Mantá Tanla 5:20-34

²⁰—Diosichi yaca jilaide! tinue. Junbi wiruito tsachilaca Diosibe pesonnanoca jera micaride! tinue.

²¹Junni tsantinunca meráto, aman mantseinunsi Diosichi yabi manwito micarinaminlanue. Junnasa mantá tan patelebe yachi tsachilabe jerale israelita mantaminlaca layalaquinue. Junto jera layaitobi, donun yaca fiqui erenue yape Crístochi mantá tanlaca manlarito tanjalaisa.

²²Junni polisiala donun yabi féto quiranari, Crístochi mantá tanlari itominlanue. Junca quirasi, mantá tan patelechica manjito,

²³itsanlatinue: —Chiquila féto quiranari, donun yari sequenan doraminue latinue. Quiramin polisialanan tamolante quirato wiruraminlanue latinue. Junni aman tamolan manlasito quiranari, fu tamo jominue latinue.

²⁴Junni capitanbe mantá tan patelelabe ya fiquica meráto, duque wepanato, ¿Niyanhichunancan? tilatinue.

²⁵Tsanlatinasa mantimini, tsachi manca yalachica jato itsantinue: —Nula doca jomin tsachilari Diosichi yabi tsachilaca manmicarilaquinae tinue.

²⁶Junca merasi, capitanbe polisialabe Diosichi yaca manjito, Crístochi mantá tanlaca manan mancato tanjilainue. Aman yalaca canatonan, uyan tsachilaca jelechi natiya sonba catulajonue chiquilaca pansile su walaca tala quilaquichunae tito.

²⁷Junni Crístochi mantá tanlaca mantanjato, israelita mantaminlachibi tanwilainue. Junni fe mantá tan pateleri yalabe

²⁸itsantinue: —Chiquilari nulaca duque sonba mantalaquiyoe tinue Jesuchi mantate natiya manmicarilaquitunaque. Tsantica josanan, nulari jerale Jerusalenbi chuminlaca micarinilaquinae tinue. Junsi chiquilacanan culpa quichi latinae tinue Jesuca totesa caricalaeque.

²⁹Pédrobe uyan Crístochi mantá tanlabe beconan pato, ya mantaminlabe itsanlatinue: —Chiquilari tsachilacari merátuto, Diosicasiri meránola joyoe latinue.

³⁰Nulari Jesuca corosibi totesa carica josa, chiquilachi matu tatalachi Diosinan yaca mansoncarinue tinue.

³¹Junsi yaca jamochi laricanue tinue yape yachi tsa tede nanchi pemantato chusa. Junni Jesús jamochi chuto, israelítalaca yalachi jutsaca jera telaqueposa carino munarae. Yari nulachi jutsaca piyarino podeichunae.

³²Aman chiquilari junca jera mirato, Diosichi tenchi tsanque cuenta polariniquinayoe. Diosichi Tencanan junca jera mirato, yanan tsachilaca tsarasi fiqui joeque tenhisa carinae. Junni Diosi yaca meráminlachica yachi Tencaca eremin joe tinue yape yalachibi wito chusa. Junni Pedro jun fiquicari cuenta polarinue.

³³Jun fecári meralaquinaminnan, israelita mantaminla Pédrolaca duque paito totechi latinue.

³⁴Junni totechi latinasa, manca mantamin tsachiri cuenta quichun wiruinue. Yari fariséolachi bolon israelita joto, yala tala mantaca micarimin jominue. Gamaliel tinun mumun jominue. Jeralela yaca duque respetaimin jominlanue. Junni ya mantimini Pédrolaca urachi moora larisa carito,