Mantá Tanla 16:28-40

²⁸Junni tsanhichinasanan, Páblori sonba pato, Tsanhituna! tinue. Jeralelanan chularayoe tinue.

²⁹Junni polisia yaca meráto, tsenoca tanjade! tide donun yabi suwinue. Junsi jelechi jowinponato, Páblobe Sílabechi cale telenhinue.

³⁰Junsi yalaca manlarito, itsantinue: —Amicola, ¿la ti quino jowan? yape Diosi laca se larisa.

³¹Junni Páblola yachi fiquica merasi itsantilatinue: —Miya Jesucrístobe cayaide! Yabe cayainari, nuca se larichunae latinue. Nuchi yabi chuminlanan jeralela jun tsanquenan se lono podeilaichunae tilatinue.

³²Junni Páblola tsantisi, jeralelaca Diosichi fiquica micarilaquinue. Polisiaca, yachi yabi chuminlaca, jera micarilaquinue.

³³Junni jun quepen Diosichi fiquica jera micarinunsi, ya polisia Páblola fudaicaca tsaleto cuwanue. Junsi jeralela mumunhilainue ya polisiabe yachi yabi chuminlabe.

³⁴Junsi Páblolaca yachi yabi tanwito, ano poto cuwanue. Aman yabe yachi yabi chuminlabenan jeralela duque son tilatinue Diosibe cayaicalayoeque.

³⁵Junni mantseinunbi, jun pueblobi mantaminla polisialaca erenue israelita tsachilaca manlarito manheredeque mantato.

³⁶Junni doraminlaca cuidaimin polisiari yalachi fiquica Páblolabe itsanque manpolarinue: —Mantaminla inlabe fiquica erecala joe tinue yape nulaca manlarisa. Junni loto seque manjinilaide! tinue.

³⁷Tsantinunsiri, Páblori polisialabe itsantinue: —Chiquilari israelítala jotonan, romano siudadanolanan jolajoyoe tinue. Tsan josanan, mantaminlari chiquilaca asotaquisa carilaquee tinue tsachila quiralaquinasa. Culpa tanunca o culpa itonunca natiya miituminnan chiquilaca asotaquisa carilaquee. Junsi chiquilaca dosa carinilaquee tinue. Junsi amana chiquilaca nosa manlarichi latinae tinue. Te. Yala patsa inte jato, chiquilaca manlarinola joe tinue.

³⁸Pablo tsantinunsi, polisialari mantaminlachica manjito, jun fiquica jera manpolarilaquinue. Junni romano siudadanola jolajoyoe tilatieque meráto, duque jele tilatinue.

³⁹Junsi Páblolachica jato, seque cuenta quito, perdonailaide! tilatinue. Junsi yalaca manlarito, jun pueblobi nechi manlodeque rocailainue.

⁴⁰Junni Páblola donun yabi nechi manloto, Lídiachica manjilainue Jesucrístobe penenaminlaca manquirabi. Junto yalaca jera seque manpayito, jilainue.