Maku 6:9-40

⁹Asapatũkõ rokẽ amurutoko, toiro rokẽ kamisa amurutoko.

¹⁰—Mame pata pona tooehse awahtao xine, “Jepe, ytapyĩ taka onyhtokose. Ymaro matose otuhnõko,” karyhtao rokẽ eya xine imaro xine mytotatose. Moroto rokẽ mehtatose imepỹ pona oytorykõ ponãmero.

¹¹Mame imehnõ typataka xine oytorykõ se pyra toto ahtao, õmirykõ etary se pyra roropa toto ahtao mepuhsasakatatose oytorykõ ropahtao inenerykõme turumekarykõ oya xine enetupuhtohme eya xine, tykase Jezu typoetory tõ turuse.

¹²Morarame toytose toto Ritonõpo omiry poko imehnõ amorepase. —Oorypyrykõ irumekatoko emero porehme, tykase toto imehnõ amoreparyme tyya xine.

¹³Joroko tõ tutũtanohpose roropa eya xine tuhke. Kurãkõkara tukurãkase roropa eya xine. Zupuhpyrykõ pona ikasery panõ tyrise eya xine toto kurãkatohme ropa.

¹⁴Morarame Erote a morohne totase, Jezu tõsekãtose exiryke emero pata tõ punero. Ynara tykase toto toitoine Jezu poko, —Mokyro ahno ẽpurihkahpono. Tõsemãse ropa mana toorihxĩpo. Morara exiryke imehnõ kurãkãko mana, tykase toto ipoko.

¹⁵Mame imehnõ ynara tykase, —Mokyro Eria, tykase toto. Imehnõ roropa ynara tykase, —Mokyro Ritonõpo poe urutono, pake ahtao Ritonõpo poe urutonõpo panõ mokyro, tykase toh repe ipoko.

¹⁶Mame morara kary etaryke tyya ynara tykase Erote, —Arypyra. Otarãme João zuhkahpyry tõsemãse ropa mana, tykase ynororo, João tuhkapose tyya exiryke.

¹⁷Ãpuruhpyry taka tõmapose kynexine pake eya Erotia omi poe, takorõ Firipe pyty omi poe. Takorõ pyty maro torẽnase ynororo tõseporyxĩpo.

¹⁸Morara exiryke João tõturuse eya repe, —Ãkorõ pyty maro torẽnase awahtao popyra mase, tykase ynororo eya repe.

¹⁹Morara exiryke Erotia João zehno toehse yronymyryme.

²⁰Yrome João etapapory se pyra Erote kynexine zuno toexiryke, kure exiryke, otyro kara João exiryke. Morara exiryke ipynoto sã kynexine. João omiry etaryhtao tyya toepohnohse repe, yrome otara se sã rokẽ toehse ynororo.

²¹Zomory João omiry etary se toehse ynororo. Morarame Erote aniwesario toehse. Tope tõ toahmase eya, tuisa tomo, pata esamo, Karireapõkomo, enara, toto otuhtohme tymaro.

²²Erotia ẽxiry roropa tooehse morotona wase. Mokyro eneryke tyya xine tãkye toehse morotõkomo, Erote, tyneahmatyã maro zua kure exiryke. Tuakehse ahtao ynara tykase Erote nohpo a, —Oturupoko ya õpenery se awahtao. Otytyko se awahtao ekarõko ase oya.

²³Jesary apiakãko ase irãnakuroko oya ekarotohme. Mãpyra jomihpyry omipona pyra tokurehse jahtao, ah Ritonõpo juãnohno, tykase ynororo eya.

²⁴Mame morara kary etaxĩpo tyya toytose nohpo oturupose tyse a, —Oty se ãkohxo ke ha aja Erote a, tykase ynororo tõturupose tyse a. Mame ynara tykase jeny eya, —“Ahno ẽpurihkane zupuhpyry se rokẽ ase,” kaxiko eya, tykase jeny tõxiry a.

²⁵Mame toytose ropa Erote a ynororo. —Ahno ẽpurihkane zupuhpyry se rokẽ ase paratu ao, tykase ynororo eya.

²⁶Moro etaryke tyya sekese pyrah tykase Erote, João zuhkapory se pyra toexiryke. Tãtasamase ynororo repe. Yrome tõmihpyry poko tutuarõtase ynororo. “Õpenery ekarõko ase oya. Jesary apiakãko ase irãnakuroko oya ekarotohme,” katopõpyry poko tutuarõtase ynororo. Katonõ tõ netaryme morara tykase toexiryke roropa,

²⁷João zuhkane tonyohse eya ãpuruhpyry taka.

²⁸Zupuhpyry tonehse toto a paratu ao ekarotohme nohpo a. Mokyro a tarose tyse a rahkene.

²⁹Morarame João poetohpyry tomo a ekary totase tyya xine ahtao ekepyry poko tooehse toto zonẽtohme tyya xine.

³⁰Morarame Jezu nenyohtyã tooehse ropa toto. Emero toerohtopõpyrykõ poko tõturuse ropa toto, imehnõ amorepatopõpyry poko roropa tyya xine.

³¹Morarame ahno imoihme kynexine moroto. Oehnõko morotona toh kynexine. Oseosesahpokoxi ãko toh kynexine. Jezu otukuhtome toh kynexine typoetory tõ maro. Morara exiryke ynara tykase Jezu typoetory tomo a, —Ehmaropa tokare pyra. Soserematatose, tykase Jezu typoetory tomo a.

³²Mame toytose toto ahno esaka pyra kanawae.

³³Yrome tonese ynororo tuhkãkomo a aytoryhtao. Morara exiryke tutuarõtase toto. Zuapõmase toh toytose tururume pata tõ poe, tuna ehpikuroko.

³⁴Morarame towomyryhtao kanawae ahno imoity tonese eya. Toenupunase ynororo toto poko okyno tõ sã toto exiryke, tosẽkãkara samo. Morara exiryke tamorepase toto eya itamurume.

³⁵Morarame kokonie pukuro toehse ahtao ipoetory tõ tooehse eya. Ynara tykase toto Jezu a, —Ahno esary kara sero. Moxiã aropoko ropa pata tõ pona. Kohmãnõko nase.

³⁶Tynapyrykõ epekahtohme aropoko toto, tykase toh repe.

³⁷Yrome Jezu a tozuhse toto, —Autuhmatoko toto, tykase ynororo eya xine. —Oty ke? tykase toto. —Yna ytory se hma wyi epekahse? Tineru 200mã ke wyi topekahse ahtao ipune pyra mana, ahno tuhke exiryke, tykase toto tosẽkomo a.

³⁸—Otãto wyi nahe? Enetoko keh aporo, tykase ynororo eya xine. Mame toytose toto enese. —Omame wyi pisarara nae nase. Kana roropa asakoro nae nase, tykase toto eya.

³⁹Morarame typorohkapose toto atakenaka ona hpoty htaka.

⁴⁰Typorohse toto emero.