Mak 5:6-25

⁶Aunbiing i par pes Iesu tina tapak, ka filau, isi ke ka ilepul na mata.

⁷Ke ka tautau rakrakai aragii, “Iesu, Kalalik ke God buui kanaka na mawe! Sanih on tel u ini iau? Falimlim ini asa God le biil on to ta fangungut sing iau!”

⁸Ka use u arae, wara le Iesu ka fas ta u aragii, “Tanwa laulau, suuh koseng kaltu igii!”

⁹Ke Iesu ka diik u aragii, “Seh asam?” Ka kiliis u aragii, “Asang e Legion, wara le kemem fuun.”

¹⁰Ma ka famam sising Iesu le gong i wuun ufu ri koseng falifuh ae.

¹¹Nenge tara u na boh ri suupsuup la na baban nenge pungpung fatat.

¹²Ke foron tanwa laulau ae ri ka sising Iesu aragii, “Wuun ufu kemem una foron boh ae isi kemek susuef ulo ri.”

¹³Ke Iesu ka somangat ufu ri. Foron tanwa laulau ri ka la koseng kaltu ae, ke ri ka susuef una foron boh. Foron boh ae ri ka filau puh na nenge bolonfam una dan kawil ma ri ka kong. Wewes tikii na foron boh ae, i fasih aragii iwu e arip.

¹⁴Foron tom fofonoi na boh ri par sanih ae i tapiek tah, ke ri ka fin ma ri ka use u na tara maleh, ke na birbiron maleh. Ma fanu tikii ri ka la ma ri ka par sanih ae i tapiek tah.

¹⁵Aunbiing ri ka tapiek sing Iesu, ri ka par kaltu ae foron tanwa laulau ri susuef tah ulo ka kiis ta mang ini kaen na pununfo ma wolwol kia ka malal tikii. Ma ri ka sokeh tikii.

¹⁶Fanseh ae ri par ta sanih ae i tapiek tah, ri ka fas fanu tikii ini tier ae i tapiek tah lon kaltu ae tanwa laulau i susuef ta ulo. Ke ri ka fas ri sabin ini foron boh.

¹⁷Ri ka ongen u arae, ke ri ka sising Iesu isi in la koseng falifuh kiri.

¹⁸Aunbiing Iesu ka ier isi wof na mon, kaltu ae Iesu i tel ufu ta tanwa laulau lo, ka sising u le in la tura.

¹⁹Iesu biil i somangat pes u, isau le ka fas u aragii, “Fis una fel kiam, ma ok fas fanu lo wo ini foron tier laumet ae Kumguui i tel ta u lo wo, ma ini famais kia una aisam.”

²⁰Ke kaltu ae ka la ma ka tipes fafas na Dekapolis ini sanih ae Iesu i tel ta u lo. Ma fanu tikii ri ka bitit.

²¹Iesu ka sopaket dan kawil sabin ini mon una nenge baba. Aunbiing i tinaiwa biitom na baban dan, nenge tara gur na fanu ri ka kawil u.

²²Ke nenge famfamu tina felun lotu, asa e Jairus ka la unaiwa. Ka par Iesu ma ka ilepul na mata.

²³Ma ka sising Iesu ini wolwol tikii kia aragii, “Fabiro keleflik kiak fatat ik met. Kiskam, la ma ok luun limam lo isi ik liu.”

²⁴Ke Iesu ka la tura. Ma nenge tara gur na fanu ri ka mi lo, ke ri ka faruruh nami.

²⁵Nenge fifin aiwa i sem dah i fasih aragii sangful ini u e bet.