Mak 6:9-40

⁹Iŋ ka sendal ŋied fo didiri wa, ak man yamel taidam titired lo didiri san geg ipidinai a.

¹⁰Agog iŋ ibol irupidai, “Aŋ aben dugon te ab ta lo aladu wan, ate mi ab an san tamolpein dida amado yau nap panu an abisei wa.

¹¹Agod panu ta ate ta diŋiliaŋ uyan dop aŋsam ru dam duloŋ o dumoi tap, saen abisawai o dop, ŋiemi apiltip san gufgaf panu an ate idu dop dile wa. An man kob ta murnap iŋaned ilo rumok tia yak san naon iŋ mok diŋane wak igo ya.”

¹²Ru an ibol itout dugo megeloum adi nuŋod uraru urarum dufufurak go diau a. Iŋ panu panu ate tamolpein igo durupidai se ya. “Aŋ aŋanem saian an fidian patum apanip ilom ibilisa wa.”

¹³Agod iŋ ur sisaiak tamolpein tinid lo yan wei mi dukudaig diau se ya. Ago dugo gureŋ kitek nam tamolpein wei mi subam amad da yan tinid fo dububunig lo dukubuniai a.

¹⁴Kiŋ Herod iŋ melmel e Jesus san megeloum adi digane se yan niŋen o iloŋ a. Man dugo, nal an lo man Jesus san yaŋak tamolpein malad lo tubun geig ilasa la ya. Ta dubol, “Suguek san Jon iŋ tamolpein dumat la yak luluŋad lo fon imasag kumaen imado da, nek fun amaiak niŋen o dabai funfun en tinin ilon lo urat digane da.”

¹⁵Gug aenta dubol, “En man Elaija.” Agod aenkadi dubol, “Iŋ man profet ta mi a, nek ibol profet adi wagam san igo mi a.”

¹⁶Ak man saen Herod iŋ Jesus ata kulob igane idu se yan san ru iloŋ man igo ibol, “Jon man bo buron ŋitartig imat la yak gug fon kumaen imasa da ya.”

¹⁷Iŋ ago ibol a, man dugo, imug mi iŋ yu tamol adi idinaig Jon diabi wo diau a. Ŋien banin dusubanig subanek ab lo digane ya. Man ata wo? Herod iŋanen tein Filip san iwon, yaŋan Herodias, ilo uyan ipani san niŋen o iŋ Jon subanek ab lo igane ya. Imug mi Herod pein en iŋsan tein banin na iŋaneg iŋ da nug diŋane ya.

¹⁸Gug Jon iŋ Herod ru en irupei, “Oŋsigane tei san iwon da ator tap, oŋ kubiaeŋ ta uri pani na da.”

¹⁹Amaiak niŋen o Herodias tiŋaen saian go Jon lo siai iganeg imado na ya. Iŋ Jon ifuni imat o ilon tubun mi yen a, ak gug iŋsen mi ago igane san ida ta isuda na ya.

²⁰Man dugo, Herod Jon niŋen o tubun mi irer se ya. Iŋ iloŋ ak Jon iŋ tamol itaot di gun a, an niŋen o talpein ta Jon muruan ipani san niŋen o iparfutani fufei na ya. Nal wei mi iŋ Jon da diŋiŋeŋ go Herod ilo uyan lo iŋanen ru iloŋ se ya. Ak gug ilon weiwei dugo ru fun iloŋ uyan san tia ya.

²¹Nal ta idu man dal ta Herodias idinaip Jon dufuni imat san an ilasa ya. Nal a Herod san tinan gubak mi igansi an san saen ilasa ya, an lo Herod soubul igane ya. Iŋ ru iganeg iŋanen gabman gurman adi, yu tamol unbiek adi, agod tamol adi malan te yak Galili distrik lo yan, fidian dupalup anaŋ diani wa.

²²Aria, anaŋ diani dugo Herodias nanun pein iladug naod na isuluwai se ya. Herod iŋanen turan dida dile dugo malad bulbal dugo ilod tubun mi uyan a. Man niŋen o kiŋ Herod nanuk pein an irupei, “Oŋ mel dugon niŋen o ilo ibol tap, oŋ ka sumianag dop ŋai ŋupano wa.”

