MAAKU 9:13-36 - Luda yã takada kↄ̃n Bokobaru yão

MAAKU 9:13-36

Click on verse(s) to share them!

¹³Mↄde mɛ́ɛ ooare Ilia mↄ̀ kↄ̀, ben aↄ̃ ń pↄyezi kɛ̀nɛ, lán wà à yã ò Luda yãn nà.

¹⁴Kɛ̀ aↄ̃ sù ń gbɛ̃ kpaaanↄ kiia, aↄ̃ↄ è parii ligańzi, ben ludayãdannɛrinↄↄ e lɛokpakↄ̃a kɛɛńyo.

¹⁵Kɛ̀ parii Yesu è, à yã bↄ̀ ń saɛ, ben aↄ̃ bàa lɛ̀ wà gàa wà ì kpàa gↄ̃ↄ ń píngi.

¹⁶Ben à a ìbanↄ là à bè: Bↄ́ lɛokpakↄ̃an ée kɛɛńyo lɛee?

¹⁷Ben gↄ̃gbɛ̃ ke wèàla zà guu à bè: Dannɛri, ma mↄnnɛ ma nɛ́omɛ, zĩn bé à à nɛ́nɛ nàɛ.

¹⁸Tó à dìdia, è à pãɛ tↄↄtɛ, ègↄ̃ lóufuta bↄɛɛ, ègↄ̃ swaa soo, è gbãgbã sↄ̀rↄrↄ. Ma bè n ìbanↄnɛ aↄ̃ pɛ́ zĩn pìa à bↄ, ben aↄ̃ fùa.

¹⁹Ben Yesu bèńnɛ: Tↄ̃ↄrigbɛ̃ ludanaanɛkɛrisaideenↄ! Mɛ́gↄ̃ kúao ai bↄrɛmɛ? Mɛ́gↄ̃ mɛnaaao ai bↄrɛmɛ? À mↄ́mɛ nɛ́ pìo kɛ̀.

²⁰Kɛ̀ wà mↄ̀onɛ, kɛ̀ zĩn pì Yesu è gↄ̃ↄ, ben à nɛ́ pì nìgãnigã à à pã̀ɛ tↄↄtɛ. Ben èe gbegere paa èe lóufuta bↄɛɛ.

²¹Yesu nɛ́ pì de là à bè: Zaa bↄrɛmɛ à kúo lɛɛ? À wèàla à bè: Zaa à nɛ́ féte zĩmɛ.

²²Ègↄ̃ à zuu tɛ́ kↄ̃n ío guu baabↄrɛ, ègↄ̃ yezi à à dɛ. Tó nɛ́ fↄ̃ ǹ pↄ́ke kɛ, ǹ wa wɛ̃nda gwa ǹ wa faaba kɛ.

²³Yesu bènɛ: N bè, tó mɛ́ fↄ̃ↄ́? Baabↄ píngi è sí kɛ gbɛ̃ kɛ̀ ma náanɛ vĩinɛ.

²⁴Ben nɛ́ pì de wii lɛ̀ gↄ̃ↄ à bè: Má n náanɛ vĩ. Ǹ n náanɛ kɛ̀ èe kɛ̃sãama kaaramɛ.

²⁵Kɛ̀ Yesu è zà e nakↄ̃rɛɛḿma, à gì zĩn pìnɛ à bè: Zĩn swãdo kpadugu, má ònnɛ ǹ go nɛ́ pìa. Ǹton gɛ̃ à guu dↄro.

²⁶Ben zĩn pì wii lɛ̀ à à nìgã pãsĩpãsĩ, ben à gòa. Nɛ́ pì gↄ̃̀ daɛna lán gɛ̀ bà ai paridee bè à gàmɛ.

²⁷Ben Yesu à kũ̀ a ↄↄa, à à fɛ̀ɛ à zɛ̀.

²⁸Kɛ̀ Yesu gɛ̃̀ ua guu, ben à ìbanↄ à gbèka gusaɛ wà bè: À kɛ̀ dia wée fↄ̃ wà pɛ́ zĩn pìa à bↄroo?

²⁹Ben à wèńla à bè: Kɛ̀ taka è sí bↄro, sé kↄ̃n aduakɛnao.

³⁰Kɛ̀ aↄ̃ bↄ̀ gwe, ben aↄ̃ pã̀ Galilinɛ. Yesu yezi wàgↄ̃ a kúkii dↄ̃ro,

³¹zaakɛ èe yã daa a ìbanↄnɛmɛ. À bèńnɛ: Weé Gbɛ̃ntee Nɛ́ na gbɛ̃nↄnɛ ń ↄzĩ wà à dɛ, à gurↄ aagↄ̃dee zĩ eé fɛɛ.

³²Aↄ̃ↄe à yã pì dↄ̀rↄ dↄ̃ro, ben vĩa ń kũ aↄ̃ yã pì gbekaa.

³³Ben aↄ̃ kà Kapɛnamu. Gurↄↄ kɛ̀ à kú bɛ, à a ìbanↄ là à bè: Bↄ́ lɛokpakↄ̃an ée kɛɛ zɛ́ guuu?

³⁴Ben aↄ̃ yĩtɛna, zaakɛ aↄ̃ↄe lɛokpakↄ̃a kɛɛ zɛ́ guu dɛnlaa yã musumɛ.

³⁵Ben à vɛ̃̀ɛ à gↄ̃ↄn kuri awɛɛplaaa pìnↄ sìsiazi à bè: Tó gbɛ̃ yezi à kɛ gbɛ̃ káaku ũ, adee gↄ̃ kpɛɛdee ũ, à gↄ̃ baade pínginɛ zĩ̀ri ũ.

³⁶À nɛ́ féte sɛ̀ à à zɛ̀ ń aɛzĩ, ben à à sɛ̀ à à kpà a kùla à bèńnɛ: