Maliku 6:9-40

⁹mubvale xango zokha, tsono lekani kunyamula bzakubvala bziwiri.”

¹⁰Adawauza pomwe kuti, “Mungafika pa mui,mucitambiriwa khalani pamwepo, mmpaka nthawe yanu yakucoka ikwane

¹¹Penu kumbuto kwinango wanthu an'kutambirani lini, acilamba kubva mafala yanu, pakucoka kwanu mukunkhumule pfumbi la minyendo yanu. Cimweci cin'dzakhala cizindikiro cakuti wa-na mulandu.”

¹²Tsono wakupfundzira wale adayenda, acimbalalikira wanthu kuti asandulike mtima.

¹³Akhacosa mizimu yakuipa mizinji, ndipombo acimbadzoza mafuta wanthu wakudwala azinji acimbawalimbisa.

¹⁴Mambo Herodi akhadabzibva bzimwebzi, thangwe mbiri ya Jezu likhadabveka kwentse-kwentse. Wanthu winango akhati, “Juwau M'batizi adamuka kwa wakufa, ndipopa ali kucita bzidabwiso bzentsenebzi.”

¹⁵Tsono winango akhati, “Ayai, omweyu ni Eliya.” winango akhati, “Uyu ni mpolofiti ninga m'bodzi wa apolofiti wakale.”

¹⁶Pomwe Herodi adabva bzomwebzo, adati, “Adamuka kwa wakufa ule, ni Juwau omwe ndidagwata khosi.”

¹⁷Thangwe Herodiyo kale adatuma acikunda wace kuti akam'phate Juwau, akam'mange acithusa m'kaidi. Adacita bzimwebzire thangwe ra Herodiasi, m'kazi wa Filipe, m'bale wace. na kuti Herodi akhadamulowola m'kaziyo.

¹⁸Ndipo Juwau akhambamuuza kuti, “Nkhuponya Mtemo kupsokhonyola m'kazi wa m'bale wanu.”

¹⁹ndipo Herodiasi akhambawenga Juwau, na tenepopo akhafuna kuti amuphe. Tsono akhataza,

²⁰thangwe Herodi akhambamgopa Juwau, pakudziwa kuti akhali munthu wakulungama acilungama. ndipopo akhamkoya bwino. Akhafuna kumbabva mafala yace, ngakhale kuti akumubva tenepo, akhamala ndzeru naye.

²¹Tsono pa ntsiku yakukondwerera kubadwa kwa Herodi, Herodiasi adawona mphata. Herodi ule adakondza uzokoto, acicemera akulu-akulu wa Boma, na akulu wakutonga acikunda, na atongi wa ku Galileya.

²²Ndipo mwana wacikazi wa Herodiasi adapita, aciyamba kubzina.herodi na wakucemeredwa wale adakomedwa Kwene-kwene nakubzina kule. Pamwepo mambo adauza mtsikana ule kuti, “Undikumbire ciri-centse comwe un'funa, ine ninkupasa.”

²³Na tenepo adalumbira aciti, “Ciri-centse comwe undikumbira, ninkupasa, ngakhale cipande ca umambo bwangu.”

²⁴Mtsikanayo adacoka acikabvundza mai wace kuti, “Kodi ndikakumbire ciyani?” Mai wace adati “Kakumbire msolo wa Juwau M'batizi.”

²⁵Ndipo Mtsikana ule adabwerera mwa kankulumize kwa mambo acimuuza kuti, “nifuna kuti tsapanopa mundipase msolo wa Juwau M'batizi mphande!”

²⁶Na tenepo mambo Herodi adabva ntsisi kwene-kwene. Tsono thangwe ra kulumbira komwe akhadacita patsogolo pa wakucemeredwa, mambo akhafuna lini kupfudza cipangano comwe adacita na mtsikana ule.

²⁷mwakamkulumize adatuma m'bodzi wa acikunda wace, kuti abwerese msolo wa Juwau. ncikunda ule adayenda ku kaidi,acikagwata msolo wa Juwau.

²⁸Adauikha mphande acidzaupereka kwa mtsikana ule, mtsikanayo nkhukauperekambo kwa mai wace.

²⁹Wakupfundzira wa Juwau pomwe adabva bzimwebzo, adabwera acidzatenga nkhawa ire acikapendesa mucigwindza kuthenje.

³⁰Atumiki adabwerera kwa Jezu acimufotokozera bzentse bzomwe adacita na kupfundzisidwa.

³¹Jezu adawauza kuti “Mbatiyendeni kumbuto imbapita lini wanthu, kuti mukapume pang'ono.” Adalewa terepo thangwe wanthu akhali nyalu-nyalu, nakuti iwo akhalibe phata wa kuti angada'kwanisa kudya

³²cadidi iwo adapita mmwadiya acienda okha kumbuto komwe kukhalibe wanthu

³³Tsono wanthu azinji adawaona pakucoka, aciwazindikira. Na tenepo adathamanga na n'gambo ire kucokera ku mizinda yentse, acitoma kufika, Jezu na wakupfundzira wace wale akhanati kufika.

³⁴Pamwe Jezu adacoka mmwadiya, adaona mthithi ukulu wa wanthu. Adawabvera ntsisi, thangwe wakhali ninga mabira yakusaya makabusa, na tenepo adayamba kuwapfundzisa bzizinji.

³⁵Nthawe ya kumaulo wakupfundzira wace adadzamuuza kuti, “Kuno nkhuthengo, ndipo kwadoka

³⁶Auzeni wanthuwa wayende,wakadye m'mii yomwe iri pafupiyi kuti akagule cakudya.”

³⁷Tsono Jezu adawauza kuti, “Imwepo apaseni cakudya.” Iwo adati, “tsono kuti wakwane wathuwa, pafunika kuti tikagule mkate wa kobiri za parata zikwanira madzana mawiri kuti tidzawadyese wentsewa!”

³⁸Na tenepo Jezu adawabvundza kuti, “Muna mikate mingasi? Ndokoni mukaone.” Adayenda kukaona ndipo adati, “Iripo mikate mixanu na ntsomba ziwiri.”

³⁹Ndipo Jezu adawawuza kuti, wentse wakhale pantsi kabugwe-kabugwe pakapinga.

⁴⁰Cadidi wanthu wale wadakhala pantsi,bungwe linango wanthu dzana, linango wanthu makumi maxanu.