Maleko 6:13-41

¹³Yaluwa yabayababadi gwaudi se hededehepesadi, na bunama unai taukasikasiyebwa gwaudi se heyausidi yo se henamwanamwadi.

¹⁴Heloda wasawasa Yesu wasana ye lapui, matawuwuna Yesu hesana wa tamowai maudoidi kabina se kata. Hekadi se wane, “Nuwana Yowane Babatiso iya boita unai ye toloꞌuyoma, unai ede paisowa gigigigibwalidi ye hemasalahadi.”

¹⁵Hekadi se wane, “Nuwana Eliya”, yo hekadi se wane, “Nuwana peloweta hesau, yo doha peloweta bagubagunadi wa hesau.”

¹⁶Na huyana Heloda wasa wa ye lapui meta ye wane, “Yesu ede Yowane. Iya gadona ya boliyako, na boita unai ye toloꞌuyoma.”

¹⁷Matawuwuna Heloda ye bom ye hededeyako unai Yowane se hai na se kau na se tole numatutugudu unai. Yona ginaulina matawuwuna ede Helodiyasi. Helodiyasi meta Heloda yona saeya Pilipo mwanena, na Heloda ye tawasolai.

¹⁸Unai Yowane ye hedehededelau Heloda unai, ye wane, “Kowa laugagayo ku utusi, taba tabu kam kaha mwanena ku tawatawasolai.”

¹⁹Unai ede Helodiyasi ye kouyalayalakalili, na ye henuwa bena Yowane ye unuhemwaloi. Na iyamo nige gonowana ye ginauli,

²⁰matawuwuna Heloda Yowane ye kitalobai meta tamowai dudulaina yo tamowai tabuna, unai ye hekasisikaliliyei yo ye kitahetetenamwanamwaei. Huya badobado Heloda Yowane yona hedehedede wa ye lapuidi meta nuwana ye haikabi, na iyamo ye henuwakalili bena ye lapulapulau Yowane unai.

²¹Nige bayaona kabo Helodiyasi yona nuwatu wa mayadaina ye lage. Heloda yona huyalabasi unai henuwaisini ye ginauli maiyanao tamowai lakilakidi yo iyala babadadi yo Galili babadadi hekadiyo.

²²Helodiyasi natuna waihiu, iya kabo ye lau siya matadiwai ye sobu. Heloda yo kana taumanao nuwadi se namwakalili, unai wasawasa wa ye hededelau wawaya waihiu wa unai, ye wane, “Kowa kam henuhenuwa saha? Kabo ya ginauli, yo kabo ya leyawa.”

²³Na ye hededehesunuma ye wane, “Ginauli saha ku kaibwadai meta kabo ya leyawa yom. Gonogonowana doha yogu basileiya ta tehana, ena ku henuwa.”

²⁴Waihiu wa kabo ye lau sinana unai ye henamai, ye wane, “Saha kabo ya kaibwadai?” Helodiyasi ye wane, “Yowane Babatiso kulukuluna.”

²⁵Ede ye laumwamwayau ye uyo wasawasa wa unai na ye kaibwadalau unai ye wane, “Yau yogu kaibwada ede teina: Mahana ta unai Yowane Babatiso kulukuluna gaeba unai ku usaei na ku haiyama.”

²⁶Wasawasa wa nuwana ye yababakalili, na nige saha hesau ye hedede, matawuwuna kana taumanao yona hedehededehesunuma wa se lapuiyako.

²⁷Wasawasa wa taukaiꞌunu hesau ye lauhelili ye wane, “Yowane kulukuluna ku baheiyama.” Iya kabo ye lau numatutugudu unai na Yowane gadona ye boli utusi

²⁸na kulukuluna wa gaeba unai ye usaei na ye baheiyama ye mosei waihiu wa unai. Na ye baheilaei sinana wa unai.

²⁹Huyana Yowane yona hekahekatao wasa se lapui ede se laoma, taugaibuna mo se bahei se laei bwayabwaya unai se tole.

³⁰Apostolo se lagegogoma Yesu unai, yodi paisowa yo yodi lauhekata wasadi yona se hedehedede.

³¹Na tamowai se badokalili se hemohemode, unai nige gonowana bena se kaikai. Ede Yesu ye wane, “Kwa laoma, kita ta bom ta lau teha hesau unai. Temenai kabo ta kaiyawasi huyakubwakubwa.”

³²Siya se bom waga unai se gelu se lau balabala hesau unai.

³³Yodi kabalau ne meta tamowai gwaudi se kitayako yo se kitalobaidiko. Unai magai maudoidi se laugabaedi na se heloi na se lagebaguna Yesu yona kabalage wa unai.

³⁴Yesu kabo ye dunasae ede bodalakilaki ye kitadi na ye katekamkamnaedi, matawuwuna ede siya doha mamoe nige taukitahetetedi. Unai kabo ye hetubu ginauli maudoidi ye hekatadi.

³⁵Mahana ye talukeo, ede yona hekahekatao wa se lau iya unai na se wane, “Teina ta balabala, yo mahana ye laukalili.

³⁶Gonowana taba ku hetamalidi se lau dedekawai kasa gagilidi yo magai udiyedi na kadi kai se hemaisa.”

³⁷Na Yesu ye hededelau udiyedi ye wane, “Komiu kadi kai kwa moseidi.” Siya kabo se henamaiyei se wane, “Haedi kabo denali 200 ka hai na kadi kai ka lokune yo ka hekaidi?”

³⁸Unai kabo ye wane, “Hage, kwa kita, pwalawa hisa kalimiuyena?” Apostolo kabo se lau pwalawa se wase na se lobaidi ede se uyoma Yesu unai na se wane, “Pwalawa haligigi yo yama labui.”

³⁹Kabo ye hededelau udiyedi ye wane, “Tamowai maudoidi kwa hedede bena se tuligogoi lagau ne unai.”

⁴⁰Kabo se tulinamwanamwa, pwalu hekadi 100 yo pwalu hekadi 50.

⁴¹Yesu kabo pwalawa haligigi yo yama labui ye haidi, ye kitasae galewa unai, na Yaubada ye lautokiyei. Na kabo pwalawa ye kihihegahegagili na ye moseidi yona hekahekatao kalidiwai. Siya kabo se soiyei tamowai wa kalidiwai. Na hinage yama labui ye kihihegahegagili na ye moseidi se kai.