²³Agog ru lak na geig nam iŋanen ru dabai ipanig ibol, “Oŋ ata mel niŋen o sumianag, gidad ŋaisag kagin panek aben ŋibitip wadan ŋupano san sumianag a, ŋai ka ŋupano mok a.”

²⁴Agog pein baras an yaug, tinan isumiani, “Ŋai ata mel ipanag o ŋusumiani wak i?” Agog tinan awan yabig ibol, “Suguek san Jon san kabuŋan.”

²⁵Agog pein baras an ririan yaug kiŋ san na ilasag irupeig ibol, “Ŋai ilog man oŋ gamu nam ru ganep suguek san Jon iŋsan kabuŋan daeg fo diganep disini dupalup dupanag a.”

²⁶Herod ru an iloŋ go ilon muruan tubun mok a. Ak man ru lak na geig an gubak mi ibol ilasa la ya, agod iŋanen turan adi malad lo iŋsan awak aban ipani an niŋen o dam, awan ibilisa wo ilon ta yen na ya.

²⁷Ago tag iŋ ririan yu tamol ta talpein ifuni imat san an idinig yaup suguek san Jon buron itartip isini ipalu wo ibol a. An lo yu tamol an yaug, subanek ab ilon lo Jon buron itartig,

²⁸kabuŋan daeg lo iganeg isini ipalug pein baras an ipani a. Agog iŋ isini yaug tinan Herodias ipani a.

²⁹Saen Jon san megeloum adi mel en duloŋ man, dupalug tubabun diŋaneg disini diaug mutou lo digane ya.

³⁰Aria, saen Jesus san megeloum adi tureŋ diabig itout go dumul diaug Jesus dida dutumanig kulob funfun digane, agod piteŋanek a tamolpein durupidai an da, naon na dubol idu ya.

³¹Ago dugo nal an lo man tamolpein wei geig Jesus megeloum adi dida sad na diau dumul oŋ dugo iŋ dunuai anen tia ya. Man niŋen o Jesus iŋ megeloum adi irupidai, “Id tumasap, aben ta tamolpein an tia yak ate taup, idsed kisaek dop kitek yaes tabal a.”

³²Ago ibol tag wog lo disidag, aben ta yoitout tamolpein an tia yak ate yaes dubal o diau a.

³³Ak man tamolpein panu fidian lo yan malad yaug dil duloŋ, ago yan lo wei mi dumasag ŋied nam dumaspalu oŋ you dulubanig, dumug diau silatik oŋ go, loŋ a Jesus iŋanen megeloum adi dida disasau wo yan ate dilasa ya.

³⁴Saen Jesus wog ibiseig loŋ na idu man, doup malan tubun an afon yil a. Agog iŋ ilon imuŋanai a, man ata wo, tamolpein an nek ibol sipsip titianek tamol amad tia yak igo woŋ a. Ago tag imasig imado dugo mel wei mi ipiteŋanai se ya.

³⁵Ru duloŋ dugo yaug gurai isi dugo, iŋsan megeloum adi san na dupalug ago dubol, “Aben en yoitout a, ad dam idu yau la ya.

³⁶Man niŋen o tamolpein en dinaip dufurak pe gidigidad diaup aben siŋired na yan san panu te anaŋ didad pe diani.”

³⁷Ak man Jesus awad yabig igo ibol, “Aŋ mel ta apidinaip diani.” Agog iŋ dubol, “Maŋ tamolpein ago yak bret madad pe mufutai san ta idaisuda na ya. Maŋ fidian kalam 8 urat miganep moni idaisuda miŋane gup, bret idaisuda mi madad a.”

³⁸Agog Jesus isumianai, “Aŋ bret sapita da yak i? Aup ale.” Agog diaug dileg dumul dupalug durupei, “Kafen, agod iy uraru a.”

³⁹Agog Jesus tamolpein an irupidai, “Aŋ sem ibitaŋ pe warou wei mi alasap gafurfur fo amasip amado.”

⁴⁰Ago tag iŋ sed ibitaig doup kitek wei mi dilasa, aenta talpein 50, aenta 100, ago dumasig dumado se ya.