Mantá Tanla 10:3-19

³Junni manca mate tre de la tardete Cornéliochi ura jera quirajanue. Anjeliri Diosi ereca jun jato, Cornelio tinue.

⁴Cornéliori anjelica duque jelenasa quirato, itsantinue: —Miya, ¿niyan jun? tinue. Junni anjeli yabe itsantinue: —Nu Diosibe rocain, poperelachi titiya cuwan, quimin joe tinue. Junnan Diosi nuca mantenhinae tinue.

⁵Junni nuri tsachilaca Jope puebloca ereto, Simón Pédroca jasa caride! tinue.

⁶Yari quidoca cato se suwamin Simónchibi chue tinue lamari quelote. Junni Pédrori inte jato, nu ti quino jonunca jera micarichunae tinue.

⁷Junni anjeli manjinunsi, Cornelio pemanca tsachilaca jade! tinue peyun palucaca soldado mancaca. Cornéliobe mantaimin soldado jominue Diosica tenca camin soldado.

⁸Junni yalabe jera cuenta manpolarinue anjeli cuenta quicaca. Junsi yalaca Jope puebloca erenue.

⁹Aman ayuna nanchi ya tsachila Jópeca jalainasanan, Pedro terasabi lonue. Yotute Diosibe rocaibi lonue.

¹⁰Junnasanan Pédrochi duque ano muquinaminue. Junni Pedro ano acari mérasanan, yachi quirajanue.

¹¹Yoquido lasaraminca quiranue. Junni wa jali tsan patanue. Jali junpalu puntabi tela jun to fecári patanue.

¹²Junni jun jalibi duque animalila pominue. Quela, susu, pini, baro, titiya pominue.

¹³Junni Pedro junca quiranaminnan fiqui meránue. Itsantinue: —Pedro, cupade! In animalilaca toteto fide! tinue.

¹⁴Pedro mantimini beco pato itsantinue: —Te, fino miitoyoe tinue. Miya Diosi, nu mirae. La fitununca numanan fitumanyoe tinue. Chiranlaca fitumanyoe tinue.

¹⁵Junni manaman fiquica manmeránue. Itsantinue: —Diosi ticatiya fintsan suwayoe tinari, nuri junca chiran tituna! tinue.

¹⁶Peman ne jun tsan jun tsannan tilatinue. Junni jalica jamochi manlaricanue.

¹⁷Junni Pedro yachi quirajacaca tenca canato, Diosi yaca tíca micarichi tinamin jonhoncanque tenca canaminue. Tsanque tenca cato chusanan, Cornelio ereca jun tsachila falainue. Simonchi yaca panhato jato, urachi wiruraminlanue.

¹⁸Junni urachi wirurato otito, itsanlatinue: —¿Simón Pedro inte chunan? tilatinue.

¹⁹Junnasa mantimini Pedro yachi quirajacaca tenca canasanan, Diosichi Tenca yabe itsantinue: —Meráde! tinue. Pemanca tsachila nuca quirachique meralarae tinue.