Mak 6:22-55

²²Nga etue nenge Herotias tuna teu at ke hes, poia ne Herot pe ana lang mur ke te iech toto. Pe non soke nem hele lange he malolong nem ke teke, “O hele at nge iau nga utar nenge lemem tau tote pe e tunge lange iong.”

²³Pe hele lange i ke kerkereng toto ke teke, “O teke o longia utar? Lemem ngam mana! Nenge teke lemem ke o mene ure lochloch ngana nenge enau ele, lape e chachia nga tuna ngana ke lem hele pe lek hele.”

²⁴Ol pe he nem i hot la, pe onteia tana, “Lape e longia utar mai?” Pe tana tuacholia, “Ola pe o longia Ioanes nenge henunun palpalna.”

²⁵Pe ueiuei mana he nem la mule nge naungala ana non neu pe hele, “Lemek ke o tunge Ioanes nge henunun palpalna ana kaliu at nge iau heueu mana nei.”

²⁶Ol pe naungaala ana non neu letena poreke toto, pe meia i nge teke lape channanga mana nga ana lang mur mataria.

²⁷Ol pe kulos sapele nena non nge hunun hana kela mene Ioanes palpalna. Non nem la pe chatoa Ioanes kanna nga tuele au ngana.

²⁸Pe mene palpalna nga kaliu ke at mule pe tunge lange he nem pe he nem tunge lange tana.

²⁹Ioanes na hana mur te longe nei pe teat ke te mene koluna kela tealo hite nga rika letena.

³⁰Iesus nena hana mur teat mule nga reria inga mur pe te nana luluch nge i. Pe te nene ure nenge te poia nenge te heleia lange hehei pe hana.

³¹Hehei pe hana halang te atat pe te lala ke te poia Iesus pe nena hana mur ke te ngau ero. Ol pe Iesus hele lange na hana mur ke teke, “Ita ol, tala nga kileng unne ke ita toro ke a tah eingamo mukam.”

³²Ol pe te mene sulang pe teote langa kileng e nge mele tuia ero toto.

³³Pe hulua te neue iri nge tela pe te eteia lo. Pomalam te hile kileng lochloch pe te song nga ich ke iri muka langa kileng nenge lape Iesus pe nena hana mur tesio ia.

³⁴Iesus iuch hot nga sulang pe esia hulua pe letena poreke toto ia iri iange tepoi ke manga sipsip nenge aria naualanga ero. Pe talun ke hetore iri nga ure nge halang toto.

³⁵Chaia matana puluch sisio lo pe nena hana mur teat nge i pe te hele, “Kileng nei, ich sana lomona mana pe ngaunga ero pe chaia matana i sisio mai loi.

³⁶O kulosia iri ke tela nga kileng mur nenge tetu rochroi ke teol aria ngaunga ke te ngau.”

³⁷Pe Iesus hele, “Imo sipomo a tunge aria ngaunga.” Pe te hele, “Mo hengaua iri ke mere mai? O teke mo olia aria ngaunga? Nem lape umtutuna halang toto paiam!”

³⁸Pe Iesus onteia iri, “Beret hia nge ma mau? Ala ke anau toto.” Te tango rara ke het pe te hele, “Beret iri lime iau pe ruo nai pule.”

³⁹Ol pe Iesus hele lange na hana mur ke te poia hulua ke teare sio nga heilil.

⁴⁰Pe teare nga tuluk mur ke te nanas tau hel. Tuluk hel iri ana non kina lime (100) pe hel iri ana non kina nai pe analoch (50).

⁴¹Ol pe Iesus mene beret lime neu pe ruo nai neu. Pe nau haka langa tapa pe hele urana lange NeHalang. Reke beret nemur pe tunge lange nena hekulkulonga mur ke te heronge nge hehei pe hana. Pe heronge ruo nai neu nge iri lochloch pule.

⁴²Iri lochloch te ngau pe saria una toto.

⁴³Pe Iesus na hana mur te heua beret pe ruo aluana mur ke muta toto nga chasang nge iri analoch pe nai.

⁴⁴Hana nenge te ngau, iri 5,000.

⁴⁵Pe ueiuei mana Iesus hele lange na hana mur ke te haka nga sulang ke te muka lange Petsaita. Pe i tu pol mukam ke kulos mulmule hulua ke tela mule nga reria kileng.

⁴⁶Kulosia iri ke tela pe i haka langa hengene ke hetalaulau.

⁴⁷Kileng miliko sio pe nena hana mur te manmana nga ech hetaliliu ngana tunangana lo pe i toro tu nga ich.

⁴⁸Pe esia nena hekulkulonga mur nge te pur kikiria toto ia sulang ote ngana iange tuttula eingana tua ele iri. Pe nga uachuach Iesus i nga ech ona ke lange iri. Teke ris tote iri

⁴⁹pe te esia i nge ii nga ech ona pe te teke ma moiuk iam pe alngaria haka.

⁵⁰Iange iri lochloch tenaue i pe te matau. Ueiuei mana pe hele lange iri ke teke, “A matau ero! A kerkereng, Iau pa i!”

⁵¹Iuch haka lange iri nga sulang pe tuttula nem mete sio. Pe te rura pe leteria una ala,

⁵²iange leteria mallaha ero toto nga beret nenge Iesus heronge nem luna.

⁵³Te ote tele nga ech hetaliliu ngana ke tela nga ich nge Kenesaret pe te hele heke reria sulang.

⁵⁴Te hile sue reria sulang pe ueiuei mana hehei pe hana tenau urume Iesus.

⁵⁵Ol pe te song langa kileng lochloch ngana nga kileng palaungana nem. Pe te takisia iri nenge singiria haleles nga hete ke te lala nga kileng nemur nenge Iesus tutu ia.