Maliku 5:20-42

²⁰Munthuyo adaenda cadidi aciyamba kumwaza mafala ku mbuto zentse za mizinda khumi,* bzire bzomwe Jezu adam'citira. Pakubva bzimwebzo wanthu wentse adadabwa.

²¹pomwe Jezu adabwerera nga'mbuire na mwadiya, atafika mthithi wa wanthu udagumana mphepete mwa thawale pomwe pakhana iye.

²²padadzafika munthu winango, dzina lace Jaire, omwe akhali m'bodzi wa akulu wa nyumba yamapemphero,ndipo iye adaona Jezu, adagodama mminyendo mwace,

²³acimudandaulira kwene-kwene: Aciti, “Ndaphata minyendo, mwana wangu wam'kazi ali pafupi kufa. Penu mungakwanise kukam'sanzika manja kuti alimbe acikhala na moyo.”

²⁴Jezu adayenda naye, Wanthu azinji adam'tewera akhambayenda mwa kum'psinyiza.

²⁵Tsono pakhana m'kazi winango omwe akhambabonera na matenda yakucoka mulopa kwa magole khumi na mawiri.

²⁶Iye akhadayezerewa na alapi azinji,na tenepo akhadadzonga bzentse bzomwe akhanabzo tsono akhalimba lini ndipo dzikhalemwa

²⁷M'kaziyo pakubva mbiri ya Jezu; adayenda pamthithi wa wanthu ule, acipapatiza mpaka kukafika na kumbuyo kwa Jezu, acikamkhuya cakubvala cace.

²⁸thagwe akhambakumbuka tenepa:“Ningandokukhuya bzakubvala bzace bzokha, nilimba.”

²⁹Ncadidi nthawe yomweyo matenda yace yadamala, mwenekaciroyo adabva mthupi mwace kuti walimba.

³⁰Pamwepo Jezu adabva kuti mphambvu zinango zacoka. Ndipo adazungunuka aciyang'ana wanthu wale aciwabvundza kuti, “Kodi mbani wandikhuya bzakubvala bzangu?”

³¹Wakupfundzira wace adamutawira, mwekha muli kuwona kuti wanthu ali kukupsinyizani, ncadidi mungabvundze kuti, ‘Mbani wandikhuya?’

³²Tsono Jezu adayang'ana-yang'ana m'mphepete kuti aone omwe wacita bzomwe bzire.

³³Na tenepo mkazi ule adabva mantha aciyamba kutetemera, thangwe akhadziwa bzomwe bzikhadacitika kwa iye. Adabwera pafupi, acidzigwesera kutsogolo kwa Jezu, acimufokotozera bzentse mwa cadidi.

³⁴Jezu adamuuza kuti, “ Mwana wangu, cikhulupiriro cako cakulimbisa. Ndoko na mtendere. watsudzuka pa matenda yako.”

³⁵pomwe Jezu akhalewa-lewa, kudafika wanthu kucokera kunyumba kwa mkulu ule wa nyumba ya mapembero. kudzamuuza kuti, “Mwana wafa. thangwe lanyi mulikuwanesa pomwe Misiriwa.”

³⁶Tsono Jezu alibe kubziphatisa basa bzomwe akhalewa wanthuwo.iye Adamuuza mkulu ule kuti, “Leka kugopa , iwe kukhulupirira basi.”

³⁷Ndipo alibe kubvumiza kuti winango amutewere iye, kupambula Pedru, na Tiyagu, na Juwau, m'bale wa Tiyaguyo.

³⁸Pomwe iwo adafika kunyumba kwa mkulu ule wa nyumba yamapemphero Jezu adaona phiringo la wanthu omwe, ali akhalira acimbakuwa.

³⁹Iye adapita, aciwabvundza kuti, “Thangwe ranyi muli kucita phiringu na kukuwa Mwanayu alibe kufa adandogona .”

⁴⁰Pamwepo wanthuwo adayamba kumuseka.iye adawacosa panja wentse , acitenga baba na mai wa mwanayo,na omwe akhali naye wale, acipita kucipinda kukhana mwana ule.

⁴¹Ndipo adaphata boko la mwanayo acimuuza kuti, “Talita, kumi.” (Ndiko kulewa kuti, “Mtsikana-we , ndiri kukuuza kuti muka.”)

⁴²mthawe ibodzi-bodziyo mtsikanayo adamukadi, aciyamba kufamba. iye akhana magole khumi na mawiri. Pamwepo wanthu wale adadabwa kwene-kwene.