasa basef dambadamba fagaliꞌi nailif nafeꞌ nafeꞌ nambif. Eaꞌ naꞌi,
5“Aeꞌ ape taun Jopa andabeten ape owaꞌ, okom aeꞌami mandambemef ati anis hiahawes siꞌi andandaꞌoh. Anom hiahaom luꞌwami misilaꞌi ilif siꞌi lowaf laufi endilisi. Hiahaom magahapila lowaf anamba daꞌmalifinama biafigin biafigini mahapilana malana nowalai heven ilif eaꞌ nafiꞌmai aeꞌ.
6Eaꞌ aeꞌ aꞌi ataꞌ egawa amamba andeandeꞌ, atologon nomon lowaf anamba ati hiahaom mamimami hiami magape nomona lowaf anambai. Ati mafis hiam haom magalutu itapi mafis alupumi maloma uguf amiguf hiahaom magail alupi.
7Eaꞌ ameꞌ anagol malagol gaꞌipi gaꞌi, ‘Pita, inaꞌ safel neha anom mafis neaꞌam.’
8“Owaꞌ aꞌipa Dembinai aꞌi, ‘Dembinai, aeꞌ andaiwaꞌ endilisi! Fowaꞌ aeꞌ ataꞌ saꞌowe afiꞌi afiꞌi ataga deiꞌ aeꞌ ina agaꞌ anom maefah awami alugumii, owaꞌatin.’
9“Owaꞌ malogol agalemba gafiꞌi ilif wapani bif gaꞌi, ‘Hiahaom God nandaꞌami magataga buꞌwamii, amamba ina aꞌ niꞌi alugumi, owaꞌi.’
10Hiahaom amamba matagama aeꞌ wanifa eaꞌ, motanima malota heven ilif hiꞌalam.
11“Ama main, deiꞌ atef amam amamba wanom mafiꞌi mataga ipat atamba afaꞌ wagapoma. Anona aman nagape Sisariai nasapaꞌam mafiꞌmai aeꞌ.
12Eaꞌ Ambal buꞌunai Godi naꞌipi naꞌi, ‘Inaꞌ foꞌo lomago amom, inaꞌ owaꞌi okom molamefeꞌa.’ Amom sahope amamba wanom wanom mafeꞌ malome. Eaꞌ afaꞌ wafeꞌ wawis ipat aman anambai,
13naꞌipafa ma nagati ensel nagalutumana nomon gani ipat ananitai naꞌipana naꞌi, ‘Inaꞌ nesapaꞌ anom amam mofeꞌ Jopa miꞌipa Saimon agol waꞌagol Pita ma nigafiꞌmai inaꞌ.
14Ama nogaꞌipina anif basef inaꞌ ma basef ifimba atifa God notopalopa inaꞌ negaloma esis wambota ineꞌisi soloma esis sandaꞌ maol ineꞌinii ma nofaꞌepa nokwahomepa waf awafi pitanimai pegape andeandeꞌ.’
15“Eaꞌ aeꞌ asoumbai basef aꞌif, Ambal buꞌunai Godi aꞌ nisilaꞌmai esis, nafiꞌi naꞌamba atin siꞌi naliꞌ nagafiꞌmai apaꞌ Juda dambadamba.
16Eaꞌ okom mapoma basef ifimba Dembinaii wapani. Ifimba fagaꞌi, ‘Jon napisiꞌas embel, apaꞌ ina embel atembal, owaꞌ. Atiasi pefaꞌ Ambal buꞌunai Godi nuwisipa.’
17Fowaꞌ apaꞌ mogahapifa Dembinai Jisas Krais eaꞌ God nasoꞌapa Ambal buꞌunai ananinai apaꞌ dowaf siꞌi presen. Eaꞌ deiꞌ aeꞌ ami ma laꞌifiwi egasopama God? Owaꞌatin.”
18Esis sameꞌ basef ifimba Pita nagaꞌipasafi eaꞌ ukup pasoꞌasa basef ifimba asasifi sasoꞌma agol Godi saꞌi, “Deiꞌ apaꞌ aꞌ mogawa God nambema nelelemb esis amam nematawa owaꞌ Judaisia ma esis wapani safeꞌma anen sogape ambal namili.”
19Fowaꞌ amom magaha Stiven nagagaꞌi mandaꞌ nimanimi luꞌwami matagama esis Kristen amam nematawa mahas. Eaꞌ esis sagahapifanai safaꞌ safeꞌagon ganigani eaꞌ sataga anambel wambel Antiok safeꞌ anep itap biafip luꞌwapi Saiprusi Fonisia sawalapa basef Godi ma esis Juda atis. Anis daias owaꞌatin.
20Apaꞌ anom amam Saiprusimi maloma anom Sairinimi mafeꞌ Antiok mawalapa basef ifimba ma esis Grik wapani. Amom mawalapa basef buꞌwafi ma Dembinai Jisas Krais.
21Eaꞌ banagami Dembinaii atom mape maloma amom, isimba atis deiꞌ amam nematawa hiasi sambema nelelemb safiꞌmai Dembinai.
22Eaꞌ esis amam nematawa Kristen sagape Jerusalemi sameꞌ basefa isimba eaꞌ sasapaꞌ Barnabas nafeꞌ Antiok.
23Anen nafeꞌ nataga nati God nandaꞌ esis boꞌwesa waf buꞌwafi numafias nandagalamas. Nafela ukup esis amam nematawa hiasi ma sogaila Dembinai banagambel dondol.
24Barnabas anen aman buꞌunai, Ambal buꞌunai Godi nape siꞌinama anen, nagahapifana datimai. Eaꞌ natopalopa esis amam nematawa miniꞌap laupi ma sagahapifa Dembinai eaꞌ sawisi miniꞌap ananipi.

Read Maol Amom Aposeli 11Maol Amom Aposeli 11
Compare Maol Amom Aposeli 11:1-24Maol Amom Aposeli 11:1-24