MƐBORIMƐ WÉÌTÌ 7:7-23

⁷Mɛfɛ̃́ṹtímɛ̀ mɛɛ̀ ɔ̃ nte kɛ̀ wèè ciì kòo fentɛ, kɛ̀ ticuuti cɑɑ̀ri onìtì.

⁸Dɛ̀mɑrɛ̀ kó mudeèmù wenninɛ̀mu dɛ ketímù, kɛ̀ mɛminnímɛ̀ wenninɛ̀ tɛfentɛ̀.

⁹A miɛkɛ bɑ́ ncɑ̃ɑ̃ kɛ pɛ́íkú, tiyɛìntì tiì miɛkɛ cɑ̃ɑ̃́ kɛ pɛ́íkú.

¹⁰A yɛ̀mmɛ̀ bɑ́ ndò nyɛmɔ̀rɛ̀ yɛ̀ɛ̀ pɛ̃ɛ̃tɛ́ yɛ̀ wenninɛ̀ di mmɔ̀nnì kpɛyɛ. Wèè ciì wè í toti dɛ kó mɛyɛ̀mmɛ̀ botí.

¹¹Mɛciì ntu dɛ̀mɑrɛ̀ sɑ̀ɑ̀rɛ̀ ndɛ kɛ dònnɛ̀ onìtì yɛmbɛ̀ ɔ̃ɔ̃ kú kóò yóunɛ̀ dɛ̀, bɑ́ wè kòò pɛ̀ú mɛ kó mucɔ̃́ntimu.

¹²Tikpɑ̀tì yiɛ̀ nyí yĩɛ̃̀kùmɛ̀, mɛciì nyiɛ̀ nyí mɛ nyĩɛ̃̀kù. Mɛciì yiɛ̀ nkó mucɔ̃́ntimu tú mɛ ɔ̃ ntemɛ̀ wèè mɛ̀ mɔ̀kɛ kòo nfòù.

¹³Wéntɛ́ Kuyie nkó mutɔ̃mmú, we mbo nɑ kɛ́sɛ́i nkù kɔ̀ńnɛ́ dɛ̀?

¹⁴Kɑ̀ɑ bo diwɛ̀ì miɛkɛ dɛ̀ ndɑ nɑɑti, kɛ̀ mɛyɛǹcɑɑ̀rìmɛ̀ mɛ ndɑ tùɔ̀kɛní totí ɑ yɛ̀mmɛ̀, Kuyie ndɛ̀ dɔ̀ɔ̀ dɛdɛ́ kɛ̀ dɛ̀ bo yie nkòo nìtì bɑ́ nyɛ̃́ tìì yóó ò tùɔ̀kɛní tìnti o kṹṹ nkó difɔ̃nkúò.

¹⁵N fòmmu kũpumu mmuu mmiɛkɛ n yɑ̀mu dɛmɔu. Osɑ̀ù ɔ̃ɔ̃ tootɛmu bɑ́ nɛ̀ o sɑ̀ɑ̀ mmiɛkɛ, kòo yɛiwe nfòù kɛ́mɔntɛ bɑ́ nɛ̀ ò mɛ ndɔɔrimɛ̀ mɛyɛi.

¹⁶Bɑ́ nsɑ̀ kɛ́tontɛ́ ɑ mɛ mbɑ́ nciì kɛ́tontɛ́ ɑ yɑ̀ɑ̀ bo kuɔ ɑmɑ́ɑ̀.

¹⁷A bɑ́ɑ́ yóu kɛ̀ kuyonku dɑ́ tiekɛ ɑ mɛ mbɑ́ yóu kɛ̀ tiyɛìntì dɑ́ tiekɛ ɑ yɑ̀ɑ̀ bo tootɛ.

¹⁸Dɛ̀ wennimu kɛ dò nhɑ ndɛ̀ pĩ, ɑ bɑ́ɑ́ dɛ̀ yɛ̃̀. Wèè dé Kuyie nwè í yóó pɑ́kɛ́.

¹⁹Mɛciì nhɔ̃ɔ̃ kpénkùnnɛmu mɛ yiɛ̀ nkɛ̀ dɛ̀ɛ pɛ̃ɛ̃tɛ́ kùmɑ̀ndɑ́ɑ̀bɛ̀ bo mbomɛ̀ tɛpíítɛ̀ dihɛì dìmɑ́ɑ̀ miɛkɛ.

²⁰Onìtì mɔù í bo kɛtenkɛ̀ ĩ́nkɛ̀ wèè wenni kɛ sɑ̀nnɛ̀ kɛ dò nwenwe bɑ́ɑ́ dɔɔ̀ mɛyɛi. Kɛ bo ndɔɔri mɛsɑ̀ɑ̀ mmɑ́ɑ̀.

²¹Bɑ́ nkenti bɛnìtìbɛ̀ nɑ̀ɑ́ ntì timɔu kɛ̀ dɛ̀ɛ yie nkɑ̀ɑ bɑ́ɑ́ keè ɑ kóo tɔ̃ntì dɑ sɑ̃́ɑ̃́mmɛ̀.

²²A yɛ̃́mu kɛ dò nhɑ ɔ̃ nsɑ̃́ɑ̃́ mbɛtɔbɛ̀ yɛmɔ̀rɛ̀ mɑyɛ̀.

²³N dɛ̀ wèńnímu dɛmɔu m bennɛ́mu nɛ̀ n ciì mmiɛkɛ kɛ bo ntú onìtì wèè ciì, kɛ yĩɛ̃kɛ.