Màndiŋ ma 21:9-31

⁹Ci kaw loolu Musaa defarlu jaanu xànjar, wékk ko ci bant, ba képp ku jaan màtt, bu xoolee jaanu xànjar ja, daldi mucc.

¹⁰Bànni Israyil fabooti, dem ba dali fa ñuy wax Obot,

¹¹jóge Obot, dali Yee Abarim, ca màndiŋ ma janook Mowab, ca penku ba.

¹²Foofa lañu faboo, dem ba dali ca walum Seredd,

¹³bàyyikooti foofa, dem ba dali ca wàllaa dexu Arnon, ga wale ca réewum Amoreen ña te jaare ca màndiŋ ma. Dexu Arnon googa, fa la réewum Mowab digalook Amoreen ñi.

¹⁴Moo tax téereb Xarey Aji Sax ji indi ko, ne: «Waxeb ga ca Sufa, xuri Arnon yaak

¹⁵xur ya bartalu, jëm néegi Ar, leruji suufas Mowab.»

¹⁶Fa lañu bàyyikoo, dem Beer, (mu firi ab Teen); teen boobu, fa la Aji Sax ji noon Musaa: «Dajaleel mbooloo mi, ma may leen ndox.»

¹⁷Ca la Israyil woy woy wii: «Teen bile walal, nu woy.

¹⁸Ay garmee la bënn, kàngami askan wi gase la yeti buur, ak seen banti bopp.» Ñu jóge màndiŋ ma, dem ba Matana,

¹⁹jóge Matana dem Naxaliyel, jóge Naxaliyel, dem Bamot,

²⁰jóge Bamot ba ca xur, wa ca àllub Mowab, àkki nag njobbaxtalu tundu Pisga, wa tiim ndànd-foyfoy ga.

²¹Ba loolu amee Israyil yebal ay ndaw ca Siwon buurub Amoreen ña, ne ko:

²²«May nu, nu jaare sam réew. Dunu fi jàdde benn tool mbaa ab tóokëru reseñ, dunu fi naan ndoxum teen. Mbeddum buur lanuy topp, ba keroog nuy jàll sam réew.»

²³Siwon nag mayul Israyil, ñu jaarem réewam, xanaa mu dajale gàngooram gépp, sàqi, ngir dajejeek Israyil ca màndiŋ ma. Mu dikk ba Yaxacc, song Israyil,

²⁴Israyil leel ko ñawkay saamar, nangu seenum réew, dale ko Arnon ba Yabog, ba àgg ca Amoneen ña, ndax kemu réewum Amoneen ñaa fegu woon ba jotuwul.

²⁵Israyil nangu dëkki Amoreen yooyu yépp, daldi sance mboolem seeni dëkk, boole ca Esbon aki dëkk-dëkkaanam.

²⁶Esbon moo doon péeyub Siwon buurub Amoreen ña. Kookoo xare woon ak buuru Mowab ba woon, moo nangu ciy loxoom réewam mépp, ba Arnon.

²⁷Moo tax woykat ya ne: Ayca ca Esbon, ba tabaxees kooti; na dëkkub Siwon jógati.

²⁸Lakk gaa nga jóge Esbon, sawaraa bawoo dëkkub Siwon ba, xoyomi Ar ga ca Mowab, gor ñooña tiim dexu Arnon.

²⁹Mowabee ngalla yaw! Sànku ngeenee, yeen askanu Kemos, mi wacc doomam yu góor, ñu daw, doomam yu jigéen doon jaami Siwon buurub Amor.

³⁰Noo leen fitt, Esbon ba Dibon rajaxoo, nu rajaxeeti ba Nofa, ba àkki Medeba.

³¹Israyil nag dëkke réewum Amoreen ña.