Mantá Tanla 2:9-25

⁹Partia tobi chuminla Partia to fiquica meralaquinayoe latinue. Media tobi chuminlari Media to fiquica meralaquinayoe latinue. Jun tsanquenan Elam tobi chuminla, Mesopotamia tobi chuminla, Judea tobi chuminla, Capadocia tobi, Ponto tobi, Asia tobi,

¹⁰Frigia tobi, Panfilia tobi, Egipto tobi, Cirene quelote Africa tobi chuminla jeralela yalachi fiquichi pánaminca meralaquinayoe latinue. Junsi uyanlari Roma pueblobi nechinan jaca jolajoe latinue weyanlari tsa israelítala, weyanla israelítalabe peito Diosica tenca pecaminla.

¹¹Junsi Creta tobi nechinan, Arabia tobi nechinan jaca jolajoe latinue. Junni jerale bare tobi nechi jaminlatiya Jesucrístochi mantá tanla pánaminlaca meráto wepanalainue. Diosi jera seque quica jonunca chiquila jerale tolachi fiquichi polarilaquinae tilatinue.

¹²Jeralela junca niyaquenantiya tenca cano podeituto, duque wepanalainue. Niyaito tsanque palaquin quinanque beco beco panhalaquinue.

¹³Aman weyanla mantimini cacarito, winanni jolajoe tilatinue.

¹⁴Junni chunca paluca Jesucrístochi mantá tanla wiruilaito, Pédrori sonba pato, layaica jun tsachilabe itsantinue: —Judea tobi chuminla, jerale Jerusalenca jaca junla, nulabe cuenta quino muquee. Niya josatiya la pánaminca seque meralaquede! tinue.

¹⁵Weyanlari chiquilaca winan jolajoe tilatinae. Te, natiya winan itolajoyoe. Quepenanan cajoe. Nuebe tsansiri joe. Monantiya in órate winan caitulajochunae.

¹⁶Inni Diosichi cosa joe. Joel matu tote Diosichi mantate pamin joto, itsan ichunaeque pato, itsanque pila chutenue tinue:

¹⁷To yucapiyarino ma quelo inasa, Diosi yachi Tencaca jeralelachica ereyanae tieque chuteca joe. Nulachi naolabe namalabe Diosichi mantate cuenta quilaquichunae. Diosi nalan nalan unilalachi quirajasa carichunae. Unicalachi quipi quirasa carichunaeque chuteca joe.

¹⁸Diosibe mantaiminlachica yachi Tencaca ereyanae tie unilalachibinan, sonalachibinan. Yalanan Diosichi mantate cuenta quilaquichunaeque chuteca joe.

¹⁹Yoquidobi duque ticatiya quirawoanae tie wepanarichun. Tobinan ticatiya quirawoanae tieque chuteca joe asanca, ninca, nin poyoca, yape tsachila junca quirato tenca calaquisa.

²⁰Yo neme ichunae. Penan asan cuwenta luban ichunaeque chuteca joe. Jun tsanhichunaeque chuteca joe Miya Diosi to yucapiyarino ma quelo inasa. Seque wepanato quirantsan sen ma jochunae.

²¹Juntonan Miyabe rocaiminlaca se lariyanae tieque chuteca joe.

²²Junni Pedro Diosichi Pilabi chutecaca tsanque manpasi, ya tsachilabe itsantinue: —Israelita tsachila, la pánaminca meralaquede! tinue. Jesús Nasareno Diosi wenteca jun tsachi jominhe tinue. Yape nulari junca tenhilaisa, Jesús duque wepanato quirantsancari seque quimin jominhe. Diosichi mantate jera tsanquinaminhe tinue nula nenanunte. Nulanan yaca miralaranae.

²³Tsan josanan, nulari Jesuca totesa carinilaquinue tinue. Nulari Jesuca cato cuwapolaquinue tinue yape seiton tsachila yaca corosibi totelaquisa. Junnasa mantimini Diosiri junca natiya wepanatunue. Matulenan Diosi miraminue Jesuca totenola joeque. Diosi paca jominue tsanhiniino joeque.

²⁴Junni yari tsanle puyaca tsono itonan, Diosi ya puyaca jominca mansoncarinue tinue.

²⁵Aman matu to David Diosichi Pilaca chutenato, Jesuchi tenchi pato itsantinue tinue: Miya Diosi numasitiya labe pejochunaeque mirayoe tie tinue. Lachi tsa tede nanchi rato ayudainanan, peleituanae tie tinue.