Mak 8:10-27

¹⁰Angetka miaŋgöreŋök gwarekurupŋi yembuk waŋgenöŋ öŋgöba distrik qetŋi Dalmanuta miaŋgöreŋ anget.

¹¹Farisi (Köna keugö kapaŋkölköl) tosatŋan miaŋgöreŋ kaba Jisösbuk könahiba jitnakölik aket. Keu bötaknöŋ örömapköra esapköm waŋgiba kewö kapaŋ köla qesiget, “Mönö jinöŋga Suepnöhök aŋgöletot kun asuhuiga ekin.”

¹²Mewö jigetka uruŋan lömböriiga osoŋgombuk qeiga jiyök, “O ambazip nalö kewöŋe gölmenöŋ maljei, iŋini mönö wuanöŋgöra Anutugö aiwesök asuhumapköra kapaŋ kölakze? Nöŋön keu ölŋi kun kewö jibi mötme: Anutunöŋ aiwesök mewöŋi mi qahö memba kondel eŋgima. Ombaŋ saumbaŋ!”

¹³Mewö jiba eŋgömosöta kunbuk gwarekurupŋi yembuk waŋgenöŋ öŋgöba aŋgö kutuba likepŋe aŋgotket. Mewö.

¹⁴Miaŋgöreŋ aŋgota semön membingö ölum eŋguiga beret mohot-töp mia waŋgenöŋ memba tatket.

¹⁵Tatketka Jisösnöŋ kewö jim kutum eŋgiyök, “Iŋini Köna keugö kapaŋkölköl (Farisi) yeŋgö wösökömbukŋini aka Herodkö gipmi kakŋi mietköra mönö galömŋini meme. Mi ölöpŋaŋök qahö kewöta andö qegetka mietkön mönö yist ewö qariba mem bölim eŋgimahot.”

¹⁶Jiiga keu pasetŋi mi qahö möt asariba sutŋine kewö eraum mötket. “Beretnini qahöpköra jiza me denöwö?”

¹⁷Mi eraum mötket kezapŋe geiga kewö jii mötket, “Wuanöŋgöra beretnini qahö jiba eraum mötze? Nöŋgö könaŋamni mi wuanöŋgöra qahö möt kutuze? Mi tok qahö möt asarize me? Urukezapŋinan gwözöŋda tatza me?

¹⁸Jeŋini ahözapmö, töndup qahö ek kutuze me? Kezapŋini ahözapmö, töndup qahö möt asarize me? Yuai asuhuyöhi, mi ölum eŋguza me qahö?

¹⁹Nöŋön beret 5 mi 5000 yeŋgöra mindipköbiga miaŋgö kitipŋi qezakögetka könde dawiknöŋ geba numbuŋine qeyök?” Qesim eŋgiiga “Könde 12,” jiget.

²⁰Jigetka toroqeyök, “Nöŋön beret 7 mi 4000 yeŋgöra mindipköbiga miaŋgö kitipŋi qezakögetka sakap dawiknöŋ geba kokolak qeyök?” Qesim eŋgiiga sakap 7 jiget.”

²¹Jigetka jii mötket, “Miaŋgöra könaŋamni mi mönö tok qahö möt asarize me?” Mewö

²²Jisösnöŋ gwarekurupŋi yembuk Betsaida taonöŋ kaget. Miaŋgöreŋ kaba jegömöl azi kun waŋgita Jisösgöreŋ kaŋgota böröŋan misirimapkö köuluköm waŋgiget.

²³Köuluköm waŋgigetka jegömöl azi mi böröŋe memba waŋgita miri yaigepŋe anohot. Anda söutnezit jeŋe ala böröŋi nöröpŋe ala qesim waŋgiyök, “Yuai kun ekzan me qahö?”

²⁴Qesim waŋgiiga jeŋi ui öŋgöiga jiyök, “Ambazip eŋgekzalmö, mi ip tandöktandök aketka imutimutŋanök eŋgekiga anda kaba kinje.”

²⁵Mewö jiiga kunbuk böröŋan jeyahötŋi misiriiga tohoyohotka törörök uiga asarim sölölöŋgöiga yuai pakpak ölöpŋanök ek teköyök.

²⁶Ek teköiga melaim waŋgiba kewö jii mörök, “Gi miri kungen kude anmanmö, diŋdiŋanök nangi mirige anman.” Mewö.

²⁷Jisösnöŋ Betsaida mosöta gwarekurupŋi yembuk Sisarea Filipai taongö kösutŋe anget. Könanöŋ anda gwarekurupŋi kewö qesim eŋgiyök, “Ambazipnöŋ nöŋgöra denöwö jimakze? Ni niŋia akzal?”