Malasu 23:1-34

¹Di da mimogo dunu ali gilisili ha:i nasea, amo esega noga:le dawa:ma.

²Di da ha:i manu bagade manusa: dawa:sea, di ha:i buludili mae moma.

³E da dia hou ogogole adoba:sa:besa:le, mae uasuli moma.

⁴Di da noga:le molole dawa:ma. Di da liligi bagade gagumu hanaiba:le hawa: hamonana, dia gasa gufia:ne gala:mu da defea hame.

⁵Dia muni amo ea ebelebe da hedolodafa si abo gelebe agoai ba:sa. Amola amo da buhiba ea ougia hinabo aligili wa:leahoabe agoai.

⁶Di da gegenane uasuli nasu dunu amo ea ha:i manu ida:iwane mae uasuli moma.

⁷Amo gegenane uasuli nasu dunu da eso huluane amo ha:i manu ea bidi bagadega lai amo dawa:lala. E da aowalale amane sia:sa, “Defea! Bu bagade ha:i amola waini moma!” Be e da ogogole sia:sa. Ea houdafa da ea asigi dawa:su defele gala.

⁸Di da dia mai liligi amo bu isole fasimu. Amola dia ema dabuagado ofa:su sia: da ogogole ofa:su sia: udigili ha:digi agoai ba:mu.

⁹Di gagaoui dunuma moloi dawa:su sia: amo mae sia:ma. E da dia sia: ida:iwane dawa:mu da hamedei galebe.

¹⁰Musa: soge alalo legei amo maedafa gua:ma. Amola guluba: mano ilia soge amo mae wamolama.

¹¹Bai Hina Gode da ilima gasa bagade Gaga:su dunu esala. E da ilimagale, dima fofada:mu.

¹²Dia olelesu dunu amo ea olelebe hamugini nabima amola noga:le hamoma.

¹³Dia mano da wadela:le hamosea, ema hedolo se ima. Dawa:ma:ne fasea, amo mano da hame bogomu.

¹⁴Be amo dawa:ma:ne fasu da ea esalusu gaga:mu.

¹⁵Nagofe! Di da dawa: ida:iwane lasea, na da hahawane bagade ba:mu.

¹⁶Di da dawa:su ida:iwane sia: sia:sea, na da dima nodone dawa:mu.

¹⁷Wadela:i hamosu dunu ilia hamobe amoga hamomusa:, mae mudale hanama. Be eso huluane Hina Godema nodone dawa:ma.

¹⁸Amaiwane hamosea, di da hahawane esalumu.

¹⁹Nagofe! Nabima! Molole dawa:ma amola dia esalusu noga:le ouligima.

²⁰Di da adini bagade nasu dunu amola ha:i fufuluba nasu dunu ilima mae gilisima.

²¹Feloai dunu amola ha:i fufuluba nasu dunu da hedolo liligi hame gagui dunu agoai ba:mu. Dia da ha:i nasu amola golasu amo fawane hamosea, di da gagadelai abula amo fawane ga:i ba:mu.

²²Nagofe! Dia ada ea sia: noga:le nabima! E da di hame hamoi ganiaba, di da hame esalala:loba. Dia ame da da:i hamosea, e da di noga:le ouligiba:le, ema nodoma.

²³Moloidafa hou, olelesu, molole dawa:su amola asigi dawa:su ida:iwane gala. Amo liligi bidiga lamu da defea. Be lai dagoiba:le, eno dunuma mae alofele lama. Bai amo liligi lasu defei da gadodafa.

²⁴Dunu moloidafa ea ada da hahawane bagade. Dia gofe da molole dawa:su hou lai galea, di da ema nodone dawa:mu da defea.

²⁵Nagofe! Dia ada amola ame da dia hou nodone ba:ma:ne, hou moloiwane hamoma. Dia ame hahawane ba:ma:ne hamoma.

²⁶Nagofe! Hamugini noga:le nabima. Na esalebe defele, dia esaloma.

²⁷Uda hina: da:i bidi lasu amola eno wadela:i hamosu uda da bogosu sani agoai gala.

²⁸Ilia da wamolasu dunu agoane di wadela:lesimusa: desega lela. Ilia agoane hamobeba:le, dunu bagohame da ilia udama baligi fa:sa.

²⁹Nowa dunu da waini hano bagade nasea amola gaheabolo adini hogoi helesea, e da bagade da:i diosa amola mosolasu hamosa, amola eso huluane egasa. Ea si da maga:me gasagala:i amola ea da:i da udigili fofonomane gagai.

³¹Waini hano da ulasuyei amola faigelei gelabo ganodini bubunuma heda:sa amola noga:le da:gisa. Be dafama:ne adoba:sa:besa:le, waini hano manusa: mae magesa:ima.

³²Waini hano nalu, diahabe, wa:legadole, di da saya:bega gasomai agoai ba:mu.

³³Dia da:i da felowai agoai ba:le, noga:le dawa:le sia:mu gogolei ba:mu.

³⁴Di da dusagai ganodini fila heda:le ahoasea da dia hagomo sasaleabe, amo agoai ba:mu.