Maga Apostoles 10:2-17

²Ele pati su familia bien fiel gayot con Dios, y ta dale gayot limosna con el maga Judio pobre, y ta reza con Dios todo′l dia.

³Un tarde como maga alas tres, ya mira gayot ele un aparacion de un angel de Dios que ya entra na su casa, y ya habla ese con ele, “Cornelio!”

⁴Despues si Cornelio ya tene gayot miedo, y ya pija gayot ele con el angel y ya habla, “Cosa man uste quiere, Ñor?” El angel ya contesta con ele, “Dios ya oi el di tuyo rezo, y ta gusta tamen ele el di tuyo maga trabajo de ayudar con el maga pobre, poreso ta acorda le contigo.

⁵Ahora, manda tu cuanto bilug gente para na Jope, y llama con aquel si Simon, con quien ta llama tamen sila Pedro, y lleva con ele aqui.

⁶Ese hombre si Simon Pedro ta esta junto con aquel otro Simon quien ta limpia cuero del maga animal. El di suyo casa alla cerca na aplaya.”

⁷Despues aquel angel ya sale ya, y si Cornelio ya llama dos ayudante di suyo pati uno del di suyo maga guardia personal quien gayot fiel con Dios.

⁸Y despues de hablar ele canila el cosa ya sucede, ya manda le canila na Jope.

⁹Ala mañana como maga medio dia ya, mientras el maga mensajero ta acerca ya na ciudad, talla si Pedro na casa di Simon, y ya subi na asotea para reza.

¹⁰Ya queda ya le con hambre y quiere gayot le come, pero mientras el maga otro ta prepara el comida, ya queda le como medio durmido.

¹¹Despues ya mira le un aparicion del cielo abierto ya, y tiene como un manta grande ta hace abaja na tierra por medio del cuatro punta ajuntao,

¹²y alla adentro de ese manta tiene todo clase de animal de tierra pati de agua y todo clase de pajaro.

¹³Despues si Pedro ya oi un voz ta habla con ele, “Pedro, levanta, mata, y coci para come.”

¹⁴Pero si Pedro ya habla, “Señor, hende gayot yo puede, cay hasta ahora nuay pa gayot yo come el cosa prohibido na ley di Moises.”

¹⁵Por el segundo vez, el voz ya habla con ele, “No habla que prohibido come el cosa que Dios ya habla puede come.”

¹⁶Ansina gane ya sucede ese tres veces, despues ya lleva dayun ole aquel manta para na cielo.

¹⁷Mientras si Pedro ta pensa gayot acerca del cosa ya mira le, aquel tres mensajero di Cornelio ya llega na puerta y ya pregunta si donde ta queda si Simon, el cortidor de cuero.