Maka Ulakaru 2:16-38

¹⁶Po meije lulu Alla Eni lepate rebe nabi Yoela ilekire be,

¹⁷‘Kena nusare koho nere Au ono Ro Misete Ikbasae pusue tamata. Saisa rebe Au betekele ete imi kwete mokwai kai kwete binaru esi betekele ete imi. Kai imi kwete belukaru esi selu saisa rebe Au aseluke eteise. Kai imi elaka inaiju esi kmanie saisa rebe Au rilukele eteise.

¹⁸Ete Auku tamata makerikaru lekwe, mokwai pise bina Au ono Ro Misete Ikbasaesi, hoko esi lepa saisa rebe Au suka esi betekele.

¹⁹Au ono tanda herane ndete lanite kai mei nusa, Au ono lalakwe kai auwe kai auwe kweini.

²⁰Kena petu elake kai misete rebe Tuhane Ipleta tamatare eono mosare, lemataije mele titinai kai bulane elala saka lalakwe.

²¹Kena petu mere sire rebe Ikoti ampune bei Tuhane hoko isupu ampune kai isupu hlamate.’

²²Kwali betaya imi tamata Israela! Imi lene mimise loko au beteke meije: Alla Iono imi nati be Iriluke kbasa ete Yesuse bei Nasarete. Mere imi selulu kena yelu rebe piasare uono mo rebe Alla Iono Yesuse Ionolu ete imire. Pusue meru imi rekwalu peneka.

²³Lulu Alla laleI ruaI, Iriluke Yesuse ete imi. Imi sebeie tamata neunaru esi pakuI ahlake ai bataije hoko mere sakesa kai imi bunuIje neka.

²⁴Po Alla Iono Ikwana suike bei tamata matalaru. Imata peneka po Alla Iono Ikwana suike le imata eti pelare saisa mo.

²⁵Bei akmena sa, Kamale Dauta ibeteke Yesuse Ikwana suike be: ‘Au rekware Tuhane Irakaku kai Itapaku mimise leke saisa eatia au yake.

²⁶Hoko laleku ndina kai au isikeNi, kai au rekware be kena au matare au supu misete.

²⁷Le Asebeie au mata eti pela mo, kai kena au rebe hlaleke loko Ale, kena au matare Aono nanakwalaku atia mo.

²⁸Atiluke lalane ete au kena au supu rue mise, kai laleku ndina le Arakaku.’

²⁹Kwali betaya imi, meije au beteke iteki ntuane mena Dauta ete imi. Imata kai hnoukeni peneka, eni lataije eti meije ere me sa.

³⁰Alla Ibeteke kai Ila etei peneka be sae bei eni anubuaru tatike pine Alla Ibitikeni kena kamale. Le Dauta irekwa Alla Ibeteke mere kai ile nabi lekwe, hoko irekwa saisa rebe Alla Ionore.

³¹Dauta irekwa be namake Maka Hlamate rebe Alla IbetekeNi, Ikwana suike bei matale. Hoko Dauta ibeteke be: ‘Maka Hlamate, Alla Isebei Imata eti pela mo. Nana kwalaIje pulue kai atia mo.’

³²Maka Hlamate mere Yesuse. Ile mere pine Alla Iono Ikwana suike bei matale. Ami pusuma pine selu Ikwana suike.

³³Kai kena Alla IbitikeNi kena Irue sapleuke Eni makwanale, Alla Iriluke Ro Misete eteI lupe akmena Ibetekele. Kai Iono Ro Misete Ikbasae ami lupe imi selulu kai lenelu meije.

³⁴Dauta ibeteke ruai mo le isa lolete surga mo, po ibeteke Yesuse be: ‘Alla Ibeteke loko auku Tuhane be,

³⁵Arue sapleuke Auku makwanale eti Au ono Amu musuaru esi lene lokoMu.’

³⁶Hoko pusue tamata Israele suke rekwa mimise be Yesuse rebe imi pakuI ahlake ai bataije, Alla IbitikeNi kena Tuhane kai Maka Hlamate.”

³⁷Kena esi lene Petruse eni lepata meru hoko kaplalesi titinai. Eleki esi beteke loko Petruse kai Yesuse Eni maka ulaka maketaru be, “Kwalia, hoko saisa rebe suke ami onore?”

³⁸Petruse iralakesi be, “Imi naku imi dosaru kai imi supu baptise kena supu tanda be lulu Yesuse leke imi dosaru supu ampune. Hoko Alla Iono Ro Misete Ikbasae imi.