Malasu 7:8-22

⁸Amo goi da uda afadafa ea diasu gadenene misini,

⁹eso amola sa:i dagoi gadenene gasi dagoi.

¹⁰Amo uda e da hina: da:i bidi lasu uda defele abula ida:iwane ga:i amola e da hou ilegelalu.

¹¹Goe uda amo da gasa fi hamosu uda amola gogosiasu hame dawa:i. E da moilai logoga lalusu.

¹²E da logoga udigili lalu amola bidi lama:ne diasu labe soge ganodini amola dunu hogosa lalala.

¹³Amola na ba:i, amalalu amo uda e da goi ayeligi amo ea galogoa amoga ea lobo la:boloi dagoi amo lalu e da amo goi nonogonanu e hedolowane si damana ba:i amalalu e amane sia:i,

¹⁴“Wali na da gobele salasu hamoi amola amo gobele salasu hu da na diasuga diala.

¹⁵Amaiba:le na da na diasu yolesili di hogola misi amola wali na da di ba:i dagoi.

¹⁶Na da hedolowane midunusa: diaheda:su ida:iwane hahamoi dagoi amo dedebosu abula ida:iwane gala amo da na Idibidi soge amoga gaguli misi.

¹⁷Na da amo ganodini manoma ida:iwane gala amo me, a:lou, sinamone amola amo manoma gabusiga: ida:iwane gala fafai da:iya sogadigi.

¹⁸Misa! Na amola di gilisili hedelala soge hadigimu. Ani da gilisili nonogomuba:le hahawane bagade ba:mu.

¹⁹Di da na dunuba:le mae beda:ma. E da soge sedaga asi esala.

²⁰E da su bagade gaguli asi. E da hedolo hame bu misunu. E da esala hi aduna aligimu.”

²¹Goe uda ea sefe sia: bagadewane sia:beba:le, goi ayeligi da dafai dagoi.

²²Amo dunu e da amo sia: nababeba:le, e da hedolowane amo uda fa:no bobogele diasuga asi. Fedege sia: e da bulamagau bogoma:ne fasu sogebi amoga oule ahoasu defele asi. Fedege sia: eno e da ‘dia’ ohe amo da sani sa:ima:ne hahawane ahoa amo defele asi.