Maleko 9:21-48

²¹Yesu ya fatiꞌoi iyen, Atasina yai ya fatubu? Gwama tamana iyen, Ma kiukiuna ya fatubu.

²²Fuya ouꞌouli ya pei lawen ai oyagi alaꞌalana yo ai hoꞌowa be bena ya wunui. Aee–, yena gonowam u nuwatohatohaimai be u saguhimai.

²³Yesu iyen, Sidohana be wa liba, uwen, “Yena gonowam?” Tau sunuma gonowana ginauli mahudoꞌidi ya ginaulidi.

²⁴Yo fede gwama tamana ya yoga lau, iyen, E kawawananaha! In moho egu kawawananaha hige i laꞌi, be u saguhigu.

²⁵Pwalu ya suꞌusuꞌuma Yesu lebena yai yo fede ya libalau yaluwa heyaheyayana lisina iyen, Um yaluwa doꞌodoꞌona yo libaliba gesana, E falibam gwama ni u kalamahano afulen na tabu u luhu fuyoi.

²⁶Yaluwa heyaheyayana ya ꞌwalaꞌui na gwama ya kamfafatabubu na ya kalamahano. Gwama itaꞌitana doha doga peꞌipeꞌina be mahudoꞌidi tiyen, Haꞌa ya peꞌi!

²⁷Yesu ya abilau gwama nimana yai be ya faꞌobiyo.

²⁸Habahim, sa lau luma ganahewana na ana hewahewali sa fatiꞌo modigafui, Sidohana be yaluwa heyaheyayana ni hige ai liba dui?

²⁹Yesu iyen, Hige somo laꞌi gonowana. Lauꞌuꞌula moho gonowana yaluwa heyaheyayadi doha ite ya duidi sa lau ganamuli.

³⁰Nuꞌu ni sa lau afulen na sa lau Galili. Yesu hige i fanuha bena sai hesa i sibai mate in somo yai,

³¹paꞌana tau famuli watanina, ya fatalahadi. Ya libalau lisidi iyebom, Doga Natuna haba sa fele lawen dodoga dodoga nimadi yai, be sa wunui na lahai fafaihonana yai haba ya mwahuli fuyo.

³²In moho liba te aniyona hige ti nuwatuhu lobahi. Sa ꞌwasabu be hige ti fatiꞌoi.

³³Kapanayum nuꞌuna yai sa mahano lau be sa lau luma ganahewana. Habahim Yesu tau famuli watanina ya fatiꞌoidi iyebom, Edaꞌeda yai somo ami faibayahoꞌen?

³⁴In moho hige alinana ti bui paꞌana edaꞌeda yai ibodi sa faifaibayaho mate sai haba ya hasai wananaha.

³⁵Yesu ya taꞌai na habahim ana hewahewali safuhudohudoꞌi luwaga ya yoga gogondima na ya falibadi iyen, Yena sai ya fanuha ya bwaꞌi mate bena ya mulita wananaha yo in mate dodoga mahudoꞌidi edi tau lau fayofayo.

³⁶Yo fede wawaya kiukiu hesa ya faꞌobiyo atiꞌatipudi yai. Ya fagado bainewaꞌen na ya falibadi iyen,

³⁷Sai laꞌi hesagu yai wawaya doha itete ya yoga hitin mate, yau hinaga ya yoga hitinigu, yo sai ya yoga hitinigu, mate tau fatamaliguma hinaga ya yoga hitin. Hige ibogu moho!

³⁸Diyon ya libalau Yesu lisina iyen, Tanuwaga, doga hesa ꞌe ita hesam yai demoni ya liba duidi. Yo fede ꞌe lau biliyen paꞌana in hige i laulau watanida.

³⁹Yesu ya falibadi iyen, Tabu au lau biliyen paꞌana hige sai laꞌi noꞌo laulaudi hesagu yai i lau ginauli na haba feula i liba faheyayagu.

⁴⁰Sai hige i ꞌwaiyoꞌoꞌeda mate eneheda.

⁴¹E faliba dudulaimiu mate yena sai hoꞌowa ya felemiu, paꞌana umi enehegu, haba maisana ya abi.

⁴²Yena sai hesa wawaya kiukiu ya foya ponoli be ena sunuma ya fagogoma, loholohona mate dogana ai gadona umeꞌehu laꞌilaꞌi sofana habahim fakapulolona ai gabogabo.

⁴³Ibe nimam hesa ya falau ponom be heyaya wa ginauli u ibo motu! Ya loholohona ma nima eseꞌesegam, haba wa mwahuli. Hige i loholoho ma nima luwaluwagam sa lawem oyagi alaꞌalana hige anadan.

⁴⁴Amainiya, hulohulo ibege ti peꞌi yo oyagi alaꞌalana ibege ti fatuwa funuhi.

⁴⁵Na ibe ahem hesa ya falau ponom be heyaya wa ginauli, u ibofahi! Ya loholoho ma ahe eseꞌesegam, haba wa mwahuli. Hige i loholoho bena ma ahe luwaluwagam sa pei lawem ai oyagi alaꞌalana.

⁴⁶Amainiya hulohulo ibege ti peꞌi yo oyagi alaꞌalana ibege ti fatuwa funuhi.

⁴⁷Yo ibe matam hesa ya falau ponom be heyaya wa ginauli u limofahi! Ya loholohona ma mata eseꞌesegam, haba wa lau Yaubada Aba Baꞌisa. Hige i loholoho ma mata luwaluwagam sa pei lawem ai oyagi alaꞌalana.

⁴⁸Amainiya hulohulo ibege ti peꞌi yo oyagi alaꞌalana ibege ti fatuwa funuhi.