MƐBORIMƐ WÉÌTÌ 5:5-14

⁵A bɑ́ɑ́ yóu kɑ̀ɑ nùù nte kɑ̀ɑ nɑɑ́ nhonitiyɛiwe, kɛ́nɑ́kɛ́ ikuɔ́ nìùtì kɛ dɔ̀: N nùù diì n fìtɛ́nɛ̀. Bɑ́ɑ́ duɔ́ nkɛ̀ Kuyie mmiɛkɛ dɑ́ yɛ̀ kɛ̀ kùu cɑkɛ ɑ tɔ̃mmú.

⁶Kuyɛìnkù bo dɔúnnɛ̀mɛ̀ Kuyie ndinùù dɛ̀ ɔ̃ nkù dònnɛ̀ tidɔùntì nti, tinɑ́ɑǹtì sɔ̃́ntíkɛ kpɛti, mudɑɑ́ nkpɛrɛ. Fɔ̃́ nwèè ciì ɑ́ ndé Kuyie.

⁷Mɛm̀mɛ kɑ̀ɑ yɑ̀ kɛ sɔ̃́ ndihɛì mɑrì kɛ̀ bɛ̀ fɛ̃́ũnko bɛ̀ɛ̀ í tú bɛ̀mɑbɛ̀, kɛ í bɔti mɛwetímmɛ̀ kpɛti, kòò mɔù í wúó nhotɔù. Dɛ̀ bɑ́ɑ́ dɑ di kɛ yɛ̃́ onìtì ɔ̃ mbɑkɛ́mɛ̀ bɛtɔbɛ̀ kɛ̀ bɛ̀ ò bɑkɛ́mu, kɛ̀ wèè tó bɛ̀ bɑkɛ́ kòò bomu.

⁸Bɛ̀ piɛti mùù cɔ̃́ntimu kɛtenkɛ̀, mù tu bɛmɔu kɔ̃mu mmu. Bɑ́ okpɑ̀ɑ̀tì ò fòùnɛ̀ dɛpɑɑ ndɛ.

⁹Wèè bɛ̀tì idíítí ò í kpɑɑ́ kɛ bo nyì sɑ̀nnɛ̀, wèè bɛ̀tì tikpɑ̀tì ò í kpɑɑ́ kɛ bo tì nìntɛ. Dɛ̀ í dò nkɛ́bɑntɛ́.

¹⁰Kɛ̀ tikpɑ̀tì sũ̀ṹ nti diibɛ̀ ɔ̃ɔ̃ sṹṹmmu. Tikpɑ̀tì yiɛ̀ nkó mucɔ̃́ntimu nɛ́ tú ɔ̃̀mmu kɛ̀ dɛ̀ í tú ò tì wúómmɛ̀ nɛ̀ o nuɔ.

¹¹Kòo tɔ̃ntì di kɛ sɑ̀nnɛ̀ yoo ò ɑutɛ́ ò ɔ̃ nduɔ́ kɛ̀ dɛ̀ ò nɑɑtimu. Kɛ̀ tikpɑ̀tì yiɛ̀ ndi kɛ́nsɑ̀nnɛ̀, ò mɛ mbɑ́ɑ́ nɑ kɛ́duɔ́.

¹²N yɑ̀ mɛborimɛ tɛ̃mɛ̀ mmɛ kɛtenkɛ̀ ĩ́nkɛ̀, kɛ̀ mɛ̀ yóù mɛdiɛ̀. Onìtì bo sɔnnɛmɛ̀ tikpɑ̀tì yɛwe yɛiyɛ kpɛ́í,

¹³kɛ̀ tìì sɔ̃́ntɛ́ kɛ́cɑkɛ kòo nyóó mɔɔtɛ dɛbirɛ bɑ́ dɛ̀mɑrɛ̀ í kpɑɑ́ o nɔu miɛkɛ.

¹⁴Ò yɛ̀nní mɛ̀ɛ̀ botí o yɔ̃ pɔutì, kòò mɛ nwɛ̃tɛ kɛtenkɛ̀. Ò pĩ mmùù tɔ̃mmú kó dimɑ̀ɑ̀, ò í cɔ̃ntɛ́ dɛ̀mɑrɛ̀ kɛ́tɔ.