Mak 8:6-16

⁶Evus, Iesu viteni min meatin keil vit avatondan. Kur veret, san masmasien min Ahi, ka vul vahasi. Evus, sasani min meatin teindan elu (12) onen vit avatiti min meatin keil, ka amumoni.

⁷Ka mesau havivis akur kati. Iesu san masmasien min Ahi ven mesau, ka viteni min onen keil keke avatiti min meatin keil.

⁸Meatin vasi keil akanian vinvin, vange vil. Evus, meatin teindan elu (12) onen akur mari veiat oulu (7) ka alah revi soke anien koa mules.

⁹Meatin taosen ehat (4000) akanian en avong enek. Akanian evus, Iesu sila keil avaha ris en teim se.

¹⁰Evus, Iesu vut va en vot ral min teindan elu (12) onen ka uva amu koteh Mari Oai ten out Kaleli, uva en out sav koa avise en ‘Dalmanuta.’

¹¹Farasi keil umai ven Iesu ka amul amusel mini. Keil e vati avahotin anatinien usili. Sakini, avisi keke voumon etai merikel vatal min keihoen ten out nesa avalesi.

¹²Navong keil avisi mukok, Iesu longe tisa ka viteni min keil vit, “?Vensa meatin keil ten avong kosa avis etai merikel keke avalesi? !Ka vuo, nirmumon etai tounah ilesi vasakin keil avakur anatinien enau vaka ien!”

¹³Sakini, Iesu lokovein keil, vut va en vot ral min meatin keil onen, ka uva en usi oai.

¹⁴Navong keil uvut en vot, meatin teindan elu (12) onen arendem kilea keke e vobongeni avakur kat veret vavinvin en keil, akuri heite tas.

¹⁵Ka navong amul veah en vot, Iesu sel kat keil vit, “Mihelei kat kami, mihelele revi en is onen Farasi keil ral min is onen Asuv Herod.”

¹⁶Koanik sakin keil amul aselus min keil eris aviteni avit, “Kei viteni mukok veni rorkurtei veret vatal min ir.”